അധിനിവേശ പ്രദേശങ്ങളിൽ വീണ്ടും മിസൈൽ, ഡ്രോൺ ആക്രമണം; ഇസ്രായേലിലുടനീളം സൈറണുകൾ മുഴങ്ങി
ഇറാൻ അധിനിവേശ പ്രദേശങ്ങൾ ലക്ഷ്യമിട്ട് വീണ്ടും മിസൈൽ, ഡ്രോൺ ആക്രമണങ്ങൾ നടത്തി. ഇസ്രായേലിന്റെ വടക്കൻ, മധ്യ, തെക്കൻ മേഖലകളിലുടനീളം സൈറണുകൾ മുഴങ്ങി. ‘ഓപ്പറേഷൻ ട്രൂ പ്രോമിസ് III’ ന്റെ ഭാഗമായാണ് ഇറാന്റെ ഈ പുതിയ ആക്രമണം.
ഇറാൻ സൈനിക കേന്ദ്രങ്ങളും തന്ത്രപ്രധാനമായ സ്ഥലങ്ങളും ലക്ഷ്യമിട്ടാണ് ആക്രമണം നടത്തിയതെന്നാണ് ഇറാൻ സ്റ്റേറ്റ് മീഡിയ റിപ്പോർട്ട് ചെയ്യുന്നത്. ‘യാ അലി ഇബ്നു അബി താലിബ്’ എന്ന കോഡ് നാമത്തിലാണ് ഈ ഒമ്പതാമത്തെയും ഏറ്റവും വിപുലമായതുമായ ഓപ്പറേഷൻ ഇറാൻ നടത്തിയത്.
മിസൈലുകൾ ഇസ്രായേലിന്റെ വ്യോമ പ്രതിരോധ സംവിധാനങ്ങളെ മറികടന്ന് ലക്ഷ്യസ്ഥാനങ്ങളിൽ പതിക്കുന്നതിന്റെ ദൃശ്യങ്ങൾ സമൂഹമാധ്യമങ്ങളിൽ പ്രചരിക്കുന്നുണ്ട്. തെൽ അവീവിലേക്ക് മിസൈൽ എത്തുന്നതിന് മുൻപ് തന്നെ ഇസ്രായേലിന്റെ പ്രതിരോധ മിസൈൽ വഴിതെറ്റി താഴേക്ക് പതിക്കുന്ന ഒരു ദൃശ്യവും പുറത്തുവന്നിട്ടുണ്ട്.
കഴിഞ്ഞ 72 മണിക്കൂറിനുള്ളിൽ ഇറാനിയൻ റെവല്യൂഷണറി ഗാർഡ് കോർപ്സിന്റെ (IRGC) എയ്‌റോസ്‌പേസ് ഡിവിഷൻ ഇസ്രായേലിലെ 545 സൈനിക, തന്ത്രപ്രധാന സ്ഥലങ്ങൾ ലക്ഷ്യമിട്ടതായി റിപ്പോർട്ടുകളുണ്ട്. ഇസ്രായേൽ അധികാരികൾ ട്രാഫിക് നിരീക്ഷണ ക്യാമറകൾ പ്രവർത്തനരഹിതമാക്കിയതായും, ആശങ്കയിലായ ജനങ്ങൾ തുടർച്ചയായി നാലാം ദിവസവും അഭയകേന്ദ്രങ്ങളിൽ കഴിയുകയാണെന്നും റിപ്പോർട്ടുകൾ പറയുന്നു.
ഈ ആക്രമണങ്ങൾ ഇസ്രായേലിന്റെ സൈനിക ശേഷി തകർക്കാനും നേരത്തെ നടന്ന ആക്രമണങ്ങൾക്ക് ശക്തമായ തിരിച്ചടി നൽകാനുമുള്ള വിപുലമായ പ്രചാരണത്തിന്റെ ഭാഗമാണെന്ന് ഇറാനിലെ സൈനിക വൃത്തങ്ങൾ പറയുന്നു. ടെൽ അവീവ്, ജറുസലേം, ഹൈഫ എന്നിവിടങ്ങളിലും ഇറാൻ മിസൈലുകളും ഡ്രോണുകളും ഉപയോഗിച്ച് ആക്രമണം നടത്തി. ഈ ആക്രമണങ്ങൾ ഇസ്രായേലിൽ പൊതുജീവിതം താറുമാറാക്കുകയും ദശലക്ഷക്കണക്കിന് ആളുകൾ അഭയകേന്ദ്രങ്ങളിൽ അഭയം തേടുകയും ചെയ്തു.
ഇസ്രായേൽ പ്രതിരോധ സേനയുടെ അയൺ ഡോം ഉൾപ്പെടെയുള്ള വ്യോമപ്രതിരോധ സംവിധാനങ്ങൾ മിക്ക മിസൈലുകളും തടഞ്ഞെങ്കിലും, ചിലത് ലക്ഷ്യത്തിലെത്തി നാശനഷ്ടങ്ങൾ വരുത്തി. തെൽ അവീവിലും പരിസര പ്രദേശങ്ങളിലും സ്ഫോടനങ്ങൾ നടന്നതായി റിപ്പോർട്ടുണ്ട്. ഇസ്രായേൽ-ഇറാൻ സംഘർഷം മേഖലയിൽ കൂടുതൽ ഗുരുതരമായ പ്രത്യാഘാതങ്ങൾ സൃഷ്ടിക്കുമെന്ന ആശങ്കയിലാണ് ലോകരാജ്യങ്ങൾ.
