🎶 സോളമന്റെ ഉത്തമഗീതം 🎶❤️: ഭാഗം 52

രചന: റിൻസി പ്രിൻസ്‌

ഒരു പ്രേത്യേക രുചി ആണ് നിന്റെ ചുണ്ടുകൾക്ക്, പുളിയും മധുരവും ഇടകലർന്ന മുന്തിരിയുടെ പോലെ…

മേൽ മീശ കടിച്ചു കണ്ണ് ഇറുക്കി കാണിച്ചവൻ പറഞ്ഞു

നാണത്താൽ ചുവന്നു പോയവൾ, അത് കണ്ടിട്ട് എന്നോണം ഒരു കണ്ണ് ഇറുക്കി അവളെ കാണിച്ചു അവൻ ചോദിച്ചു

“പോകാം….?

“എങ്ങോട്ട്..?

“ഈ ലോകത്തിന്റെ അറ്റത്ത്…

ഏറെ പ്രണയത്തോടെ വീണ്ടും അവളുടെ നെറ്റിയിൽ നെറ്റി മുട്ടിച്ചു കൊച്ചു കുട്ടികളെ പോലെ പറഞ്ഞു. അവളൊന്നു ചിരിച്ചു

“എവിടെ വേണേലും ഇച്ചായൻ ഉണ്ടേൽ ഞാൻ വരും, എനിക്ക് അത്രയ്ക്ക് ഇഷ്ട്ടമാ

അവളുടെ ഉള്ളിൽ നിന്നായിരുന്നു ആ മറുപടി എന്ന് വ്യക്തമായിരുന്നു..

അവൻ അവളുടെ കൈയ്യിൽ പിടിച്ചു എന്നിട്ട് കണ്ണ് ചിമ്മി കാണിച്ചു. പിന്നെ വണ്ടി എടുത്തു. യാത്രയിൽ ഉടനീളം അവൻ ചോദിച്ചത് ഹോസ്റ്റലിനെ കുറിച്ച് ആയിരുന്നു. പിന്നെ അമല പറഞ്ഞ കാര്യങ്ങളെ കുറിച്ചും. ഇതുവരെ ഇല്ലാത്ത ഉത്സാഹത്തോടെ ഓരോ വിശേഷങ്ങളും അവനോട് പങ്കുവയ്ക്കുന്നുണ്ടവൾ. അവൻ അത്ഭുതത്തോടെ അവളെ നോക്കി. തന്നെ കണ്ടപ്പോൾ മുതൽ കലപില വർത്തമാനം ആണ് പെണ്ണ്. അങ്ങനെ പൊതുവെ അവൾ സംസാരിക്കുന്നത് അല്ല. ഇന്നിപ്പോൾ തന്റെ സാന്നിധ്യം അവളിൽ നിറച്ചത് ചെറിയ സന്തോഷമല്ലന്ന് അവന് തോന്നി. അതാണ് ഈ ഉത്സാഹം.

വാത്സല്യത്തിൽ കലർന്ന സ്നേഹത്തിന് അപ്പുറം മറ്റൊരു വികാരവും അവളോട് അവന് തോന്നുന്നില്ല. ഉള്ള് മുഴുവൻ അവളോട് ഉള്ള സ്നേഹത്താൽ നിറഞ്ഞു നില്ക്കുകയാണ്. ഇത്രമേൽ ഒന്നിനെ താൻ തീവ്രമായി ഇതിനു മുൻപ് സ്നേഹിച്ചിട്ടുണ്ടോ എന്ന് ചോദിച്ചാൽ മറുപടി ഇല്ല. പണ്ടേതോ ബുക്കിൽ വായിച്ചിട്ടുണ്ട് പ്രണയം ജന്മാന്തരങ്ങളുടെ അന്വേഷണം ആണ് എന്ന് അത് സത്യം ആണ് എന്ന് തോന്നിയത് ഇവളെ കണ്ട ശേഷം ആണ്. അവൻ ചിരിയോടെ അവളുടെ കൈകൾക്ക് മുകളിൽ കൈകൾ വച്ചു.

