🎶 സോളമന്റെ ഉത്തമഗീതം 🎶❤️: ഭാഗം 76

രചന: റിൻസി പ്രിൻസ്‌

നമ്മൾ പണ്ടേ തീരുമാനിച്ചതല്ലേ അവന്റെ ഇഷ്ടത്തിന് അവന്റെ ജീവിതം വിട്ടുകൊടുക്കും എന്ന്. അവനാണ് ജീവിക്കേണ്ടത് നമ്മുടെ മോൻ കാരണം ഒരു പാവപ്പെട്ട പെൺകുട്ടിയുടെ സ്വപ്നങ്ങൾക്ക് തിളക്കം ഉണ്ടാവുന്നെങ്കിൽ അതല്ലേ വലിയ കാര്യം.? നീയായിട്ട് വാശി പിടിക്കണ്ട, നമ്മുക്ക് അത് നടത്തി കൊടുക്കാടി

സണ്ണി പറഞ്ഞപ്പോൾ അമല അയാളെ തന്നെ സൂക്ഷിച്ചു നോക്കി

” നിങ്ങൾ എന്തു ഭ്രാന്തായി പറയുന്നത്.? സൊളമനെ കുറിച്ച് എല്ലാം അറിഞ്ഞിട്ട് തന്നെയാണോ നിങ്ങൾ ഈ സംസാരിക്കുന്നത്. നിങ്ങൾ ഉദ്ദേശിക്കുന്ന പോലെ ജീനയുടെ കാര്യവും മരിയയുടെ കാര്യം തമ്മിൽ എനിക്ക് വ്യത്യാസം വന്നത് എന്തുകൊണ്ടാണെന്ന് അറിയോ.? നമ്മുടെ മോന്റെ സ്വഭാവവും ഓർത്തത് കൊണ്ട്. പണ്ടുമുതലേ ആഗ്രഹിച്ചതെന്തും നേടിയെടുക്കണം എന്നുള്ള ഒരു താല്പര്യം അവനുണ്ട്. പക്ഷേ അത് കയ്യിൽ കിട്ടി കഴിയുമ്പോൾ അവന്റെ ഭ്രമം തീരും. ജീനയുടെ കല്യാണം ജോണി ഇങ്ങോട്ട് ആലോചിച്ചതാ. അവനെപ്പറ്റി നമുക്ക് ജോണിയോട് എല്ലാ കാര്യങ്ങളും തുറന്നു പറയാം. ചിലപ്പോ അയാൾ സമ്മതിക്കും ചിലപ്പോൾ സമ്മതിക്കില്ല. സ്വാഭാവികമായ കാര്യം.

ഇനിയിപ്പോ അയാൾ സമ്മതിച്ചാൽ തന്നെ അവൾക്കൊരു പ്രശ്നം വന്നാൽ അവളുടെ അപ്പനും അമ്മയും ഒക്കെ അവളുടെ കൂടെ നിൽക്കും അവളെ ചേർത്തുപിടിച്ചുകൊണ്ട്. പക്ഷേ മരിയയുടെ അവസ്ഥ അങ്ങനെയാണോ.? നമ്മുടെ മോന്റെ ഭാഗത്തു നിന്ന് എന്തെങ്കിലും താല്പര്യക്കുറവ് ഉണ്ടായാൽ അവളെ ഒന്ന് ചേർത്ത് പിടിക്കാൻ ആരുണ്ട്.? ഇപ്പോൾ അവൾക്ക് ഒറ്റയ്ക്കുള്ള ജീവിതത്തെപ്പറ്റി മാത്രം ചിന്തിച്ചാൽ മതി. ബെറ്റിയെ പോലെ അവളുടെ കയ്യിൽ ഒരു കുഞ്ഞും കൂടിയായാൽ അവൾ എന്ത് ചെയ്യും.? എങ്ങനെ ജീവിക്കും.? ഞാനും സണ്ണിച്ചായനും ഒക്കെ എത്ര കാലം ഇരിക്കും. നമ്മുടെ കാലം കഴിഞ്ഞാലും ജീവിക്കേണ്ടവരല്ലേ.? മരിയയേ പോലൊരു പെൺകുട്ടിയെ അവൻ ഇഷ്ടപ്പെടുന്നു എന്ന് എനിക്ക് അംഗീകരിക്കാൻ പോലും സാധിക്കുന്നില്ല.

