ആഫ്രിക്കൻ രാജ്യങ്ങളുമായുള്ള തങ്ങളുടെ ബന്ധം വിപുലീകരിക്കുന്നതിനുള്ള പദ്ധതികളുടെ ഭാഗമായി “സെൻസിറ്റീവ്” സുരക്ഷാ സഹകരണത്തിന് ഊന്നൽ നൽകുമെന്ന് റഷ്യ അറിയിച്ചു. ആഫ്രിക്കൻ ഭൂഖണ്ഡത്തിലെ തങ്ങളുടെ സ്വാധീനം വർദ്ധിപ്പിക്കുന്നതിനും പാശ്ചാത്യ ശക്തികളുടെ ഇടപെടലുകളെ ചെറുക്കുന്നതിനും റഷ്യ ഈ നീക്കത്തിലൂടെ ലക്ഷ്യമിടുന്നു.
റഷ്യയുടെ സുരക്ഷാ കൗൺസിൽ സെക്രട്ടറി സെർജി ഷോയിഗുവിൻ്റെ അധ്യക്ഷതയിൽ നടന്ന ഒരു ആഗോള സുരക്ഷാ ഫോറത്തിൽ 40-ലധികം ആഫ്രിക്കൻ രാജ്യങ്ങളിലെ പ്രതിനിധികൾ പങ്കെടുത്തു. രാജ്യങ്ങൾ തമ്മിലുള്ള ബന്ധം കൂടുതൽ ആഴത്തിലാക്കുന്നതിനുള്ള വഴികൾ ഈ യോഗത്തിൽ ചർച്ച ചെയ്തു.
ആഫ്രിക്കൻ രാജ്യങ്ങളുടെ പരമാധികാരവും ദേശീയ താൽപ്പര്യങ്ങളും ഉയർത്തിപ്പിടിക്കുന്നതിൽ റഷ്യ എപ്പോഴും പിന്തുണ നൽകിയിട്ടുണ്ടെന്ന് റഷ്യൻ സുരക്ഷാ കൗൺസിൽ പ്രസ്താവനയിൽ പറഞ്ഞു. ഭീകരവാദം, മയക്കുമരുന്ന് കടത്ത് തുടങ്ങിയ ഭീഷണികളെ നേരിടുന്നതിൽ പങ്കാളി രാജ്യങ്ങൾ തമ്മിലുള്ള സഹകരണം
വർദ്ധിപ്പിക്കുന്നതിനുള്ള ഒരു പ്രധാന വേദിയായും ഈ ഫോറം പ്രവർത്തിക്കുന്നു.
നിലവിലെ ഭൗമരാഷ്ട്രീയ സാഹചര്യത്തിൽ ആഫ്രിക്കൻ രാജ്യങ്ങളുടെ വിദേശനയം സ്വയം നിർണയിക്കാനുള്ള അവകാശം സംരക്ഷിക്കുന്നതിനും റഷ്യ പിന്തുണ വാഗ്ദാനം ചെയ്തിട്ടുണ്ട്. ഇത് ആഫ്രിക്കയിൽ ഫ്രാൻസ് ഉൾപ്പെടെയുള്ള പാശ്ചാത്യ രാജ്യങ്ങളുടെ സ്വാധീനം കുറയ്ക്കാനും റഷ്യൻ സാന്നിധ്യം വർദ്ധിപ്പിക്കാനും സഹായിക്കുമെന്നാണ് വിലയിരുത്തൽ.
നേരത്തെ, ആഫ്രിക്കൻ രാജ്യങ്ങൾക്ക് ഭക്ഷ്യസഹായം ഉൾപ്പെടെയുള്ള മാനുഷിക സഹായങ്ങൾ നൽകുന്നതിലും റഷ്യ ശ്രദ്ധ കേന്ദ്രീകരിച്ചിരുന്നു. വിദ്യാഭ്യാസ മേഖലയിലെ സഹകരണവും റഷ്യ-ആഫ്രിക്ക ബന്ധങ്ങളിൽ ഒരു പ്രധാന ഘടകമാണ്.
