🎶 സോളമന്റെ ഉത്തമഗീതം 🎶❤️: ഭാഗം 19

രചന: റിൻസി പ്രിൻസ്‌

ഈ മൗനം സമ്മതം ആണെന്ന് ഞാൻ കരുതിക്കോട്ടെ.?

വേണമെന്നോ വേണ്ടെന്നോ പറയാൻ അവൾക്ക് കഴിഞ്ഞില്ല. പക്ഷേ അവൻ മനസ്സ് തുറന്നപ്പോൾ കുറച്ചു മുൻപ് തന്നെ ഭരിച്ചിരുന്ന വേദന കുറച്ച് അകലുന്നത് അവൾ അറിഞ്ഞിരുന്നു. അവന്റെ ആ വാക്കുകൾ തന്നിൽ നിറച്ച പ്രചോദനം എത്ര വലുതാണെന്ന് അവൾ അറിഞ്ഞിരുന്നു. അല്ലെങ്കിലും മറ്റൊരാളാൽ സ്നേഹിക്കപ്പെടുന്നുവെന്ന് അറിയുമ്പോൾ ഈ ലോകത്ത് മറ്റേന്ത് കാര്യത്തിലും സന്തോഷം ഒരാൾക്ക് തോന്നുമല്ലോ. താനും ഒരു സാധാരണ പെണ്ണാണ് തന്നെ സ്നേഹിക്കുന്നവന്റെ സ്നേഹലാളനങ്ങൾ ഏറ്റുവാങ്ങാൻ കൊതിക്കുന്ന ഒരു പെണ്ണ്. അവൻ പറഞ്ഞതുപോലെ ഉള്ളിന്റെയുള്ളിൽ എവിടെയൊക്കെയോ ഈ ചെറിയ സമയം കൊണ്ട് അവൻ തന്നിൽ ഇടം നേടിയിട്ടില്ലേന്ന് ഒരു നിമിഷം അവൾ തന്നെ അവളോട് ചോദിച്ചിരുന്നു. അതെ സത്യമാണ് ഒരു വേദന വരുമ്പോൾ ആദ്യം തന്റെ ഉള്ളിൽ തെളിയുന്നത് അവന്റെ മുഖമാണ്. തനിക്കൊരു പ്രശ്നം വന്നാൽ അവൻ ഉണ്ടാകുമെന്ന ഒരു വിശ്വാസം തന്റെ ഉള്ളിന്റെ ഉള്ളിൽ എവിടെയോ അടിയുറച്ചിട്ടുണ്ട്. “പക്ഷേ… “ആ രണ്ടു വാക്കുകൾ അവൾക്കുള്ളിൽ വലിയൊരു ചോദ്യം തന്നെയായിരുന്നു

” എനിക്കറിയാം കൃത്യമായ ഒരു മറുപടി പറയാൻ തനിക്ക് സാധിക്കില്ലന്ന്… അതുകൊണ്ട് താൻ വളരെ സൂക്ഷിച്ചു മാത്രം ആലോചിച്ചു ഒരു തീരുമാനം എടുത്താൽ മതി, ആ തീരുമാനം ഒരിക്കലും എന്നെ വിഷമിപ്പിക്കുന്ന ഒന്നായിരിക്കില്ല എന്നൊരു വിശ്വാസം എനിക്കുണ്ട്…. പിന്നെ ഇപ്പോൾ വല്യമ്മച്ചിയുടെ ആ കാര്യോർത്ത് താൻ വിഷമിക്കേണ്ട, ഞാൻ പറഞ്ഞില്ലേ അവരൊക്കെ ഒരുപാട് പ്രായമായ ആളുകളാണ്. അവരുടെയൊക്കെ മനസ്സിലും അതിന്റേതായ ഒരുപാട് വ്യത്യാസങ്ങൾ ഉണ്ടാവും. നമ്മളൊക്കെ ചിന്തിക്കുന്നത് പോലെ അവർ ചിന്തിക്കണം എന്നില്ല. ആലോചിച്ചു നോക്ക്. ഇങ്ങനെ ചിന്തിക്കുന്ന വല്യമ്മച്ചിയുടെ മോളാണ് എന്റെ മമ്മ, എന്റെ മമ്മ ഇന്നുവരെ തന്നെ വിഷമിപ്പിച്ചിട്ടുണ്ടോ.? ഓരോരുത്തരും ഓരോ ക്യാരക്ടർ അല്ലേ? അങ്ങനെ വിചാരിച്ചാൽ മതി..! അതിന്റെ പേരിൽ ഈ മുഖം മങ്ങണ്ട, കുറച്ച് പൈങ്കിളി ആണെന്ന് അറിയാം എങ്കിലും താൻ വിഷമിച്ചാൽ അത് ഏറ്റവും കൂടുതൽ ബാധിക്കുന്നത് ഇപ്പോൾ എന്നെയാണ്… തന്റെ മുഖം ഒന്ന് മങ്ങിയാൽ ആ മനസ്സ് ഒന്ന് വിഷമിച്ചാൽ എനിക്കത് സഹിക്കാൻ പറ്റില്ല…..

