ഇസ്രയേലിൽ വീണ്ടും ഡ്രോൺ ആക്രമണം നടത്തി ഇറാൻ; അഞ്ച് ഘട്ട മിസൈൽ വർഷണത്തിന് പിന്നാലെ
ടെൽ അവീവ്/ടെഹ്‌റാൻ: ഇസ്രയേൽ അതിർത്തിയിലേക്ക് അഞ്ച് ഘട്ടങ്ങളിലായി മിസൈൽ ആക്രമണങ്ങൾ നടത്തിയതിന് പിന്നാലെ ഇറാൻ ഡ്രോണുകൾ ഉപയോഗിച്ച് ഇസ്രയേൽ ഭൂപ്രദേശത്തേക്ക് കടന്നുകയറിയതായി റിപ്പോർട്ടുകൾ. ഷാഹെദ്-136 ഡ്രോണുകൾ ഉൾപ്പെടെയുള്ളവയാണ് ഇറാൻ ഇസ്രയേലിലേക്ക് അയച്ചത്. ഈ ഡ്രോണുകൾ വഹിക്കുന്ന സ്ഫോടകവസ്തുക്കൾ ചെറിയ സൈനിക താവളങ്ങളും കെട്ടിടങ്ങളും തകർക്കാൻ ശേഷിയുള്ളവയാണെന്ന് വിലയിരുത്തപ്പെടുന്നു.
വെള്ളിയാഴ്ച രാത്രിയാണ് ഇറാൻ്റെ ആദ്യ മിസൈൽ ആക്രമണം ആരംഭിച്ചത്. ഇത് പലസ്തീൻ അധിനിവേശ പ്രദേശങ്ങളായ വെസ്റ്റ് ബാങ്ക്, കിഴക്കൻ ജറുസലേം, ഗോലാൻ കുന്നുകൾ എന്നിവിടങ്ങളിലേക്കും ഇസ്രയേലിൻ്റെ പ്രധാന നഗരങ്ങളായ ടെൽ അവീവ്, ജറുസലേം എന്നിവിടങ്ങളിലേക്കും നീണ്ടു. ആക്രമണത്തിൽ മൂന്ന് പേർ മരിക്കുകയും ഡസൻ കണക്കിന് പേർക്ക് പരിക്കേൽക്കുകയും ചെയ്തതായി ഇസ്രയേൽ സ്ഥിരീകരിച്ചു. ഇസ്രയേലിലെ ഷെബാ മെഡിക്കൽ സെന്ററിൽ മാത്രം 43 പേർ ചികിത്സ തേടിയിരുന്നു.
ഇസ്രയേലിന്റെ ആണവ കേന്ദ്രങ്ങളിലും സൈനിക സ്ഥാപനങ്ങളിലും നടത്തിയ ആക്രമണങ്ങൾക്ക് മറുപടിയായാണ് ഇറാൻ്റെ ഈ ശക്തമായ പ്രത്യാക്രമണം. ഇസ്രയേൽ രണ്ട് എഫ്-35 വിമാനങ്ങൾ വെടിവച്ചിട്ടതായും ഒരു ഇസ്രയേലി പൈലറ്റിനെ പിടികൂടിയതായും ഇറാൻ മാധ്യമങ്ങൾ അവകാശപ്പെട്ടു. എന്നാൽ ഇസ്രയേൽ ഈ വാദം നിഷേധിച്ചു.
ഇതിനിടെ, ഇറാന്റെ തലസ്ഥാനമായ ടെഹ്‌റാനിലെ ആണവ കേന്ദ്രങ്ങളെ ലക്ഷ്യമിട്ട് ഇസ്രയേൽ വീണ്ടും ആക്രമണം നടത്തിയതായും റിപ്പോർട്ടുകളുണ്ട്. എന്നിരുന്നാലും, ആണവ സംവിധാനങ്ങൾ സുരക്ഷിതമാണെന്ന് ഇറാൻ അറിയിച്ചു.
