🎶 സോളമന്റെ ഉത്തമഗീതം 🎶❤️: ഭാഗം 53

രചന: റിൻസി പ്രിൻസ്‌

ചിരിയോടെ അവൻ പറഞ്ഞപ്പോൾ വീണ്ടും അവളുടെ മുഖം ചുവന്നു

‘ മുഖം ഇങ്ങനെ ചുവപ്പിക്കാതെന്റെ മറിയാമ്മേ ഞാൻ കൺട്രോൾ ചെയ്തു നിൽക്കുവാ..

അവൾക്കു മാത്രം കേൾക്കാൻ പാകത്തിൽ ചെവിയിൽ സ്വകാര്യമായി അവനത് പറഞ്ഞപ്പോൾ അറിയാതെ അവൾ ചിരിച്ചു പോയിരുന്നു,

അടുത്ത് കണ്ട ഓട്ടോസ്റ്റാൻഡിൽ നിന്നും ഒരു ഓട്ടോ വിളിച്ച് അവളെ അതിൽ കയറ്റിയാണ് അവൻ ഹോസ്റ്റലിലേക്ക് പറഞ്ഞുവിട്ടത്. ആ ഓട്ടോ കണ്ണിൽ നിന്നും മായുന്നതുവരെ അവനവിടെ നിന്നു പ്രിയപ്പെട്ട എന്തോന്ന് തന്നിൽ നിന്നും അകന്നു പോകുന്ന നഷ്ടബോധം അവന് തോന്നി. ഹൃദയം അവളോട് ഉള്ള പ്രണയത്താൽ കരകവിയുന്നതായി അവന് തോന്നി….

തിരികെ എത്തിയ മരിയ വാർഡനെ കണ്ടതിനുശേഷം റൂമിലേക്ക് ചെന്നു. അവിടെ അപ്പോൾ ആനന്ദി എത്തിയിട്ടുണ്ടായിരുന്നു. ഒരു ചെന്തമിഴ് സുന്ദരി..! വളരെ പെട്ടെന്ന് തന്നെ ആനന്ദിയുമായി അവൾ അടുത്തിരുന്നു. മലയാളികളെ അപേക്ഷിച്ച് തമിഴർക്ക് പൊതുവേ ആളുകളോട് അല്പം സ്നേഹക്കൂടുതൽ ഉണ്ട് എന്ന് അവൾക്ക് ഇതിനോടകം തന്നെ ചെന്നൈയിൽ എത്തിയപ്പോൾ തോന്നിയിരുന്നു സ്നേഹക്കൂടുതൽ മാത്രമല്ല അല്പം ബഹുമാനം കൂടുതലും ഉണ്ട്. തന്നെക്കുറിച്ച് ചോദിച്ചു കഴിഞ്ഞതും വളരെ പെട്ടെന്ന് തന്നെ ആനന്ദി താനുമായി ഇണങ്ങി എന്നത് വലിയൊരു അത്ഭുതം തന്നെയായിരുന്നു അവൾക്ക്. ഒരു വ്യക്തിയോട് സംസാരിക്കുമ്പോൾ പോലും തമിഴ് വളരെയധികം ബഹുമാനം കാത്തുസൂക്ഷിക്കും സ്ത്രീകളോടാണ് എങ്കിൽ അമ്മ എന്നും പുരുഷനോട് ആണ് എങ്കിൽ സാർ എന്നും സംബോധന ചെയ്തു മാത്രമേ സംസാരിക്കാറുള്ളൂ..

ജീന വെറുതെ ഫോണിൽ തോണ്ടി കൊണ്ടിരിക്കുമ്പോഴാണ് ജോണി മുറിയിലേക്ക് വരുന്നത്. പൊതുവേ അല്പം കർക്കശക്കാരനാണ് എങ്കിലും മക്കളുടെ അടുത്ത് അയാൾ കുറച്ച് ഫ്രീയായി ഇടപെടാറുണ്ട്.