അവനത് പറഞ്ഞ നിമിഷം അറിയാതെ അവൾ മുഖത്തേക്ക് നോക്കിയിരുന്നു. ആ മുഖം തനിക്കു വേണ്ടി പുഞ്ചിരി തൂകുന്നത് കണ്ടപ്പോൾ അറിയാതെ ഒരു പുഞ്ചിരി അവളുടെ ചുണ്ടിലും വിടർന്നു.

” ഇനി നമുക്ക് റൂമിലേക്ക് പോകാം.

” പൊയ്ക്കോളു ഞാൻ പുറകെ വരാം, ഒരുമിച്ച് പോകുന്നത് കണ്ട് ഇനി എന്തെങ്കിലും പ്രശ്നമായാലോ?

“ഒരുമിച്ചു പോയതുകൊണ്ട് ഒന്നും സംഭവിക്കാൻ പോകുന്നില്ല ഒന്നൊന്നര മാസം നമ്മൾ ഒന്നിച്ചു തന്നെയല്ലേ ഒരു ഫ്ലാറ്റിൽ താമസിച്ചത്… അപ്പോൾ സംഭവിക്കാത്ത ഒന്നും ഈ 10 മിനിറ്റ് നമ്മൾ സംസാരിച്ചത് കൊണ്ട് സംഭവിക്കാൻ പോകുന്നില്ല എന്ന് മമ്മക്ക് നന്നായിട്ട് അറിയാം… അതുകൊണ്ട് താൻ വാ…

അവളുടെ കയ്യിൽ അധികാരത്തോടെ പിടിച്ചു വലിച്ചാണ് അവൻ അവൾക്കൊപ്പം തിരിച്ചു മുറിയിലേക്ക് നടന്നത്.. വാതിൽക്കൽ എത്തിയപ്പോൾ തന്നെ കണ്ടിരുന്നു സണ്ണിയെ…

” നീ ഈ കൊച്ചിനെ കൊണ്ട് ഇത് എവിടെ പോയതാ…? അമല വിളിച്ചു പറഞ്ഞപ്പോൾ ഞാൻ ഈ കൊച്ചിനെ നോക്കുകയായിരുന്നു. നിന്നെ കാണാതിരുന്നപ്പോൾ എനിക്ക് തോന്നി നിന്റെ കൂടെ കാണുമെന്ന്…

സണ്ണി പറഞ്ഞു

” ഞങ്ങൾ കാന്റീനിൽ പോയതാ ഒരു കോഫി കുടിക്കാൻ വേണ്ടി…

” എന്താ മോളുടെ മുഖം വല്ലാതിരിക്കുന്നെ… ഇവൻ എന്തെങ്കിലും കുരുത്തക്കേട് കാണിച്ചോ

അവളുടെ മുഖത്തേക്ക് നോക്കി സണ്ണി ചോദിച്ചു,

” ഇല്ലങ്കിൾ….

