ജല സുരക്ഷാ മാനദണ്ഡങ്ങളിൽ സൗദി അറേബ്യക്ക് ആഗോള ഒന്നാം സ്ഥാനം; മുങ്ങിമരണം 17% കുറഞ്ഞു

റിയാദ്: ജല സുരക്ഷാ മാനദണ്ഡങ്ങളിലും മുങ്ങിമരണങ്ങൾ തടയുന്നതിലും സൗദി അറേബ്യക്ക് ആഗോളതലത്തിൽ ഒന്നാം സ്ഥാനം. പരിസ്ഥിതി, ജല, കൃഷി മന്ത്രാലയം പുറത്തുവിട്ട ഏറ്റവും പുതിയ റിപ്പോർട്ട് പ്രകാരം, ദേശീയ മുങ്ങിമരണ പ്രതിരോധ നയം (National Drowning Prevention Policy) നടപ്പിലാക്കിയതിലൂടെ രാജ്യത്ത് മുങ്ങിമരണങ്ങളുടെ എണ്ണത്തിൽ 17% കുറവ് രേഖപ്പെടുത്തി. ലോക മുങ്ങിമരണ പ്രതിരോധ ദിനത്തോടനുബന്ധിച്ച് ജൂലൈ 25-ന് നടന്ന ശിൽപ്പശാലയിലാണ് മന്ത്രാലയം ഈ സുപ്രധാന പ്രഖ്യാപനം നടത്തിയത്.

പൊതുജന സുരക്ഷ വർദ്ധിപ്പിക്കുന്നതിനും സാമൂഹിക-സാമ്പത്തിക നേട്ടങ്ങൾ കൈവരിക്കുന്നതിനുമുള്ള സൗദി അറേബ്യയുടെ ദേശീയ പദ്ധതികളുടെ ഫലപ്രാപ്തിയാണ് ഈ നേട്ടം വിളിച്ചോതുന്നതെന്ന് മന്ത്രാലയം അറിയിച്ചു. മുങ്ങിമരണം തടയുന്നതിനായി നടപ്പിലാക്കിയ 12 സമഗ്ര ദേശീയ പദ്ധതികളാണ് ഈ ആഗോള നേട്ടത്തിന് പിന്നിൽ.

പൊതുജനാരോഗ്യ അതോറിറ്റിയുമായി (Weqaya) സഹകരിച്ച് വിവിധ സർക്കാർ ഏജൻസികളുടെ പങ്കാളിത്തത്തോടെയാണ് ഈ പദ്ധതികൾക്ക് തുടക്കം കുറിച്ചത്. ജലവുമായി ബന്ധപ്പെട്ട അപകടങ്ങൾ തടയുന്നതിനും സുരക്ഷിതമായ പെരുമാറ്റരീതികൾ പ്രോത്സാഹിപ്പിക്കുന്നതിനുമുള്ള ബോധവൽക്കരണ പരിപാടികളും ഡിജിറ്റൽ പ്ലാറ്റ്‌ഫോമുകളിലൂടെയുള്ള പ്രചാരണങ്ങളും ഈ പദ്ധതിയുടെ ഭാഗമായി ശക്തിപ്പെടുത്തിയിരുന്നു.

മുങ്ങിമരണങ്ങൾ കുറയ്ക്കുന്നതിലൂടെ 800 ദശലക്ഷം റിയാലിലധികം സാമ്പത്തിക നഷ്ടം ഒഴിവാക്കാൻ രാജ്യത്തിന് സാധിച്ചതായും ശിൽപ്പശാലയിൽ ചൂണ്ടിക്കാട്ടി. ഇത് ദേശീയ ഏകോപനത്തിന്റെയും വിവിധ ഏജൻസികൾ തമ്മിലുള്ള സഹകരണത്തിന്റെയും ഫലമാണെന്നും, സുസ്ഥിരവും ഫലപ്രദവുമായ ജല സുരക്ഷാ സംവിധാനം കെട്ടിപ്പടുക്കുന്നതിനുള്ള സൗദിയുടെ പ്രതിബദ്ധത എടുത്തു കാണിക്കുന്നതായും മന്ത്രാലയം വ്യക്തമാക്കി. സൗദി വിഷൻ 2030-ന്റെ ലക്ഷ്യങ്ങൾക്ക് അനുസൃതമായി ജനങ്ങളുടെ ജീവിതം സംരക്ഷിക്കാനും ജീവിതനിലവാരം ഉയർത്താനുമുള്ള ശ്രമങ്ങളുടെ ഭാഗമാണ് ഈ നേട്ടം.