അവൻ ഇഷ്ടപ്പെടാൻ മാത്രം എന്ത് പ്രത്യേകതയാ അവൾക്കുള്ളത്. ഇത് അവന് അവളോട് തോന്നുന്ന വെറും ഒരു ഭ്രമം മാത്രമാണ് ഇച്ചായ

അമല പറഞ്ഞപ്പോൾ താൻ ചിന്തിച്ചത് പോലെ തന്നെയാണ് അവളും ചിന്തിച്ചത് എന്ന് അയാൾക്ക് മനസ്സിലായി.

” കുറച്ചു മുൻപ് ആയിരുന്നെങ്കിൽ നീ പറഞ്ഞതുപോലെ ഞാനും ചിന്തിച്ചേനെ അത് തന്നെയാണ് സത്യം എന്ന് ഞാൻ അംഗീകരിക്കുകയും ചെയ്തേനെ. പക്ഷേ ഇപ്പോൾ ഞാൻ പറയുന്നു അതല്ല സത്യം. അവന് മറ്റാരെക്കാളും ഈ ലോകത്ത് വലുത് അവൾ തന്നെയാണ്.! അവളോട് അവന് തോന്നിയത് നീ വിചാരിക്കുന്നത് പോലെ ഒരു ഭ്രമമല്ല

ഇച്ചായ അതൊക്കെ വെറുതെ പറയുവാ അവൻ

അങ്ങനെയല്ല എനിക്ക് ഉറപ്പായതുകൊണ്ട് അല്ലേ ഞാൻ പറയുന്നത്. അതോർത്ത് നീ പേടിക്കണ്ട അമല..

വിളിച്ചപ്പോൾ അയാൾ കണ്ണുകൾ അടച്ച് കാണിച്ചു

” നമുക്കിത് ഉറപ്പിക്കാം ഇതിൽ നീ പേടിക്കേണ്ട, അവൻ കാരണം മരിയയ്ക്ക് ഒരു പ്രേശ്നം ഉണ്ടാവില്ല. അവന്റെ കണ്ണുകളിൽ ഞാൻ കണ്ടതാ അവളോടുള്ള സ്നേഹം. അത് വെറുതെയല്ല. ഒരു മനുഷ്യന്റെ മോശം സ്വഭാവങ്ങളെ അടിമുടി മാറ്റാൻ ചില സാഹചര്യങ്ങളിൽ എങ്കിലും പ്രണയത്തിന് സാധിക്കാറുണ്ട്. ഒരുപക്ഷേ ഇതൊക്കെ നല്ലതിന് ആയിരിക്കുമല്ലേ, അവൻ നന്നാവാൻ വേണ്ടി ആയിരിക്കും മരിയ അവന്റെ ജീവിതത്തിലേക്ക് കടന്നുവന്നത്. അങ്ങനെ വിശ്വസിച്ചാൽ മതി നമ്മുക്ക്

അയാൾ പറഞ്ഞപ്പോൾ അവർ അയാളെ ഒന്ന് നോക്കി.

കാര്യം ജോണിയോട് പറയണ്ടേ..? ഇച്ചായൻ പറഞ്ഞാൽ മതി,

പിന്നെ ഒരു കാര്യം കൂടി നമ്മൾ വിവാഹത്തിന് സമ്മതിച്ചാലും നീ ഇപ്പോൾ നിൽക്കുന്ന ഈ നിലപാട് തന്നെ സോളമനോട് തുടർന്നാൽ മതി.

മനസ്സിലാവാതെ അവർ അവന്റെ മുഖത്തേക്ക് നോക്കി.