“മോളേ…

ജോണി വിളിച്ചപ്പോൾ അവൾ തല ഉയർത്തി അയാളെ നോക്കി

“എന്താ പപ്പാ…

എഴുനേറ്റ് കൊണ്ടവൾ ചോദിച്ചു

” പ്ലസ് ടു കഴിഞ്ഞാൽ സ്ഥിതിക്ക് ഇനി നിന്നെ നേഴ്സിങ്ങിന് വിടണമെന്ന് ഞാൻ കരുതിയത് , പക്ഷേ അത് വേണ്ട നീ എൻജിനീയറിങ്ങിന് പോയാൽ മതി,

ഇത്രയും കാലം നേഴ്സിങ്ങിന് പോയി യുകെക്ക് പോകണം എന്ന് തന്നോട് പറഞ്ഞുതന്ന ജോണി തന്നെ ഇങ്ങനെ പറഞ്ഞപ്പോൾ പെട്ടെന്ന് അവൾ അത്ഭുതപ്പെട്ടു പോയിരുന്നു കാര്യം മനസ്സിലാവാതെ അവൾ അയാളെ നോക്കി.

” പപ്പ തന്നെയല്ലേ പറഞ്ഞത് നഴ്സിങ്ങിന് പോയാലേ കുടുംബ രക്ഷപ്പെടും കയ്യിൽ പൈസ ഉണ്ടാവു എന്നൊക്കെ

” അതൊക്കെ ശരിയാ പക്ഷേ നിനക്ക് തോന്നുന്നുണ്ടോ ഒരു ഡോക്ടർ പയ്യൻ ഒരു നേഴ്സിനെ കല്യാണം കഴിക്കും എന്ന്.?

അയാൾ പറഞ്ഞത് എന്താണെന്ന് മനസ്സിലാവാതെ അവൾ അയാളെ തന്നെ നോക്കി.

” പപ്പ എന്തൊക്കെയാ പറയുന്നത് എനിക്കൊന്നും മനസ്സിലാകുന്നില്ല.

“നിന്റെ ജീവിതം രക്ഷപ്പെടാനുള്ള ഒരു വഴിയെക്കുറിച്ച് പറയുന്നത് അതിനുവേണ്ടിയാണ് നിന്റെ അടുത്തേക്ക് വന്നത്.

അവൾ അത്ഭുതത്തോടെ അയാളെ തന്നെ നോക്കി.

” ഞാൻ നിന്നെ ചെന്നൈയിലുള്ള ഒരു കോളേജിൽ എൻജിനീയറിങ് ചേർക്കാൻ പോവാ

അത് കേട്ടതും അവളുടെ മുഖം മങ്ങി കൂട്ടുകാർക്കൊപ്പം ബാംഗ്ലൂരിൽ നേഴ്സിങ് പഠിക്കാൻ പോകാൻ വേണ്ടി ഇരുന്നതാണ് അവൾ. അയാളോട് എതിർത്ത് പറയാനുള്ള ധൈര്യവുമില്ല. കുട്ടിക്കാലം മുതലേ കർക്കശമുള്ള സ്വഭാവമാണ് അയാളുടേത് അതുകൊണ്ട് തന്നെ വളരെ ഭയന്നാണ് ഓരോ കാര്യങ്ങളും ചെയ്തിട്ടുള്ളത്. പ്ലസ് ടു കഴിയുമ്പോൾ എങ്കിലും ഇവിടെ നിന്നും ഒരു മോചനം കിട്ടും എന്നാണ് പ്രതീക്ഷ എന്നാൽ ഇപ്പോൾ എന്തിനാണ് ഇങ്ങനെ ഒരു തീരുമാനം എന്ന ചോദിക്കാൻ പോലും അവൾക്ക് നാവ് പൊങ്ങിയില്ല

” മരിയ പോയി നിൽക്കുന്ന ആ വീട്ടിലെ ആൾക്കാരെ ഒക്കെ നിനക്കറിയില്ലേ.?