അവൾ മറുപടി പറഞ്ഞു….

അപ്പോഴേക്കും അകത്തു നടന്ന കാര്യത്തെക്കുറിച്ച് ചെറിയ രീതിയിൽ അവൾക്ക് വിഷമം ഉണ്ടാവാത്ത തരത്തിൽ അവൻ പപ്പയോട് പറഞ്ഞിരുന്നു… അത് കേട്ടപ്പോൾ അയാൾക്കും സങ്കടം തോന്നിയിരുന്നു…

” അത് മോള് കാര്യാക്കണ്ട ഇവന്റെ വല്യമ്മച്ചിക്ക് ഇടയ്ക്കിടയ്ക്ക് മറ്റുള്ളവരുടെ മനസ്സ് വിഷമിപ്പിക്കുന്നത് ഒരു ഹരം ആണ്. എന്റെ കല്യാണ ആലോചന വന്നപ്പോൾ അമലയുടെ അത്രയും നിറം എനിക്കില്ലന്ന് എന്റെ മുഖത്ത് നോക്കി പറഞ്ഞ കക്ഷിയാണ്.. ഇവന് ജനിക്കുന്നത് വരെ അവർക്ക് പേടി ആയിരുന്നു എന്റെ നിറമാണോ കൊച്ചിന് കിട്ടുന്നത് എന്ന്… അത് പറഞ്ഞു ഞാൻ വരുമ്പോൾ എന്നെ വിഷമിപ്പിച്ചായിരുന്നു അവിടുന്ന് വിടുന്നത്…. സത്യം പറഞ്ഞാൽ ഇനി ഒരു കൊച്ചു വേണ്ടെന്ന് പോലും ഞാൻ കരുതിയത് അവളുടെ അമ്മയുടെ വർത്തമാനം കേട്ടിട്ട് ആണ്… എങ്ങാനും ഉണ്ടാകുന്ന അടുത്ത കൊച്ചിന് എന്റെ നിറം വെല്ലോമാണ് കിട്ടുന്നതെങ്കിൽ അവര് പിന്നെ സമാധാനത്തോടെ എന്നെ ഇട്ടേക്കത്തില്ല…. അയാൾ അത് പറഞ്ഞപ്പോൾ എല്ലാവരും ചിരിച്ചിരുന്നു….

അതോടെ അവളുടെ മനസ്സിലെ ടെൻഷൻ കുറച്ചു കുറഞ്ഞു എന്ന് സണ്ണിക്കും തോന്നിയിരുന്നു….

“ആളുകൾ പലതും പറയും നമ്മൾ എല്ലാ കാര്യത്തിനും വിഷമിക്കാൻ നിന്നാൽ അതിനെ സമയം കാണുള്ളൂ… മോൾ അങ്ങനെ ഒന്നും വിചാരിക്കേണ്ട…. ഇപ്പൊ മോൾക്ക് മുൻപിൽ ഒരു ലക്ഷ്യമുണ്ട്…. ഈ കഷ്ടപ്പാട് ഒക്കെ മാറണമെങ്കിൽ പഠിച്ച കാര്യം മോള് നേടിയെടുക്കുക തന്നെ വേണം… അതിനുമാത്രം പ്രാധാന്യം കൊടുത്താൽ മതി. സണ്ണിയുടെ വാക്കുകൾ കേട്ടപ്പോൾ അവൾ തല കുലുക്കിയിരുന്നു,

കുറച്ച് സമയങ്ങൾക്ക് ശേഷം അമലയും പുറത്തേക്ക് വന്നിരുന്നു….

