അമ്മയുമായി വാക്കുതർക്കം; താമസിക്കുന്ന വാടക വീടിന് തീയിട്ട് മകൻ, ലക്ഷങ്ങളുടെ നഷ്ടം

അമ്മയുമായുള്ള വാക്കു തർക്കത്തെ തുടർന്ന് വാടകയ്ക്ക് താമസിച്ച് വന്ന വീടിന് തീയിട്ട് മകൻ. വർക്കല അയന്തി വലിയമേലതിൽ ക്ഷേത്രത്തിന് സമീപമുള്ള തേജസ് വീടിനാണ് തീയിട്ടത്. വീട്ടിലെ ഫർണിച്ചറും ഇലക്ട്രിക് സാധനങ്ങളും കത്തിനശിക്കുകയും ഭിത്തികൾ പൊട്ടിയടർന്ന് മാറുകയും ചെയ്തു.

12 ലക്ഷം രൂപയുടെ നഷ്ടം കണക്കാക്കുന്നു. സംഭവത്തിൽ ഇവിടെ താമസിച്ച് വന്ന പ്രജിത്തിനെ(40) വർക്കല പോലീസ് അറസ്റ്റ് ചെയ്തു. മദ്യലഹരിയിൽ പ്രജിത് തന്റെ ഒമ്പത് വയസുകാരൻ മകനുമായി പുറത്തേക്ക് പോകാൻ തുനിഞ്ഞത് അമ്മ സതി തടഞ്ഞിരുന്നു.

ഇതേ തുടർന്ന് ഇവർ തമ്മിൽ വാക്കേറ്റമുണ്ടായി. പിന്നാലെ കുട്ടിയുമായി സമീപത്തെ ക്ഷേത്രോത്സവത്തിൽ പങ്കെടുക്കാനായി സതി പോയി. ഇതിൽ പ്രകോപിതനായാണ് പ്രജിത്ത് വീടിന് തീയിട്ടത്. അഗ്നിരക്ഷാ സേന എത്തിയാണ് തീ കെടുത്തിയത്.