🎶 സോളമന്റെ ഉത്തമഗീതം 🎶❤️: ഭാഗം 71

രചന: റിൻസി പ്രിൻസ്‌

അവൻ അവളെ ഇറുകെ പുണർന്നാണ് നിന്നത്. പെട്ടെന്നാണ് വാതിൽ തുറന്ന് അമലയും സണ്ണിയും അകത്തേക്ക് വന്നത്. പരസ്പരം പുണർന്നു നിൽക്കുന്ന രണ്ടു പേരും ഇരുവരും അകത്തേക്ക് വന്നത് പോലും അറിഞ്ഞിരുന്നില്ല. അവർ മറ്റൊരു ലോകത്തിൽ ആയിരുന്നു. മുറിയിലേക്ക് കയറാൻ വന്ന ജീനയും അവൾക്ക് പുറകിൽ നിന്ന ജോണിയും ഈ കാഴ്ച കണ്ടു ഞെട്ടി

“സോളമാ….

ദേഷ്യത്തോടെയായിരുന്നു അമല വിളിച്ചത്.. പെട്ടെന്ന് സ്ഥലകാലബോധം വീണ്ടെടുത്ത് രണ്ടുപേരും ഞെട്ടി പിടഞ്ഞ് നോക്കി..

മുൻപിൽ കണ്ട കാഴ്ച മരിയയേ തകർത്ത് കളഞ്ഞിരുന്നു. അവൾ പെട്ടന്ന് അവനിൽ നിന്ന് അകന്നു മാറി, ഈ നിമിഷം മരിച്ചു പോയിരുന്നുവെങ്കിൽ എന്ന് അവൾ ആഗ്രഹിച്ചു.!

അമലയുടെ മുഖത്തെ ഭാവം അവൾക്ക് മനസ്സിലാക്കാൻ സാധിക്കുന്നുണ്ടായിരുന്നില്ല. സോളമനും എന്ത് ചെയ്യണമെന്ന് അറിയാതെ നിൽക്കുകയാണ്. തന്റെ അശ്രദ്ധകൊണ്ട് സംഭവിച്ചു പോയതാണ്..

“എന്താടാ ഇത്..!

ദേഷ്യത്തോടെ അമല അവന്റെ അരികിലേക്ക് വന്നുകൊണ്ട് ചോദിച്ചു…

സണ്ണി ഞെട്ടി തരിച്ചു നിൽക്കുകയാണ്. എന്ത് പറയണം എന്ന് പോലും അയാൾക്ക് അറിയില്ല. പുറത്തു നിൽക്കുന്ന ജീനയും ജോണിയും പരസ്പരം ദേഷ്യം കടിച്ചമർത്തി..

” മമ്മ… അത്

സോളമൻ വാക്കുകൾ കിട്ടാതെ നിന്നു

” സ്വന്തം മോളെ പോലെയാ ഞാൻ നിന്നെ സ്നേഹിച്ചത്. അല്ലേ..? എന്നിട്ട് എന്നോട് ഇങ്ങനെ ചെയ്യണമായിരുന്നോ.?

മരിയുടെ മുൻപിൽ വന്നു നിന്ന് അമലേ അത് ചോദിച്ചപ്പോൾ അവൾ തകർന്നു പോയിരുന്നു..

ഈ സ്നേഹബന്ധം തുടങ്ങിയ കാലം മുതൽ അഭിമുഖീകരിക്കേണ്ടി വരുമെന്ന് പ്രതീക്ഷിച്ച ചോദ്യമാണിത്. അമലയുടെ നിറഞ്ഞ കണ്ണുകൾ കൂടി കണ്ടതോടെ അവളുടെ സകല ഊർജ്ജവും ചോർന്നുപോയി.