അമല വന്നതെ അവളെ കെട്ടിപ്പിടിച്ച് അവളോട് മാപ്പ് പറയുകയാണ് ചെയ്തത്…

” അമ്മച്ചി ചെയ്ത തെറ്റിന് ഞാൻ മോളോട് ക്ഷമ ചോദിക്കുന്നു…
എനിക്കറിയാം നിനക്ക് ഒത്തിരി സങ്കടം ആയെന്ന്…

” സാരമില്ല ആന്റി എനിക്ക് മനസ്സിലാവും, പ്രായമായ ആളുകളല്ലേ, അവരുടെ ചിന്താഗതിയിലും അതിന് തക്ക മാറ്റങ്ങൾ ഉണ്ടാവുമല്ലോ… അതുകൊണ്ട് ഞാൻ വലിയ കാര്യമായിട്ട് എടുത്തിട്ടില്ല…

സോളമൻ പറഞ്ഞ അതേ വാചകങ്ങൾ അവൾ പറഞ്ഞപ്പോൾ അവന്റെ ചുണ്ടിലും ഒരു പുഞ്ചിരി വിടർന്നിരുന്നു…

” അത്രേ ഉള്ളു മോളെ അങ്ങനെ കരുതിയാൽ മതി…. ഞാനിന്ന് അമ്മച്ചിയുടെ കൂടെ ഇവിടെ നിൽക്കുകയാണ്…. മോള് സണ്ണിച്ചാന്റെയും സോളമന്റെയും കൂടി വീട്ടിലേക്ക് പൊയ്ക്കോ….. ഒരു നിമിഷം അവൾ മടിച്ചു നിൽക്കുന്നത് കണ്ടപ്പോൾ അവളുടെ മുഖത്തേക്ക് നോക്കി അമല പറഞ്ഞു…

” അമ്മച്ചിക്ക് മാത്രമേ ഉള്ളൂ ഇങ്ങനെ ഒരു മർക്കടമുഷ്ടിസ്വഭാവം അവിടെ മറ്റരും മോളെ ഒരു വിധത്തിലും ഉപദ്രവിക്കാൻ പോകുന്നില്ല… എന്റെ സഹോദരനും അവന്റെ ഭാര്യയും മക്കളും ഒക്കെ നല്ല ആളുകൾ ആണ്…. അവരൊന്നും പറഞ്ഞ് മോളെ കുത്തിനോവിക്കാനോ വിഷമിപ്പിക്കാനോ വരില്ല… അവളുടെ മനസ്സ് മനസ്സിലാക്കി എന്നത് പോലെ അമല പറഞ്ഞപ്പോൾ അവൾ തലയാട്ടിയിരുന്നു, മോള് ചെല്ല്…

അമല പറഞ്ഞപ്പോൾ പിന്നീട് എതിർക്കാൻ അവൾക്ക് തോന്നിയിരുന്നില്ല…

” ഞാനിപ്പോൾ പോയാൽ എങ്ങനെയാ…. വൈകിട്ടത്തേക്ക് ആഹാരം വല്ലതും വാങ്ങേണ്ട…?

സണ്ണി ചോദിച്ചു

” ഞാൻ വാങ്ങിക്കോളാം….

സണ്ണിയോട് അമല പറഞ്ഞു

” അല്ലെങ്കിൽ ഒരു കാര്യം ചെയ്യ് ഞാൻ ഒരു ഓട്ടോ പിടിച്ച് വൈകിട്ട് എത്താം…. നിങ്ങൾക്കുള്ള ഫുഡും കൂടി വാങ്ങിയിട്ട് അവിടേക്ക് വന്നേക്കാം, സോളമാ നീ ഈ കുട്ടിയെയും കൊണ്ട് വേഗം വീട്ടിലേക്ക് ചെല്ലു…

അതും പറഞ്ഞ് പോക്കറ്റിൽ നിന്നും ചാവി എടുത്ത് സോളമന് നേരെ സണ്ണി നീട്ടിയപ്പോൾ വൈദ്യൻ കൽപ്പിച്ചതും രോഗി ഇച്ഛിച്ചതും പാൽ എന്ന ഒരു മനസ്സായിരുന്നു സോളമനും….

