അപകടത്തിന് ശേഷമുള്ള ആദ്യ അഹമ്മദാബാദ്-ലണ്ടൻ എയർ ഇന്ത്യ വിമാനം സാങ്കേതിക തകരാർ മൂലം റദ്ദാക്കി; യാത്ര മുടങ്ങി
അഹമ്മദാബാദ്: കഴിഞ്ഞ ആഴ്ചയുണ്ടായ വിമാന അപകടത്തിന് ശേഷം അഹമ്മദാബാദിൽ നിന്ന് ലണ്ടനിലേക്ക് സർവീസ് നടത്താൻ നിശ്ചയിച്ചിരുന്ന എയർ ഇന്ത്യയുടെ ആദ്യ വിമാനം (AI 159) സാങ്കേതിക തകരാറിനെ തുടർന്ന് ടേക്ക് ഓഫ് ചെയ്തില്ല. ചൊവ്വാഴ്ച ഉച്ചയ്ക്ക് 1 മണിക്ക് അഹമ്മദാബാദിലെ സർദാർ വല്ലഭ്ഭായ് പട്ടേൽ അന്താരാഷ്ട്ര വിമാനത്താവളത്തിൽ നിന്ന് ലണ്ടനിലെ ഗാറ്റ്‌വിക്ക് വിമാനത്താവളത്തിലേക്ക് പുറപ്പെടേണ്ടിയിരുന്ന ബോയിംഗ് 787-8 ഡ്രീംലൈനർ വിമാനമാണ് റദ്ദാക്കിയത്.
നേരത്തെ, ജൂൺ 12-ന് ഇതേ റൂട്ടിൽ പറന്ന എയർ ഇന്ത്യ വിമാനം (AI 171) ടേക്ക് ഓഫിന് തൊട്ടുപിന്നാലെ തകർന്നു വീഴുകയും 241 പേർ മരിക്കുകയും ചെയ്തിരുന്നു. ഈ ദാരുണമായ അപകടത്തിന് ശേഷം AI 171 എന്ന ഫ്ലൈറ്റ് നമ്പർ നിർത്തലാക്കുകയും പകരം AI 159 എന്ന ഫ്ലൈറ്റ് നമ്പർ ഉപയോഗിക്കുകയുമായിരുന്നു.
വിമാനം റദ്ദാക്കിയതിനെ തുടർന്ന് നിരവധി യാത്രക്കാർ വിമാനത്താവളത്തിൽ കുടുങ്ങി. സാങ്കേതിക തകരാറാണ് റദ്ദാക്കാൻ കാരണമെന്ന് ആദ്യം റിപ്പോർട്ടുകളുണ്ടായിരുന്നെങ്കിലും, വിമാനം ലഭ്യമല്ലാത്തതും വ്യോമഗതാഗത നിയന്ത്രണങ്ങളും അധിക സുരക്ഷാ പരിശോധനകളുമാണ് കാരണമെന്ന് പിന്നീട് എയർ ഇന്ത്യ വിശദീകരണം നൽകി.
യാത്രക്കാർക്ക് ഹോട്ടൽ സൗകര്യവും, ടിക്കറ്റ് തുക പൂർണ്ണമായി തിരികെ നൽകുകയോ അല്ലെങ്കിൽ മറ്റൊരു വിമാനത്തിൽ യാത്ര ക്രമീകരിക്കുകയോ ചെയ്യുമെന്ന് എയർ ഇന്ത്യ അറിയിച്ചു. അഹമ്മദാബാദിൽ നിന്ന് ലണ്ടനിലേക്കുള്ള ഈ വിമാനം റദ്ദാക്കിയതിനെ തുടർന്ന് ലണ്ടനിൽ നിന്ന് അമൃത്സറിലേക്കുള്ള എയർ ഇന്ത്യയുടെ AI 170 വിമാനവും റദ്ദാക്കിയിട്ടുണ്ട്.
