ബംഗളൂരുവിൽ കാർ അപകടം: നിലമ്പൂർ നഗരസഭ വൈസ് ചെയർമാന്റെ മകനടക്കം രണ്ട് പേർ മരിച്ചു

ബംഗളൂരു ബന്നാർഘട്ടയിലുണ്ടായ വാഹനാപകടത്തിൽ രണ്ട് മലയാളി വിദ്യാർഥികൾ മരിച്ചു. നിലമ്പൂർ സ്വദേശി അർഷ് പി ബഷീർ(23), കൊല്ലം സ്വദേശി മുഹമ്മദ് ഷാഹൂബ്(28) എന്നിവരാണ് മരിച്ചത്.

അർഷ് നിലമ്പൂർ നഗരസഭ വൈസ് ചെയർമാൻ പിഎം ബഷീറിന്റെ മകനാണ്. എംബിഎ വിദ്യാർഥിയാണ്. മുഹമ്മദ് ഷാഹൂബ് ബംഗളൂരുവിൽ ജോലി ചെയ്യുകയാണ്. ഇന്നലെ രാത്രി 11 മണിയോടെയാണ് അപകടമുണ്ടായത്. ഇവർ സഞ്ചരിച്ച കാർ നിയന്ത്രണം വിട്ട് മരത്തിൽ ഇടിക്കുകയായിരുന്നു.

ഇടിയുടെ ആഘാതത്തിൽ കാറിന്റെ മുൻവശം പൂർണമായും തകർന്നു. രണ്ട് പേരും സംഭവസ്ഥലത്ത് വെച്ച് തന്നെ മരിച്ചു. അപകടത്തിൽ രണ്ട് പേർക്ക് പരുക്കേറ്റിട്ടുണ്ട്. ഇവരെ ആശുപത്രിയിലേക്ക് മാറ്റി.