” ഞാൻ വന്നു പെട്ടെന്ന് വീട്ടിലേക്ക് പോയെന്ന് അറിഞ്ഞാൽ പിന്നെ അമ്മച്ചിക്ക് അടുത്തവട്ടം വരെ അതുമതി…

അമലയുടെ മുഖത്തേക്ക് നോക്കി സണ്ണി പറഞ്ഞപ്പോൾ അത് ശരിയാണെന്ന് അവർക്കും തോന്നിയിരുന്നു….

” എങ്കിൽ പിന്നെ നീയാ കൊച്ചിനെ കൊണ്ട് വീട്ടിൽ ചെന്ന് ഒന്ന് റസ്റ്റ്‌ എടുക്കാൻ നോക്ക്…

സോളമന്റെ മുഖത്തേക്ക് നോക്കി അമല അത് പറഞ്ഞു… ഒപ്പം കണ്ണുകൾ കൊണ്ട് അവന് മാത്രം മനസ്സിലാകുന്ന രീതിയിൽ ഒരു താക്കീതും ആ നോട്ടത്തിൽ ഉണ്ടായിരുന്നു…. അവളോട് അവന്റെ വേലത്തരങ്ങൾ ഒന്നും ഇറക്കേണ്ട എന്നുള്ള ഒരു നോട്ടം ആയിരുന്നു അതന്ന് സോളമനും മനസ്സിലായിരുന്നു….

അവൻ അമ്മയെ നോക്കി ഭംഗിയായി ഒന്ന് ചിരിച്ചു….

തിരിച് അങ്ങോട്ട് പോകുന്ന യാത്രയിൽ കാറിൽ അവൻ ഡ്രൈവിംഗ് സീറ്റിലേക്ക് കയറിയപ്പോൾ പുറകിലേക്ക് കയറാൻ തുടങ്ങിയവകളെ അവൻ തടഞ്ഞു…

” അങ്ങനെ എന്നെ ഡ്രൈവർ ആക്കിയാൽ എങ്ങനെയാ….? താനിവിടെ മുന്നിലേക്ക് കയറ്…. ഒരാളെ ബാക്കിൽ ഇരുന്ന് യാത്ര ചെയ്യുമ്പോൾ നമുക്ക് ഡ്രൈവ് ചെയ്യാൻ ഒരു സുഖം ഉണ്ടാവില്ല…

“അത് വേണ്ട ഞാൻ പുറകിൽ കേറിക്കോളാം…

” താനിവിടെ മുൻപിൽ കയറാതെ ഈ വണ്ടി ഇവിടുന്ന് എടുക്കില്ല…

ഒരു പിടിവാശി പോലെ അവൻ പറഞ്ഞപ്പോൾ അവനെ അനുസരിക്കുകയല്ലാതെ അവൾക്കു മുൻപിൽ മറ്റു മാർഗ്ഗമുണ്ടായിരുന്നില്ല….

ഡോർ തുറന്ന് മുൻപിലേക്ക് അവൾ കയറിയപ്പോൾ അവന്റെ ചുണ്ടിൽ ഒരു പുഞ്ചിരി നിറഞ്ഞിരുന്നു… മെല്ലെ കയ്യെത്തിച്ചു സ്റ്റീരിയോ ഓണാക്കി പാട്ടുകൾ തിരഞ്ഞുപിടിച്ച് തന്നെ അവൻ പ്ലേ ചെയ്തു…

🎶🎶പൂവാണു നീ എന്നിൽ ഇതളിട്ടൊരനുരാഗ
നിറമുള്ള പൂവ്
തേനാണു നീ എന്റെ നിനവിന്റെ
ഇലക്കുമ്പിൾ നിറയുന്ന പൂന്തേൻ
പൂവിന്റെ കരളിൽ കാർവണ്ടിനറിയാത്ത
കാമുക മോഹങ്ങളുണ്ടോ
ഇനിയും പ്രണയരഹസ്യമുണ്ടോ
ചുണ്ടിൽ ചുണ്ടിൽ മുട്ടിയുരുമ്മിയ
സ്നേഹ കുരുവികൾ പല്ലവി പാടി
ചുംബന മധുര പുലരി വിരിഞ്ഞു….🎶🎶🎶

