🎶 സോളമന്റെ ഉത്തമഗീതം 🎶❤️: ഭാഗം 34

രചന: റിൻസി പ്രിൻസ്‌

എന്റെ കാര്യത്തിൽ തനിക്കിനി ഒരു സംശയം വേണ്ട, അതുകൊണ്ട് പള്ളിയിൽ വെച്ച് തന്നെ ഇങ്ങനെയൊരു ചടങ്ങ് നടത്താം എന്ന് തീരുമാനിച്ചത്.. ആ മോതിരം എന്റെ കൈയിലോട്ട് ഇടൂ,

അവൻ വലത് കൈയ്യിലെ മോതിരവിരൽ നീട്ടിക്കൊണ്ട് അവളോട് പറഞ്ഞു. ഒരു നിമിഷം അവന്റെ പ്രവർത്തിയിൽ അവൾ ഒന്ന് അമ്പരന്നു പോയിരുന്നു

പെട്ടന്ന് അവൾ കൈ വലിച്ചു കളഞ്ഞു,എന്തെ അവൾ അങ്ങനെ ചെയ്തത് എന്ന അർത്ഥത്തിൽ അവൻ അവളെ ഒന്ന് നോക്കി

“പാടില്ല…!

അവൾ പറഞ്ഞു..

“എന്താടോ..?

അവൻ മനസിലാകാതെ ചോദിച്ചു

“ഇത് ജീവിതത്തിലെ വളരെ പ്രധാനപെട്ട ഒരു കാര്യം ആണ് അത് ഇങ്ങനെ അല്ല ചെയ്യണ്ടത്,

“ഞാൻ തനിക്ക് ഒരു വിശ്വാസം വരാൻ വേണ്ടി ആണ് ഇപ്പോൾ ഇങ്ങനെ ചെയ്യുന്നത്

“എന്റെ വിശ്വാസം അല്ല, ഇത് വളരെ പവിത്രമായ ഒരു ഉറപ്പ് ആണ്, ഒരു മകൻ തന്റെ മുന്നോട്ട് ഉള്ള ജീവിതത്തിൽ ഒരുവളെ കൂടെ കൂട്ടുന്നതിന്റെ തുടക്കം കാണാൻ അവർ ജനിക്കുന്ന സമയം മുതൽ മാതാപിതാക്കൾ ആഗ്രഹിക്കും, അങ്ങനെ ഒരു ആഗ്രഹം അമലയാന്റിയ്ക്കും അങ്കിളിനും ഉണ്ടാകില്ലേ..? അവരുടെ സാന്നിധ്യത്തിൽ അല്ലാതെ അത് പാടില്ല

അവൾ പറഞ്ഞു.

“അതിപ്പോ സാധ്യമാകുമെന്ന് തനിക്ക് തോന്നുന്നുണ്ടോ..?

” ഒരിക്കലുമില്ല,

” ഞാനിപ്പോൾ പപ്പയോടോ മമ്മിയോടോ വന്ന് പറഞ്ഞാൽ അവര് ഇപ്പൊൾ ഇവിടെ വന്ന് ഈ കാര്യത്തിന് സാക്ഷ്യം വഹിക്കുമോ..? അതിനൊരു സമയമുണ്ടല്ലോ..? ആ സമയത്ത് നമുക്ക് എല്ലാവരെയും അറിയിച്ചു തന്നെ അത് ചെയ്യാം, ഇതിപ്പോൾ തന്റെ മനസ്സിൽ എന്നോട് ഒരു വിശ്വാസക്കുറവുണ്ട് പിന്നെ താൻ ഒറ്റയ്ക്കാണെന്ന് തോന്നൽ ഉണ്ടാവാതിരിക്കാനും കൂടിയാണ്..

ആർദ്രമായി അവൻ പറഞ്ഞപ്പോൾ നിറകണ്ണുകളോടെ അവന്റെ മുഖത്തെക്ക് അവൾ നോക്കി,

“ഒരുപാട് സന്തോഷമുണ്ട് എന്നെ ഇങ്ങനെ പരിഗണിക്കുന്നതിന്..! ഇന്നുവരെ ആരും എന്നെ ഇത്രത്തോളം പരിഗണിച്ചിട്ടില്ല, എന്റെ കാര്യങ്ങളിൽ ഇത്രയും കരുതലും ആത്മാർത്ഥതയും കാണിക്കുന്നതിന് എനിക്ക് ഒരുപാട് സന്തോഷമുണ്ട്. ഇതിൽ കള്ളമില്ലെന്ന് എനിക്ക് 100% ഉറപ്പുണ്ട്, പക്ഷേ എന്റെ പേടി അതൊന്നുമല്ല എനിക്ക് അർഹതയില്ലാത്ത സ്ഥാനമാണ്..! അതുകൊണ്ട് മാത്രമാണ്, അല്ലാതെ വിശ്വാസക്കുറവുകൊണ്ടല്ല. എനിക്കൊരു വിശ്വാസക്കുറവും ഇല്ല അതുകൊണ്ടുതന്നെ ഇച്ചായനെ എനിക്ക് പൂർണ്ണ വിശ്വാസമാണ്,