അവൻ നേരെ പോയത് ഒരു റസ്റ്റ്റന്റിലേക്ക് ആണ്. അവൾ കഴിക്കാൻ ഒന്നും വേണ്ടന്ന് പറഞ്ഞപ്പോൾ താൻ ഒന്നും കഴിച്ചില്ല എന്നും തനിക്ക് വേണ്ടി ഒരു കമ്പനി തരാനും പറഞ്ഞു അവൻ നിർബന്ധിച്ചു. അവൾ പോകുന്നതിനു മുൻപ് എന്തോ കഴിച്ചത് ആണ് എന്ന് അവന് ഓർത്തു. അവിടെ ചെന്നിട്ടു ഒന്നും കഴിച്ചു കാണില്ല. ഇനി വൈകുന്നേരം മാത്രമേ കഴിക്കാൻ പറ്റു, അതൊക്കെ ഓർത്താണ് അവൻ വിശപ്പില്ല എങ്കിൽ പോലും അവളെ കഴിപ്പിക്കാം എന്ന് കരുതി ഹോട്ടലിൽ കയറിയത്.

എന്താണ് കഴിക്കാൻ വേണ്ടത് എന്ന് അവൻ തിരക്കിയപ്പോൾ ബിരിയാണി അല്ലാതെ അവരുടെ മെനുവിൽ ഉള്ള ഒരു ഭക്ഷണവും അവൾ കഴിച്ചിട്ടു പോലും ഇല്ല, അവനോട് എന്ത് പറയും എന്ന് അറിയാതെ അവൾ നിസ്സഹായതയോടെ അവനെ നോക്കി. ആ നോട്ടത്തിന്റെ അർത്ഥം മനസിലായത് കൊണ്ട് അവൻ തന്നെ ആണ് ഓർഡർ പറഞ്ഞത്. മരിയയ്ക്ക് പേരു പോലും അറിയാത്ത എന്തൊക്കെയോ വിഭവങ്ങൾ മുന്നിൽ എത്തി. ഓരോന്നും അവളുടെ പ്ളേറ്റിലേക്ക് ശ്രദ്ധയോടെ വച്ചു കൊടുക്കുന്നവനെ അത്ഭുതത്തോട് അവൾ നോക്കി. അവന് അവളോട് ഉള്ള സ്നേഹത്തിൽ കരുതലിന്റെ സ്പർശം നിറഞ്ഞു. അത്ഭുതത്തോടെ അവന്റെ മുഖത്തേക്ക് നോക്കുന്ന പെണ്ണൊരുത്തിയെ നോക്കിയവൻ ചോദിച്ചു

“എന്തേ വാരി തരണോ..?

കുസൃതിയോടെ പറയുന്നവനെ കാണെ അവളുടെ മുഖം നാണത്താൽ ചുവന്നു

“മുഖം ഈ തക്കാളി തോൽക്കും നിലയിൽ എത്താൻ മാത്രം ഞാനെന്ത് പറഞ്ഞെന്റെ മറിയാമ്മേ..? നീ ഇങ്ങനെ പബ്ലിക്ക് ആയിട്ട് മുഖം ഇടയ്ക്ക് ചുവപ്പിച്ചു എന്റെ കണ്ട്രോൾ കളയല്ലേ..

അവളുടെ മുഖത്തേക്ക് നോക്കിയവൻ പറഞ്ഞപ്പോൾ അവൾ അറിയാതെ ചിരിച്ചു പോയി,

“കഴിക്ക്

ഇരു കണ്ണുകളും ചിമ്മി കാണിച്ചവൻ പറഞ്ഞു. ഒപ്പം തന്നെ തന്റെ പ്ളേറ്റിൽ നിന്നും ഒരു ചപ്പാത്തി കറിയിൽ മുക്കി അവളുടെ വായിലേക്ക് നീട്ടി. ഒരു നിമിഷം അല്പം ചമ്മൽ തോന്നി എങ്കിലും ആരും തങ്ങളെ ശ്രെദ്ധിക്കുന്നില്ല എന്ന് മനസിലായപ്പോൾ അവൾ അത് സന്തോഷം പൂർവ്വം വാങ്ങി.

കഴിച്ചു കഴിഞ്ഞതും ഇരുവരും മാളിലേക്ക് ആണ് പോയത്. അവളെ കൊണ്ട് അവൻ നേരെ ഒരു ടെക്സ്റ്റൽ ഷോപ്പിൽ കയറി. കാര്യം മനസിലാകാതെ അവൾ അവനെ നോക്കി.

” നിനക്ക് നല്ല കുറച്ച് ഡ്രെസ് എടുക്ക്,

അവൻ പറഞ്ഞു

“അയ്യോ വേണ്ട, ഇപ്പോൾ ഒരുപാട് ഉണ്ട്.

അവൾ മടിച്ചു

“നിന്നോട് ഞാൻ വേണോന്ന് അല്ലല്ലോ ചോദിച്ചത് എടുക്കാൻ അല്ലേ പറഞ്ഞത്, പോയി നോക്കി എടുക്ക്.