അവൾ കരഞ്ഞുകൊണ്ട് അടുക്കളയിൽ നിന്നും പുറത്തേക്ക് ഓടിയപ്പോൾ സണ്ണിയോട് വിവരം പറഞ്ഞു അവളെ ആശ്വസിപ്പിക്കുവാനായി വന്നതാണ് തങ്ങൾ, അപ്പോഴാണ് ഈ കാഴ്ച കാണുന്നത്. അമല ഇപ്പോഴും ആ കാഴ്ച നൽകിയ അമ്പരപ്പിൽ തന്നെയായിരുന്നു..

ദേഷ്യത്തോടെ അവൾക്ക് അരികിലേക്ക് വന്നുകൊണ്ട് ജോണി മരിയയുടെ കയ്യിൽ പിടിച്ചു,

” മാനം കെട്ടവളേ നാണം കെടുത്തിയല്ലോടി നീ… തള്ളയുടെ കൊണം അതേപോലെ കാണിച്ചു വച്ചു..

അല്ലേ ദേഷ്യത്തോടെ അവളെ അടിക്കുവാൻ അയാൾ കൈ ഉയർത്തിയതും ആ കൈയ്യ് സോളമൻ തടഞ്ഞിരുന്നു….
അവന്റെ ആ പ്രവർത്തി കണ്ട് അമ്പരപ്പോടെ ജീന നോക്കി.. അപ്പോഴേക്കും അവിടേക്ക് വല്യമ്മച്ചി എത്തി.

കാര്യം എന്താണെന്ന് അവർക്ക് മനസ്സിലായില്ല.

” അവളുടെ ശരീരത്തിൽ എങ്ങാനും താൻ തൊട്ടാൽ വിവരം അറിയും.

ദേഷ്യത്തോടെ സോളമൻ പറഞ്ഞു.

” നിങ്ങൾക്കൊക്കെ എന്താ അറിയേണ്ടത്.? അവളോട് ചോദിക്കേണ്ട എന്നോട് ചോദിക്ക്…

അവളുടെ തോളിൽ കൂടി കയ്യിട്ടു അവളെ തന്നോട് ചേർത്തു പിടിച്ച് സോളമൻ പറഞ്ഞു.

അവന്റെ ആ പ്രവർത്തി ജീനയെ നന്നായി ദേഷ്യം പിടിപ്പിച്ചിരുന്നു.

” ഇവളെ ഞാൻ സ്നേഹിക്കുന്നു. ഞാൻ കല്യാണം കഴിക്കാൻ തീരുമാനിച്ചു. എന്റെ പെണ്ണ് ആണ്, ആ അധികാരത്തിൽ തന്നെയാണ് ഞാൻ അവളെ ചേർത്തുപിടിച്ചത്. ഇനി ഇവിടെ കൂടിയിരിക്കുന്ന ആർക്കെങ്കിലും കൂടുതൽ എന്തെങ്കിലും അറിയണമോ.?

സോളമന്റെ ചോദ്യത്തിൽ വല്യമ്മച്ചിയും അമ്പരന്നു പോയിരുന്നു.

” ഞാൻ പ്രതീക്ഷിച്ചത് പോലെ തന്നെ സംഭവിച്ചു. നീ ഇത് അനുഭവിക്കണം

ദേഷ്യത്തോടെ അവർ അമലയുടെ മുഖത്തേക്ക് നോക്കി പറഞ്ഞു…..

” ഈ പിഴച്ചവളെ ഈ വീട്ടിൽ കൂട്ടിക്കൊണ്ടു വന്നപ്പോഴേ ഞാൻ നിന്നോട് പറഞ്ഞതാണ് ഇങ്ങനെ സംഭവിക്കുമെന്ന്… ഇപ്പോൾ എന്തായി..? അനുഭവിച്ചോ

” ഇനി വല്ല്യമ്മച്ചിയുടെ വായിന്ന് ഇവളെ പറ്റി അങ്ങനെ ഒരു അക്ഷരം വീണാൽ ഞാൻ പ്രതികരിക്കുന്നത് എങ്ങനെയായിരിക്കും എന്ന് പറയാൻ പറ്റില്ല…

വല്യമ്മച്ചിയുടെ മുഖത്തേക്ക് നോക്കി ദേഷ്യത്തോടെ സോളമൻ പറഞ്ഞു.