അവളുടെ ഇച്ചായൻ എന്നുള്ള ആ വിളി അവനെ ഒന്ന് അമ്പരപ്പിച്ചു കളഞ്ഞിരുന്നു. അങ്ങനെ അവൾ വിളിക്കുമെന്ന് അവൻ ഒട്ടും പ്രതീക്ഷിച്ചിരുന്നില്ല. അതിനാൽ അവനിൽ ഒരു പുഞ്ചിരി നിറഞ്ഞു നിന്നിരുന്നു. അവളുടെ മുഖത്തേക്ക് അവൻ ചിരിയോടെ നോക്കി,

” ഒന്നൂടെ വിളിച്ചേ…

അപ്പോഴേക്കും അവളുടെ മുഖത്ത് നാണത്തിന്റെ ചേഞ്ചുവപ്പ് ചായം പടർത്തി കഴിഞ്ഞിരുന്നു.

“ഈ നിമിഷം ഇച്ചായന്റെ പപ്പയും അമ്മയും ഒരുമിച്ച് ഒരുപാട് ആഗ്രഹിച്ചിട്ടുള്ള ഒരു നിമിഷം ആണ്. അവരുടെ ആ സന്തോഷം ഞാനായിട്ട് മിസ്സ് ചെയ്യാൻ പാടില്ല എന്ന് ആണ് ഞാൻ ആഗ്രഹിക്കുന്നത്.

” എല്ലാവരുടെയും അനുഗ്രഹത്തോടെ അഭിമാനത്തോടെ തന്നെ ഈ മോതിരം ഞാൻ തന്റെ കയ്യിൽ ഇട്ടു തരും, അങ്ങനെ ഒരു ദിവസം ഒരുപാട് വൈകൊന്നുമില്ല..

അവളുടെ കൈകൾക്ക് മുകളിൽ തന്റെ കൈകൾ വച്ചു കൊണ്ട് ആർദ്രമായി അവൻ അവൾക്ക് ഉറപ്പു കൊടുത്തു. അവന്റെ മുഖത്തേക്ക് അവൾ ഒന്ന് സൂക്ഷിച്ചു നോക്കി.

“തമാശ പറഞ്ഞതല്ല സത്യം.

” എന്താണെങ്കിലും ഇങ്ങനെയൊരു നിമിഷം നമ്മുടെ ജീവിതത്തിൽ ഉണ്ടാവാതൊന്നും ഇരിക്കില്ല, എന്നെ മനസ്സിലാക്കാത്തവരല്ല എന്റെ അച്ഛനും അമ്മയും. അവർക്ക് എന്നെ മനസ്സിലാവും എന്റെ ഇഷ്ടത്തിനപ്പുറം അവർക്ക് മറ്റൊന്നുമില്ല. താൻ ഒക്കെയാണെങ്കിൽ ഞാൻ ഇന്നുതന്നെ വീട്ടിൽ സംസാരിക്കാം,

അവന്റെ ആ വെളിപ്പെടുത്തലിൽ അമ്പരന്നു പോയിരുന്നു മരിയ ..

” ഇന്നോ..,?

” ഇത് പിന്നത്തേക്ക് മാറ്റി വയ്‌ക്കേണ്ട കാര്യമല്ലല്ലോ,

” എന്നാലും ഇപ്പോൾ സംസാരിക്കേണ്ട,

“ഓക്കേ എങ്കിൽ പ്രാർത്ഥിച്ചിട്ട് നമുക്ക് കുറച്ചൊന്ന് കറങ്ങാം,

അതും പറഞ്ഞു അവൻ കുരിശു വരച്ച് പള്ളിയിൽ നിന്നും ഇറങ്ങിയപ്പോൾ അവൾ കണ്ണുകൾ അടച്ച് ഒന്നുകൂടി ആത്മാർത്ഥമായി പ്രാർത്ഥിച്ചിരുന്നു.. ഇപ്പോൾ താൻ കാണുന്നതൊന്നും സ്വപ്നമാവരുതെന്നും ഇത് യാഥാർത്ഥ്യമായി തന്നോടൊപ്പം ഉണ്ടാവണമെന്നും…

അവൾ ചെല്ലുമ്പോൾ അവൻ പുറത്ത് കാത്തു നിൽക്കുന്നുണ്ടായിരുന്നു. അവൻ പറയാതെ തന്നെ കാറിന്റെ ഫ്രണ്ട്സീറ്റിൽ ആണ് അവൾ കയറിയത്, തിരികയുള്ള യാത്രയിൽ അവന്റെ കൈകൾക്ക് മുകളിൽ അവൾ കൈകൾ വച്ചു ഒരുവേള അവനെ അത്ഭുതപ്പെടുത്തിയിരുന്നു. അവളുടെ ആ പ്രവർത്തി. ശേഷം അവന്റെ മുഖത്തേക്ക് നോക്കി അവൾ ചോദിച്ചു,

“ഇച്ചായനു വിഷമമായോ..?