നിന്നോടുള്ള വാശിയുടെ പുറത്ത് എങ്കിലും അവനവന്റെ സ്നേഹം തെളിയിക്കാൻ ശ്രമിക്കും. മാത്രമല്ല ആ കുട്ടിയുടെ പഠിത്തവും നിന്ന് പോകാൻ പാടില്ല. നിന്റെ ഈ നിലപാട് കൂടുതൽ ഗുണകരം ആവുകയുള്ളൂ

അയാൾ മുറിയിൽ നിന്നും ഇറങ്ങിപ്പോയപ്പോൾ അമല കുറച്ചുനേരം മുറിയിൽ തന്നെ കിടന്നു

സണ്ണി പുറത്തേക്ക് വന്നപ്പോൾ ജോണിയും ജീനയും പോകാനുള്ള തയ്യാറെടുപ്പിലാണ്

സണ്ണി എങ്ങനെ മാപ്പ് പറയണം എന്ന് എനിക്ക് അറിയില്ല എങ്കിലും അവൾക്കുവേണ്ടി ഞാൻ സണ്ണിയോട് മാപ്പ് ചോദിക്കുന്നു

നിങ്ങൾ ചെയ്ത വലിയൊരു ഉപകാരത്തിന് അവൾ ഇങ്ങനെ ഒരു പ്രതിഫലം നൽകുമെന്ന് ഞാനും പ്രതീക്ഷിച്ചിരുന്നില്ല

സാരമില്ല ജോണി നമ്മള് ആരും പ്രതീക്ഷിച്ച കാര്യങ്ങൾ ഒന്നുമല്ലല്ലോ നടന്നത്

പിന്നെ എന്റെ മോന്റെ സ്വഭാവം എനിക്ക് നന്നായി അറിയാവുന്നതുകൊണ്ട് എനിക്ക് വലിയ അത്ഭുതം തോന്നും ഈ കാര്യത്തിൽ തോന്നുന്നില്ല

മരിയയെ പോലെയുള്ള ഒരു പെൺകുട്ടി അവന്റെ വലയിൽ വീണു പോകാനുള്ള സാധ്യതയെ ഞാൻ കാണുന്നുള്ളൂ

മരിയ ന്യായീകരിച്ച് സണ്ണി പറഞ്ഞത് ജോണിക്കും ജീനയ്ക്കും ഇഷ്ടമായില്ല

അവരുടെ മുഖങ്ങളിൽ അത് ഉണ്ടായിരുന്നു

ഞാനും അമലയും കൂടി ഒരു കാര്യം തീരുമാനിച്ചു. അത് ജോണിയെ കൂടി അറിയിക്കാമെന്ന് കരുതി.. ഏതായാലും ജോണിയും കൂടി ഇവിടെയുള്ള സ്ഥിതിക്ക് അത് പറയുന്നതല്ലേ നല്ലത്.

എന്ത്..?

ഒരു അപകടം മണത്തു എങ്കിലും ജോണി അയാളുടെ മുഖത്തേക്ക് നോക്കിക്കൊണ്ട് ചോദിച്ചു..

മരിയയും സോളമനും തമ്മിലുള്ള വിവാഹം നടത്തണമെന്ന് ഞങ്ങൾ തീരുമാനിച്ചു…

സണ്ണി അതു പറഞ്ഞതും ജോണിയുടെ മുഖം വലഞ്ഞുമുറുകി.

ഒപ്പം ജീനക്കും ഒന്ന് പൊട്ടിക്കരയണം എന്ന് തോന്നിയിരുന്നു..
മനസ്സിലാവാതെ ജോണി വീണ്ടും സണ്ണിയുടെ മുഖത്തേക്ക് നോക്കി.

” വിവാഹമോ ..?

സണ്ണി ഞങ്ങൾ അവളെ പറഞ്ഞു മനസ്സിലാക്കികോളാം അതിനായി നിങ്ങൾ ത്യാഗം ഒന്നും സഹിക്കേണ്ട.

ജോണി എതിർക്കാൻ ശ്രമിച്ചു.

ഇതൊരു ത്യാഗം ഒന്നുമല്ല എന്നെ സംബന്ധിച്ചിടത്തോളം ഞങ്ങളുടെ മോന് കിട്ടുന്ന ഏറ്റവും നല്ല വിവാഹാലോചനയാണ് മരിയുടേത്. അവളെപ്പോലൊരു നല്ല പെങ്കൊച്ചിനെ എന്റെ മകൻ അർഹിക്കുന്നു പോലുമില്ല.