അവന്റെ ദേഷ്യം കണ്ട് അവര് നന്നേ ഞെട്ടിപ്പോയിരുന്നു. എപ്പോഴും ശാന്തനായി മാത്രം കാണുന്ന അവനിൽ നിന്നും ഇതുവരെ ആരും കാണാത്ത ഒരു ഭാവമായിരുന്നു എല്ലാവരും കണ്ടത്.

” പലതവണ അവള് ഇഷ്ടം അല്ല എന്ന് പറഞ്ഞു. അവളുടെ പിന്നാലെ നടന്ന് ഇതിലേക്ക് അവളെ വലിച്ചിട്ടതും ഞാൻ ആണ്. എല്ലാ തെറ്റും എന്റെ ഭാഗത്ത്. നിങ്ങൾക്ക് ആർക്കുവേണമെങ്കിലും എന്നോട് സംസാരിക്കാം. എന്നോട് ചോദിക്കാം, ഇതിൽ തീർപ്പ് കൽപ്പിക്കേണ്ടത് ഞാനാണ്. ഒരു 100 തവണ അവൾ എന്നോട് പറഞ്ഞു. ഈ ബന്ധത്തിന് താല്പര്യം ഇല്ലന്ന്. അവളുടെ പിന്നാലെ നടന്ന് ശല്ല്യം ചെയ്തു അവളെ ഇതിലേക്ക് വലിച്ചിട്ടത് ഞാൻ മാത്രമാണ്. ഇനി ഒരാളും അവളെപ്പറ്റി മോശമായി പറയണ്ട. അവൾക്ക് ഇതിൽ ഒരു പങ്കുമില്ല.

സോളമൻ പറഞ്ഞപ്പോഴും മരിയ കരഞ്ഞു കൊണ്ടിരിക്കുകയാണ്.

” എനിക്ക് ഇവളെ ഇഷ്ടമാണ്, അവൾക്ക് എന്നെയും അതിനപ്പുറം ഇവിടെ മറ്റാർക്കാണ് കുഴപ്പം.?

ദേഷ്യത്തോടെ സോളമൻ ചോദിച്ചു.

” എനിക്കാണ് കുഴപ്പം.

മുന്നിൽ വന്ന അമല പറഞ്ഞപ്പോൾ സോളമൻ അമ്പരന്നു പോയിരുന്നു..

” മമ്മ…..

അവൻ വിളിച്ചു

” ഇനി എന്നെ നീ അങ്ങനെ വിളിക്കരുത്. ഇത്രകാലം നീ രണ്ടുംകൂടി എന്നേ വിഡ്ഢി ആക്കുക ആയിരുന്നില്ലേ..?

” സ്വന്തം മോളെ പോലെയല്ല നിന്നെ ഞാൻ സ്നേഹിച്ചത് എന്നിട്ട് എന്നോട് ഇങ്ങനെ കാണിക്കാൻ നിനക്ക് എങ്ങനെ തോന്നി..?

അമല മരിയയുടെ മുഖത്തേക്ക് നോക്കി ചോദിച്ചപ്പോൾ കരഞ്ഞുകൊണ്ട് അവൾ അവരുടെ കാലിൽ പിടിച്ചിരുന്നു..

ദേഷ്യത്തോടെ അമല തന്റെ കാല് വലിച്ചു. സോളമനത് കണ്ട് സങ്കടം സഹിക്കാൻ സാധിച്ചില്ല.

” മമ്മ കുറ്റം അവളുടെ അല്ല, ഞാൻ പറഞ്ഞില്ലേ ഞാനാണ് അവളുടെ പിന്നാലെ നടന്നതെന്ന്.

സോളമൻ പറഞ്ഞു

” എനിക്ക് നിന്നോട് ഒന്നും സംസാരിക്കാൻ ഇല്ലന്ന് ഞാൻ പറഞ്ഞു.എനിക്ക് പറയാനുള്ളത് അവളോട് ആണ്.