അവൻ പറഞ്ഞപ്പോൾ അവൾ മടിച്ചു കുർത്തയും സൽവാറും ഒക്കെ നോക്കി. സൽവാർ സെറ്റ് ഒക്കെ തുടങ്ങുന്നത് തന്നെ 3000 രൂപയിൽ ആണ്. അവൾക്ക് വില കണ്ടു ഭയം തോന്നി. വില കുറഞ്ഞത് നോക്കി പോയിട്ട് ഒന്നും കാണുന്നില്ല. അപ്പോഴേക്കും സോളമൻ എത്തി.

“ഇതുവരെ ഒന്നുപോലും എടുത്തില്ലേ.?

“അത് പിന്നെ…. എല്ലാത്തിനും ഭയങ്കര വിലയാ, നമ്മുക്ക് ചെറിയ ഷോപ്പിൽ വല്ലോം പോകാം.

അവൻ അവളെ അല്പം ദേഷ്യത്തോടെ നോക്കി

“വില നോക്കാൻ ഞാൻ പറഞ്ഞോ.,? നിനക്ക് ഇഷ്ടം ആയത് നോക്കി എടുക്ക് കൊച്ചേ

അവൻ പറഞ്ഞു, അവൾ മടിച്ചു നിന്നപ്പോൾ അവൾക്ക് ചേരുന്നത് എന്ന് തോന്നുന്ന കുറച്ച് ഡ്രസ്സ്‌ അവൻ തന്നെ സെലക്ട്‌ ചെയ്തു. അവൾ സാധാരണ ഉപയോഗിക്കുന്നതിൽ നിന്നും വ്യത്യാസ്തമായ എന്നാൽ ഒട്ടും മോശം അല്ലാത്ത ടൈപ്പ് അല്പം മോഡേൺ വസ്ത്രങ്ങൾ ആയിരുന്നു അത്. അവൾക്ക് ഇണങ്ങുന്നുണ്ടോ എന്ന് അവളുടെ ശരീരത്തിൽ വച്ചു നോക്കിയാണ് അവൻ അതൊക്കെ എടുത്തത്.

“വേറെ വല്ലോം വേണോ.?

അഞ്ചാറു ഡ്രസ്സ്‌ വാങ്ങിയിട്ട് പിന്നേം ചോദിക്കുന്നവനെ അത്ഭുതത്തോടെ അവൾ നോക്കി അവൾ വേണ്ടന്ന് ചുമൽ കൂച്ചി. ബില്ലിംഗ് സെക്ഷൻ എത്തിയപ്പോൾ 20000 രൂപയ്ക്ക് മുകളിൽ ആണ് ബില്ല്. അവൾ വീണ്ടും അമ്പരപ്പോടെ അവനെ നോക്കി. അവനൊരു കൂസലും ഇല്ലാത്ത നിൽക്കുക ആണ്. പാക്ക് ചെയ്ത കവറുകൾ അവളുടെ കയ്യിൽ കൊടുത്തു സെയിൽസ് ഗേൾ അതും വാങ്ങി പുറത്തിറങ്ങിയ ഉടനെ അവന്റെ മുഖത്തേക്ക് നോക്കിയവൾ പറഞ്ഞു

“ഇപ്പോൾ ഇത്രയും പൈസ കളയണ്ടാരുന്നു, എനിക്ക് ഡ്രസ്സ്‌ ഉണ്ടാരുന്നു

“അങ്ങനെ വല്ലോരും ഉപയോഗിച്ച് ഡ്രസ്സ്‌ ഇനി നീ ഇടേണ്ട

അവൻ പറഞ്ഞപ്പോൾ അവൾ അത്ഭുതത്തോടെ അവനെ നോക്കി

“അന്ന് ആനി ആന്റി തന്ന ഡ്രസ്സ്‌ ഒക്കെ അല്ലേ നീ ഉപയോഗിക്കുന്നെ, അന്നേ ഞാൻ ഓർത്തത് ആണ് നിനക്ക് നല്ല ഡ്രസ്സ്‌ വാങ്ങിക്കണം എന്ന്, പിന്നെ നീ വീട്ടിൽ നിൽകുമ്പോൾ ഡ്രസ്സ്‌ വാങ്ങി തന്നാൽ മമ്മ കാണില്ലേ.? പിന്നെ ചോദ്യങ്ങൾ വരും അതുകൊണ്ടാ അത് വേണ്ടന്ന് വച്ചത്

അവൾ അവനെ അത്ഭുതപൂർവ്വം നോക്കി..കാത്തിരിക്കൂ………

മുന്നത്തെ പാർട്ടുകൾ വായിക്കാൻ ഇവിടെ ക്ലിക്ക് ചെയ്യുക…