” അഴകേ കണ്മണിയേ അഴലിൻ പൂവിതളേ
മനസ്സിന്റെ കിളിവാതിൽ അറിയാതെ തുറന്നൊരു
മഴവിൽ ചിറകുള്ള കവിതേ……

അവളുടെ മുഖത്തേക്ക് നോക്കി ഒരു ഈണത്തിൽ അവൻ പാടി…

പരിഭ്രമിച്ചിരിക്കുകയാണ് മരിയ…

” മറിയാമ്മോ…..

ഒരു താളത്തിൽ അവൻ വിളിച്ചു…

” നിന്നെ ആദ്യം കണ്ടപ്പോൾ എനിക്ക് എന്താ തോന്നിയത് എന്നറിയോ…? കെട്ടിപ്പിടിച്ച് തലമുടിയിൽ ഒന്ന് തലോടാൻ, പിന്നെ ആ കണ്ണുകളിൽ നേർത്ത ഒരു ചുംബനം തരാൻ….

അവൾ അത്ഭുതത്തോടെ അതിലുപരി ദേഷ്യത്തോടെ അവന്റെ മുഖത്തേക്ക് നോക്കി, അവൻ ചിരിച്ചു കൊണ്ട് അവളുടെ മുഖത്തേക്ക് നോക്കി പറഞ്ഞു

” എന്റെ പൊന്നു കൊച്ചെ ഇങ്ങനെ കണ്ണുരുട്ടെന്റെ കാര്യം ഒന്നുമില്ല… ഞാൻ എന്റെ മനസ്സിൽ തോന്നിയ ഒരു സത്യം നിന്നോട് വെളിപ്പെടുത്തി എന്നേയുള്ളൂ…. സത്യം പറയാലോ ഞാൻ ഏതാണ്ട് പത്താം ക്ലാസ് മുതലേ ഒരു ചെറിയ കോഴിയാ. എനിക്കിഷ്ടപ്പെടുന്ന പെൺപിള്ളാരുടെ പുറകെ നടന്ന് അവരെ വളച്ച് അവരോടുള്ള ഒരു ഇൻഫാക്യൂഷൻ തീരുമ്പോൾ നൈസായിട്ട് അവരെ ഒഴിവാക്കുന്ന ഒരു പരിപാടി എനിക്ക് ഉണ്ടായിരുന്നു… പക്ഷേ നിന്നോട് എനിക്ക് അങ്ങനെ ഒരു ഇൻഫാക്റ്റുവേഷൻ അല്ല തോന്നിയത്…. നിന്നെ ആദ്യം കണ്ടപ്പോൾ തന്നെ ഇത് എനിക്ക് വേണ്ടി എഴുതി വച്ചിരിക്കുന്ന പെൺകൊച്ച് ആണെന്നാണ് എന്റെ മനസ്സ് പറഞ്ഞത്….

” ഇതിപ്പോൾ കുറെ വട്ടം പറഞ്ഞില്ലേ…? വീണ്ടും വീണ്ടും അത് ഇങ്ങനെ ആവർത്തിക്കണമെന്നില്ല…

ദേഷ്യത്തോടെ പുറത്തേക്ക് നോക്കി അവൾ പറഞ്ഞു

“ആഹാ എന്റെ മറിയാമ്മയ്ക്ക് ദേഷ്യപ്പെടാൻ ഒക്കെ അറിയാം അപ്പോൾ….

” ഞാൻ പറഞ്ഞില്ലേ എനിക്ക് ഇതിനോട് താൽപര്യമില്ലെന്ന്… പിന്നെ എന്തിനാ ഇത് തന്നെ പറയുന്നത്…. ഇനി അങ്ങനെ പറഞ്ഞാൽ ഞാൻ വണ്ടിയിൽ നിന്ന് ഇറങ്ങി പോവൂട്ടോ….