അമലയേ ഇത്രയും ദേഷ്യത്തോടെ ആരും ഇതുവരെയും കണ്ടിട്ടുണ്ടായിരുന്നില്ല.

സണ്ണി ഒന്നും മിണ്ടാതെ തലയ്ക്ക് കൈയും കൊടുത്തു നിൽക്കുകയാണ്.

ജോണിയാണെങ്കിൽ തന്റെ പദ്ധതികളൊക്കെ നഷ്ടപ്പെട്ടുപോയതിന്റെ ദേഷ്യത്തിൽ തന്നെ നോക്കി നിൽക്കുന്നു.

” നിന്റെ പഠിത്തവും പപ്പടവും ഒക്കെ മതി, നല്ല സ്നേഹത്തിൽ ഇരിക്കുന്ന മനുഷ്യരെ പിണക്കാൻ മാത്രേ നിന്റെ പഠിത്തം കൊണ്ട് പറ്റുവെന്ന് ഞാൻ നിന്റെ തള്ളയോട് അന്നേ പറഞ്ഞതാ. അവൾ അന്ന് കേട്ടില്ല. ഇപ്പൊ തന്നെ ഇറങ്ങിക്കോ ഇനി പഠിത്തം എന്നും പറഞ്ഞുകൊണ്ട് തള്ളയും മോളും കൂടെ വാ. ഞാൻ പറയാം, പൈസയും കളഞ്ഞു അസത്ത്

ദേഷ്യത്തോടെ അതും പറഞ്ഞു ജോണി അവളുടെ കൈകളിൽ പിടിച്ചു.

ബലമായി തന്നെ സോളമൻ അയാളുടെ കൈ വിടുവിച്ചു

” എവിടേക്ക താൻ ഇവളെ കൊണ്ടുപോകുന്നത്..?ഇവളുടെ സമ്മതമില്ലാതെ ഇവിടെ നിന്ന് ആരും അവളെ കൊണ്ടുപോകില്ല.

സോളമൻ പറഞ്ഞു

” അതു പറയാൻ നീ ആരാ..?

ദേഷ്യത്തോടെ ജോണി അവനോട് ചോദിച്ചു.

” നീ കെട്ടിട്ടൊന്നും ഇല്ലല്ലോ. ഇവളുടെ കാര്യം നോക്കാൻ എനിക്കറിയാം.

” എങ്കിൽ താൻ ഇവിടെ നിന്ന് കൊണ്ടുപോകുന്നത് എനിക്ക് കാണണമല്ലോ..

അവളുടെ മുൻപിൽ കയറി നിന്നുകൊണ്ട് സോളമൻ ജോണിയെ വെല്ലുവിളിച്ചു.

” ഞാൻ എവിടെയാണോ അവിടെ ആയിരിക്കും ഇവൾ. ഇവിടെ എന്റെ കൂടെ ജീവിക്കും അവൾ

സോളമൻ ജോണിയുടെ മുഖത്തേക്ക് നോക്കി പറഞ്ഞു.

” ഇവിടെയോ..? ഇവിടെ പറ്റില്ല. ഇത് എന്റെ ഭർത്താവും ഞാനും കൂടി കഷ്ടപ്പെട്ടുണ്ടാക്കിയ വീട്. ഇവിടെ ആരൊക്കെ താമസിക്കണമെന്ന് ഞങ്ങൾ തീരുമാനിക്കും.ഇവിടെ ഇവളെ നിർത്താൻ പറ്റില്ല..

മറുപടി പറഞ്ഞത് അമലയായിരുന്നു.

അമലയുടെ ആ വെളിപ്പെടുത്തലിൽ മരിയയും സണ്ണിയും സോളമനും ഒക്കെ ഞെട്ടിപ്പോയിരുന്നു….കാത്തിരിക്കൂ………

മുന്നത്തെ പാർട്ടുകൾ വായിക്കാൻ ഇവിടെ ക്ലിക്ക് ചെയ്യുക…