അവൻ ഇല്ല എന്ന് ചിരിയോടെ കണ്ണുകൾ അടച്ച് കാണിച്ചു…

” താൻ പറഞ്ഞത് തന്നെയാണ് ശരി. എനിക്ക് തന്നോട് ബഹുമാനമാണ് തോന്നുന്നത്. താൻ വളരെ പക്വതയോടെയാണ് ചിന്തിച്ചത്. ആരും കാണാതെ ഒളിച്ചും പാത്തും ചെയ്യേണ്ട ഒന്നല്ല ഇത്. താൻ പറഞ്ഞതു പോലെ ഞാൻ ജനിച്ച സമയം മുതലേ എന്തൊക്കെ സ്വപ്നങ്ങൾ ഉണ്ടായിരിക്കും അവർക്ക്. അതിൽ ഈ ഒരു നിമിഷം എന്താണെങ്കിലും ഉണ്ടാകും. അത് ശരിയായ കാര്യമല്ല.

അവന്റെ മറുപടി കേട്ടപ്പോഴാണ് അവൾക്ക് ആശ്വാസമായത്. തന്റെ പ്രവർത്തി അവനെ വേദനിപ്പിച്ചോ എന്നുള്ള ഒരു സംശയം അവളി ൽ നിലനിന്നിരുന്നു.

ശേഷം അവർ പോയത് മറീന ബീച്ചിലേക്ക് ആയിരുന്നു. ഒരു കൊച്ചു കുട്ടിയുടെ കൗതുകത്തോടെ അവിടെ നോക്കുകയും തിരമാലകളെയും ബീച്ചിലെയും കാഴ്ച വീക്ഷിക്കുകയും ചെയ്യുന്നവളെ കണ്ടപ്പോൾ അവന് അത്ഭുതവും അതോടൊപ്പം സഹതാപവും തോന്നിയിരുന്നു, ഇതിനു മുൻപ് അവളെ ആരും പുറത്തേക്ക് കൊണ്ടുപോയിട്ടില്ല എന്ന് അവന് മനസ്സിലായിരുന്നു. കൗതുകത്തോടെയുള്ള അവളുടെ നോട്ടത്തിൽ അവന് വല്ലാത്ത വേദന തോന്നിയിരുന്നു. കുറച്ചുനേരം അവളെ ശല്യം ചെയ്യാൻ അവൻ പോയില്ല, അവൾ കാഴ്ചകൾ കാണട്ടെ എന്ന് തന്നെ കരുതി.

ഏറ്റവും നീളമേറിയ പ്രകൃതിദത്ത നഗര ബീച്ചാണ് മറീന , ലോകത്തിലെ രണ്ടാമത്തെ വലിയ ബീച്ച്, സുവനീറുകൾ വിൽക്കുന്ന കടകളും കാണാം. പ്രിയപ്പെട്ടവരുമൊത്ത് നടക്കാൻ ഏറ്റവും മികച്ച ഇടം, ചൂടുള്ള പലഹാരങ്ങൾ, അവിടെ വിൽക്കുന്നുണ്ട്. തണുത്ത സായാഹ്ന കടൽക്കാറ്റും സൂര്യൻ ആകാശത്തേക്ക് മുകളിലേക്ക് ഇഴയുന്നതും കടൽത്തീരത്ത് നിന്ന് സമുദ്രത്തിലേക്ക് അപ്രത്യക്ഷമാകുന്നതും ഒക്കെ വിസ്മയിപ്പിക്കുന്നതും ആകർഷകവുമായ അനുഭവമാണ്.

ഒരു കൊച്ചു കുട്ടിയുടെ കൗതുകത്തോടെ അവൾ ഓരോ കാഴ്ചകളും നോക്കുകയാണ്. ഇടയിൽ മണ്ണിൽ കാല് പൂഴ്ന്ന് പോകുമ്പോൾ അത്ഭുതപൂർവ്വം നോക്കുന്നു. അവൾക്കൊരു പിൻബലം എന്നതുപോലെ അവൻ അവളുടെ കൈകളിൽ കയറി പിടിച്ചിരുന്നു, ഒരിക്കലും കൈ വിടില്ല എന്ന് അവളോട് പറയുന്നതുപോലെ…..കാത്തിരിക്കൂ………

മുന്നത്തെ പാർട്ടുകൾ വായിക്കാൻ ഇവിടെ ക്ലിക്ക് ചെയ്യുക…