വഖഫ് ഭേദഗതി നിയമം പശ്ചിമ ബംഗാളിൽ നടപ്പാക്കില്ലെന്ന് മമത ബാനർജി

വഖഫ് ഭേദഗതി നിയമം ബംഗാളിൽ നടപ്പാക്കില്ലെന്ന് പശ്ചിമ ബംഗാൾ മുഖ്യമന്ത്രി മമത ബാനർജി. കൊൽക്കത്തയിലെ ജൈന സമുദായത്തിന്റെ പരിപാടിയിൽ സംസാരിക്കവെയാണ് മമത ബാനർജി ഈ ഉറപ്പ് നൽകിയത്. ന്യൂനപക്ഷങ്ങളെയും അവരുടെ സ്വത്തുക്കളെയും സംരക്ഷിക്കുമെന്നും മമത ബാനർജി പറഞ്ഞു. വഖഫ് നിയമം പാസാക്കിയതിൽ നിങ്ങൾക്ക് ദുഃഖമുണ്ടെന്ന് എനിക്കറിയാം. വിശ്വസിക്കൂ, വിഭജിച്ച് ഭരിക്കാൻ കഴിയുന്ന ഒന്നും ബംഗാളിൽ സംഭവിക്കില്ലെന്ന് അവർ പറഞ്ഞു. വഖഫ് ബിൽ ഇപ്പോൾ പാസാക്കാൻ പാടില്ലായിരുന്നുവെന്നും മമത ബാനർജി കൂട്ടിച്ചേർത്തു. വ്യാഴാഴ്ച ലോക്‌സഭയും വെള്ളിയാഴ്ച രാജ്യസഭയും വഖഫ് ഭേദഗതി ബിൽ മണിക്കൂറുകൾ നീണ്ട ചർച്ചക്കൊടുവിൽ പാസാക്കിയിരുന്നു. ബില്ലിന് ശനിയാഴ്ച രാഷ്ട്രപതി ദ്രൗപദി മുർമു അംഗീകാരം നൽകിയതോടെ നിയമമായി മാറി.