സ്കോഡ എൻയാക്ക് ഇവി; ഒറ്റ ചാർജിൽ 500 കിലോമീറ്ററിലധികം റേഞ്ച്: അടുത്ത വർഷം ഇന്ത്യയിൽ അവതരിപ്പിക്കും
സ്കോഡ തങ്ങളുടെ ഇലക്ട്രിക് കാറായ എൻയാക്ക് ഇവി ഇന്ത്യയിലേക്ക് എത്തുന്നു. 2025ൽ എൻയാക്ക് ഇവി ഇന്ത്യയിൽ അവതരിപ്പിക്കും. ജനുവരിയിൽ നടക്കുന്ന ഭാരത് മൊബിലിറ്റി ഷോയിൽ വാഹനം പ്രദർശിപ്പിക്കും. ഈ വർഷം വാഹനം എത്തിക്കാനായിരുന്നു പദ്ധതിയെങ്കിലും പിന്നീട് മാറ്റുകയായിരുന്നു. എൻയാക്ക് 80 വേരിയന്റാണ് ഇന്ത്യയിലെത്തിക്കുന്നത്.
സ്കോഡയുടെ എംഇബി പ്ലാറ്റ്‌ഫോമിനെ അടിസ്ഥാനമാക്കിയാണ് എൻയാക് നിർമ്മിച്ചിരിക്കുന്നത്. എൻയാക് 80-ൻ്റെ പവർട്രെയിൻ സജ്ജീകരണത്തിൽ 82kWh ബാറ്ററി പാക്ക് ഉൾപ്പെടുന്നു. ഒറ്റ ചാർജിൽ 500 കിലോമീറ്ററിലധികം റേഞ്ച് വാഗ്ദാനം ചെയ്യുന്നു. പരമാവധി 282 ബിഎച്ച്പി പവറും 310 എൻഎം ടോർക്കും നൽകുന്ന ഇലക്ട്രിക് മോട്ടോറും ഇതിലുണ്ട്. ഈ ഇലക്ട്രിക് എസ്‌യുവി 6.7 സെക്കൻഡിനുള്ളിൽ 0 മുതൽ 100 കിലോമീറ്റർ വേഗത കൈവരിക്കുമെന്ന് അവകാശപ്പെടുന്നു. 125kW ഫാസ്റ്റ് ചാർജർ ഉപയോഗിച്ച് 28 മിനിറ്റിനുള്ളിൽ 10 മുതൽ 80 ശതമാനം വരെ ചാർജ് ചെയ്യാം.
2765 എംഎം വീൽബേസുള്ള 4648 എംഎം നീളവും 1879 എംഎം വീതിയും 1616 എംഎം ഉയരവുമാണ് വരാനിരിക്കുന്ന സ്കോഡ ഇലക്ട്രിക് എസ്‌യുവിയുടെ അളവ്. കൊഡിയാകുമായി താരതമ്യപ്പെടുത്തുമ്പോൾ, ഇത് അൽപ്പം ചെറുതാണ്. എൻയാക്കിൻ്റെ അകത്തളത്തിൽ സുസ്ഥിരവും റീസൈക്കിൾ ചെയ്തതുമായ വസ്തുക്കളാണ് ഉപയോഗിക്കുന്നതെന്ന് സ്കോഡ പറയുന്നു.
നാല് വ്യത്യസ്ത ലേഔട്ടുകളുള്ള 5.3 ഇഞ്ച് ഡിജിറ്റൽ ഇൻസ്ട്രുമെൻ്റ് ക്ലസ്റ്റർ, ലെതർ- മൈക്രോ ഫൈബർ ഫാബ്രിക് അപ്ഹോൾസ്റ്ററി, ലെതർ പൊതിഞ്ഞ സ്റ്റിയറിംഗ് വീൽ, ആംബിയൻ്റ് ലൈറ്റിംഗ്, വോയ്‌സ് അസിസ്റ്റൻസും ആംഗ്യ നിയന്ത്രണവും ഉള്ള ഇ-സിം കണക്റ്റു ചെയ്‌ത പ്രവർത്തനങ്ങൾ, 19 ഇഞ്ച് പ്രോട്ടിയസ് അലോയ് വീലുകൾ, ഒരു ആകർഷകമായ കമിംഗ്/ലീവിംഗ് ഹോം ആനിമേഷനോടുകൂടിയ ഓപ്ഷണൽ എൽഇഡി ബാക്ക്‌ലിറ്റ് ഗ്രിൽ, എൽഇഡി ഹെഡ്‌ലാമ്പുകൾ, എൽഇഡി ടെയിൽലാമ്പുകൾ എന്നിവ വാഹനത്തിൽ ഉൾപ്പെടുന്നു.
