പിവി അൻവർ പരാതി ഉന്നയിച്ച രീതി ശരിയായില്ല; പറഞ്ഞ കാര്യങ്ങൾ അന്വേഷിക്കും: മന്ത്രി സജി ചെറിയാൻ

പിവി അൻവർ എംഎൽഎയുടെ പരസ്യ വിമർശനത്തിൽ അതൃപ്തി പരസ്യമാക്കി മന്ത്രി സജി ചെറിയാൻ. പി വി അൻവർ പരാതി ഉന്നയിച്ച രീതി ശരിയായില്ലെന്ന് മന്ത്രി സജി ചെറിയാൻ പറഞ്ഞു. പാർട്ടിയോടോ മുഖ്യമന്ത്രിയോടോ ആയിരുന്നു ആദ്യം പരാതി പറയേണ്ടതെന്ന് മന്ത്രി പറഞ്ഞു. അൻവർ പറഞ്ഞ കാര്യങ്ങൾ സർക്കാർ അന്വേഷിക്കുമെന്ന് മന്ത്രി വ്യക്തമാക്കി.

ആർഎസ്എസ് നേതാവും എഡിജിപി അജിത് കുമാറും കൂടിക്കാഴ്ച നടത്തിയെന്ന വിവാദത്തിലും മന്ത്രി സജി ചെറിയാൻ പ്രതികരിച്ചു. ആർക്കും ആരെയും കാണാമെന്നായിരുന്നു വിവാദത്തോട് മന്ത്രി പ്രതികരിച്ചത്. ആർഎസ്എസിനെതിരെ വിട്ടുവീഴ്ചയില്ലാത്ത പോരാട്ടം നടത്തുന്ന പ്രസ്ഥാനമാണ് സിപിഎം. ഉയർന്നുവരുന്ന വിവാദങ്ങൾ പച്ചക്കള്ളമാണെന്നും സർക്കാരിനെ അപകീർത്തി പെടുത്താൻ നടത്തുന്ന ശ്രമമാണെന്നും മന്ത്രി പറഞ്ഞു.