കീവ്: റഷ്യയും യുക്രെയ്നും നൂറുകണക്കിന് തടവുകാരെ പരസ്പരം കൈമാറി. ഇരുരാജ്യങ്ങളും തമ്മിലുള്ള സംഘർഷം അയവുവരുത്തുന്നതിന്റെ ഭാഗമായി നടന്ന വലിയൊരു തടവുകാരുടെ കൈമാറ്റമാണിത്. മെയ് 16-ന് ഇസ്താംബുളിൽ നടന്ന ചർച്ചയിലാണ് ആയിരം യുദ്ധത്തടവുകാരെ വീതം കൈമാറാൻ ഇരുരാജ്യങ്ങളും തീരുമാനിച്ചത്. ഇതിന്റെ ആദ്യഘട്ടമായാണ് 390 പേരെ വീതം വിട്ടയച്ചത്.
അതേസമയം യുക്രെയ്ൻ തലസ്ഥാനമായ കീവിൽ ശനിയാഴ്ച പുലർച്ചെ റഷ്യയുടെ ഡ്രോൺ, മിസൈൽ ആക്രമണങ്ങൾ നടന്നു. ഈ ആക്രമണങ്ങളിൽ മൂന്ന് പേർ കൊല്ലപ്പെടുകയും നിരവധി പേർക്ക് പരിക്കേൽക്കുകയും ചെയ്തതായി റിപ്പോർട്ടുകളുണ്ട്. ആക്രമണത്തെത്തുടർന്ന് ജനങ്ങൾ ഭൂഗർഭ സബ്‌വേ സ്റ്റേഷനുകളിൽ അഭയം തേടി. തുടർച്ചയായ ആക്രമണങ്ങൾക്കിടയിലും തടവുകാരുടെ കൈമാറ്റം ശ്രദ്ധേയമായ നടപടിയായാണ് വിലയിരുത്തപ്പെടുന്നത്.