“ആഹാ അത് കൊള്ളാല്ലോ…. എനിക്ക് തന്റെ കണ്ണിൽ കാണാം ഒരുപാട് ആഗ്രഹിക്കുന്നുണ്ട് താൻ എന്നെ, പക്ഷേ തനിക്ക് മുൻപിൽ ഒരുപാട് മതിലുകൾ ഉണ്ട്… അതുകൊണ്ടാ സമ്മതിക്കാത്തത്….

ഒരു തണൽ മരത്തിന്റെ കീഴിലായി അവൻ വണ്ടി ഒതുക്കി…. ശേഷം അവളുടെ മുഖത്തേക്ക് നോക്കി പിന്നെ മെല്ലെ അവളുടെ കൈകൾക്ക് മുകളിലേക്ക് തന്റെ കൈകൾ വച്ചു. ഒരു നിമിഷം ഞെട്ടി കൈകൾ മാറ്റാൻ അവൾ നോക്കിയെങ്കിലും അവനൊന്നുകൂടി മുറുക്കി പിടിക്കുകയായിരുന്നു ചെയ്തത്…

” എന്തിനാടാ ഈ പിടിവാശി, നിനക്ക് കിട്ടാതെ പോയ ഒരു വലിയ സ്നേഹക്കൂമ്പാരം എനിക്ക് തരണം… ആ സ്നേഹകൂമ്പാരത്തിലേക്ക് ആണ് ഞാൻ ക്ഷണിക്കുന്നത്… നിന്നെ സ്നേഹത്താൽ പൊതിയണം എന്നത് ഒഴിച്ച് എന്റെ മനസ്സിൽ മറ്റൊന്നുമില്ല….. നിനക്ക് ലഭിക്കാതെ പോയ ആ സ്നേഹം കൊണ്ട് നിന്നെ മൂടണം എന്ന് മാത്രമേ എനിക്കുള്ളൂ…. നിനക്കൊരു പങ്കാളി മാത്രമായിട്ടല്ല ഒരു അച്ഛനായും അമ്മയായും സുഹൃത്തായി കാമുകനായും ഭർത്താവായും ഒക്കെ എനിക്ക് മാറണം…! ഒരിക്കലും എന്റെ കൊച്ചിനെ ഞാൻ പാതിവഴിയിൽ ഇട്ടിട്ട് പോവില്ല,സ്നേഹം കൊണ്ട് മൂടിക്കോളാം ഈ ജീവൻ അവസാനിക്കും വരെ….. ഇനിയെങ്കിലും എന്നെ ഒന്ന് മനസ്സിലാക്ക്…!

പറഞ്ഞപ്പോഴേക്കും അവന്റെ കണ്ണുകൾ നിറഞ്ഞത് അവൾ കണ്ടിരുന്നു… ആദ്യമായാണ് ഒരാൾ സ്നേഹം കൊണ്ട് തന്നെ കീഴടക്കുന്നതെന്ന് അവൾക്ക് തോന്നി…. ഇന്നോളം സ്നേഹം ലഭിച്ചിട്ടില്ലാത്തതു കൊണ്ടുതന്നെ ആ സ്നേഹം കയ്യെത്തി പിടിക്കാൻ അവൾക്കും ആഗ്രഹം തോന്നി…. എല്ലാം മറന്ന് ആ നിമിഷം അവൾ അവന്റെ കൈകൾ തന്റെ നെഞ്ചോട് ചേർത്തുവച്ച് പൊട്ടിക്കരഞ്ഞിരുന്നു.

“എന്നെ പറ്റിക്കുമോ…?

കരച്ചിലിന്റെ ഒപ്പം ആ ചോദ്യം കൂടി ഉയർന്നു…..കാത്തിരിക്കൂ………

മുന്നത്തെ പാർട്ടുകൾ വായിക്കാൻ ഇവിടെ ക്ലിക്ക് ചെയ്യുക…