മരിയ എന്ന വാക്ക് കേട്ടപ്പോൾ തന്നെ വല്ലാത്ത ദേഷ്യം തോന്നിയിരുന്നു ജീനയ്ക്ക്. കുട്ടിക്കാലം മുതലേ ഒരു വല്ലാത്ത ദേഷ്യമാണ് അവളോട് ഉള്ളത് അവൾ അമ്മയുടെ മകൾ ആണ് എന്ന് വല്യമ്മച്ചി പറഞ്ഞു തന്നത് എന്നാൽ പപ്പയുടെ മോളും അല്ല. അമ്മ അവളോട് സ്നേഹത്തോടെ ഇടപെടുന്നത് കാണുമ്പോഴൊക്കെ ദേഷ്യമാണ് തോന്നിയിട്ടുള്ളത് തനിക്കും തന്നെ അനുജനും മാത്രം അവകാശപ്പെട്ട അമ്മയുടെ സ്നേഹം തട്ടിയെടുക്കാൻ വന്ന ഒരുവളായി മാത്രമേ ഇന്നുവരെ അവളെ കണ്ടിട്ടുള്ളൂ. ഓരോ വട്ടവും പപ്പയവളെ വഴക്ക് പറയുമ്പോൾ സന്തോഷമാണ് തോന്നിയിട്ടുള്ളത് . അവൾ നിൽക്കുന്നത് തന്നെയും പറഞ്ഞു വിടുവാനാണ് പപ്പയുടെ ശ്രമം പണ്ട് മുതലേ സ്കൂളിൽ അവളെ ഭയന്നാണ് താൻ ഒന്നിനും മുതിരാതിരുന്നിട്ടുള്ളത് പലരും പ്രണയാഭ്യർത്ഥനയുമായി പുറകിൽ നടന്നപ്പോഴും എന്തെങ്കിലും അവൾ അറിഞ്ഞാൽ വീട്ടിൽ വന്ന് പറയും എന്നുള്ള ഭയം കൊണ്ടാണ് മിണ്ടാതിരുന്നത്.

കുറച്ചു മുതിർന്നപ്പോൾ മുതൽ വലിയ ചേച്ചി കളിയാണ് അവൾ അത് ചെയ്യരുത് ഇത് ചെയ്യരുത്, ആ കൂട്ടുകാർ വേണ്ട അവർ മോശമാണ് എന്ന് തുടങ്ങിയ ഒരുപാട് ഉപദേശങ്ങൾ തനിക്ക് അതൊന്നും ഇഷ്ടമല്ല. പഠിക്കുന്ന സമയത്ത് എന്തെങ്കിലും ബന്ധത്തിന് പോയാൽ അവൾ അറിഞ്ഞു വീട്ടിൽ പറഞ്ഞാൽ പപ്പ അടിക്കും അതുകൊണ്ടാണ് ഇത്രയും കാലം ആരെയും പ്രണയിക്കാൻ പോലും പോകാതിരുന്നത്. പ്ലസ് ടു കഴിഞ്ഞ് ഈ വീട്ടിൽ നിന്ന് രക്ഷപ്പെട്ട എങ്ങനെയെങ്കിലും ജീവിതം ഒന്ന് എൻജോയ് ചെയ്യണം എന്ന് കരുതിയിരിക്കുമ്പോഴാണ് പുതിയ കണ്ടുപിടുത്തവുമായി വരുന്നത്.

” എന്റെ കൂട്ടുകാർ എല്ലാവരും നേഴ്സിങ്ങിന് പോവാ ഞാൻ ഒറ്റയ്ക്കായി പോകും

” കൂട്ടുകാരെല്ലാവരും നേഴ്സിങ്ങിന് പോയിട്ട് അവരുടെ വഴി നോക്കിയങ്ങ് പോകും. അവരെക്കാളും എല്ലാം നല്ല രീതിയിൽ നാളെ നിനക്ക് ജീവിക്കണമെങ്കിൽ ഞാനിപ്പോൾ പറയുന്നത് കേൾക്കാൻ നോക്ക്.?

“പപ്പാ എന്തൊക്കെ പറയുന്നത് എൻജിനീയറിങ് പഠിച്ചിട്ടുള്ള ആർക്കാ ഇവിടെ നല്ല ജോലി കിട്ടിയിട്ടുള്ളത്.? പിന്നെ എങ്ങനെയാണ് ഞാൻ അവരെ ജീവിക്കാൻ പോകുന്നത്. എന്റെ കൂട്ടുകാരുടെ ഒക്കെ ചേട്ടന്മാരെ മീൻ വിൽക്കാനാ പോകുന്നത്. അത്രയ്ക്ക് ബുദ്ധിമുട്ടാ ബി ടെക്ക് ഒക്കെ കഴിഞ്ഞാൽ നല്ലൊരു ജോലി കിട്ടാൻ.

” നിന്നെ ഞാൻ അങ്ങോട്ട് വിടുന്നത് പഠിക്കാൻ വേണ്ടി മാത്രമല്ല

” പിന്നെ

മനസ്സിലാവാതെ അവൾ ചോദിച്ചു..കാത്തിരിക്കൂ………

മുന്നത്തെ പാർട്ടുകൾ വായിക്കാൻ ഇവിടെ ക്ലിക്ക് ചെയ്യുക…