സണ്ണി അങ്ങനെ പറഞ്ഞപ്പോൾ ജീനക്ക് ദേഷ്യം തോന്നിയിരുന്നു

ജോണി ഏതായാലും ബെറ്റിയോടുകൂടി ഈ വിവരം ഒന്ന് പറ,

അത് നടക്കില്ല സണ്ണി, അവൾക്ക് വേണ്ടി കുറച്ച് അധികം പൈസ ഒക്കെ മുടക്കി വച്ചിരിക്കുകയാണ്. ഈ നേഴ്സിങ്ങിനും ഒക്കെയായിട്ട്.. അതുകൊണ്ട് ഇപ്പോൾ ഉടനെ അവളുടെ കല്യാണം നടത്താനൊന്നും ഞാൻ ഉദ്ദേശിച്ചിട്ടില്ല.

അവൾ പഠിച്ചു വിദേശത്ത് പോയി ജോലി ചെയ്തു കുറച്ചു പൈസ ഒക്കെ സമ്പാദിച്ചതിനുശേഷം മാത്രമേ അവളെ കെട്ടിക്കുന്ന കാര്യത്തിനെപ്പറ്റി ഞാൻ ആലോചിച്ചിട്ടുള്ളൂ. അതുകൊണ്ട് നിങ്ങൾ അങ്ങനെ ഒരു ചിന്തയിലേക്ക് പോകണ്ട.

അറുത്ത് മുറിച്ച് ജോണി പറഞ്ഞപ്പോൾ വല്ലാത്ത ഒരു അമ്പരപ്പ് തന്നെ സണ്ണിക്ക് തോന്നിയിരുന്നു. ഇയാൾ ഇത്രത്തോളം മോശമായ രീതിയിൽ ചിന്തിക്കുമെന്ന് അയാൾ പ്രതീക്ഷിച്ചില്ല

” എത്ര രൂപ ആണ് അവളുടെ നഴ്സിങ്ങിന് വേണ്ടി ജോണി ചെലവാക്കിയിരിക്കുന്നത്. ആ പൈസ ഞാൻ തന്നേക്കാം.

സണ്ണി അങ്ങനെ പറഞ്ഞപ്പോൾ ജോണി അമ്പരന്ന് പോയിരുന്നു. തന്റെ മകൾക്ക് കിട്ടാത്ത സൗഭാഗ്യം അങ്ങനെ അവൾക്ക് വേണ്ട എന്ന് അയാൾ തീരുമാനിച്ചത് ആയിരുന്നു.

” എനിക്കുവേണ്ടി ഒന്നുമല്ല അവൾക്ക് തന്നെ ജോലി ചെയ്ത് ജീവിക്കാൻ വേണ്ടിയാണ്

സണ്ണിയേ പിണക്കാൻ ജോണിക്കും മനസ്സ് വന്നില്ല.

” അവൾക്ക് ജോലി ചെയ്യാനും ജീവിക്കുവാനും ഉള്ള ചുറ്റുപാടൊക്കെ ഞങ്ങൾ ഉണ്ടാക്കി കൊടുത്തോളാം.
ജോണിയ്ക്ക് ഈ വിവാഹത്തിന് താല്പര്യക്കുറവ് ഇല്ലെങ്കിൽ ബെറ്റിയോട് സംസാരിച്ചിട്ട് അറിയിക്കു

സണ്ണി എല്ലാം തീരുമാനിച്ചു കഴിഞ്ഞു എന്ന് ജോണിക്ക് മനസ്സിലായി. ഇനി എതിർത്തിട്ട് കാര്യമില്ല. നിസ്സഹായമായി മകളെ അയാൾ ഒന്നു നോക്കി…കാത്തിരിക്കൂ………

മുന്നത്തെ പാർട്ടുകൾ വായിക്കാൻ ഇവിടെ ക്ലിക്ക് ചെയ്യുക…