വാഷിംഗ്ടൺ: ഇന്ത്യയും പാകിസ്താനും തമ്മിലുള്ള സംഘർഷത്തിൽ അമേരിക്കൻ പ്രസിഡന്റ് ഡൊണാൾഡ് ട്രംപിന്റെ നിലപാടിൽ മലക്കം മറിച്ചിൽ. യുദ്ധം അവസാനിപ്പിക്കുന്നതിനായി താൻ പാകിസ്താന് മേലാണ് സമ്മർദം ചെലുത്തിയതെന്ന് ട്രംപ് ഇപ്പോൾ വെളിപ്പെടുത്തിയിരിക്കുകയാണ്. ഇത് മുൻപുള്ള അദ്ദേഹത്തിന്റെ പ്രസ്താവനകളിൽ നിന്ന് വ്യത്യസ്തമായ നിലപാടാണ്.
ഇന്ത്യ-പാക് സംഘർഷത്തിൽ മധ്യസ്ഥത വഹിക്കാൻ താൻ തയ്യാറാണെന്ന് നേരത്തെ പലതവണ ട്രംപ് ആവർത്തിച്ചിരുന്നു. എന്നാൽ, ഇന്ത്യ മധ്യസ്ഥ ശ്രമങ്ങളെ നിരസിക്കുകയും, പാകിസ്താനുമായി നേരിട്ട് പ്രശ്നങ്ങൾ പരിഹരിക്കാനാണ് താൽപര്യപ്പെടുന്നതെന്ന് വ്യക്തമാക്കുകയും ചെയ്തിരുന്നു. ഈ സാഹചര്യത്തിലാണ് പാകിസ്താനെയാണ് താൻ സമ്മർദ്ദത്തിലാക്കിയതെന്ന ട്രംപിന്റെ പുതിയ വെളിപ്പെടുത്തൽ വരുന്നത്.
ഇന്ത്യാ-പാക് സംഘർഷം ഒരു ആണവ ദുരന്തമായി മാറുമായിരുന്നെന്നും, അതിൽ താൻ ഇടപെട്ടതിലൂടെ അത് ഒഴിവാക്കാൻ സാധിച്ചുവെന്നും ട്രംപ് മുമ്പ് അവകാശപ്പെട്ടിരുന്നു. എന്നാൽ, താൻ ആരുടെ പക്ഷത്താണ് നിന്നതെന്നോ, ആരുടെ മേലാണ് സമ്മർദ്ദം ചെലുത്തിയതെന്നോ അദ്ദേഹം അന്ന് വ്യക്തമാക്കാത്തത് ഒരുപാട് ഊഹാപോഹങ്ങൾക്ക് വഴിവെച്ചിരുന്നു.
പുതിയ വെളിപ്പെടുത്തലിലൂടെ, ഇന്ത്യയുമായുള്ള ബന്ധത്തിൽ പാകിസ്താൻ കൂടുതൽ ഉത്തരവാദിത്തബോധത്തോടെ പെരുമാറണമെന്ന് താൻ ആവശ്യപ്പെട്ടുവെന്ന സൂചനയാണ് ട്രംപ് നൽകുന്നത്. ഇത് മേഖലയിലെ സമാധാനം നിലനിർത്തുന്നതിൽ പാകിസ്താന്റെ പങ്ക് പ്രധാനമാണെന്ന അമേരിക്കയുടെ നിലപാടിനെ അടിവരയിടുന്നതായും വിലയിരുത്തപ്പെടുന്നു.
ട്രംപിന്റെ ഈ പുതിയ പ്രസ്താവന ഇന്ത്യ-പാക് ബന്ധത്തിലും, അമേരിക്കയുടെ നയതന്ത്ര സമീപനങ്ങളിലും എന്ത് മാറ്റങ്ങളുണ്ടാക്കുമെന്നത് ഉറ്റുനോക്കുകയാണ് ലോകരാജ്യങ്ങൾ.
