🎶 സോളമന്റെ ഉത്തമഗീതം 🎶❤️: ഭാഗം 25

രചന: റിൻസി പ്രിൻസ്‌

മോൻ എന്തിന്റെ ഡോക്ടർ ആണ്.

അവന്റെ മുഖത്തേക്ക് നോക്കി ജെസ്സി ചോദിച്ചു

” ന്യൂറോളജിസ്റ്റ്

താല്പര്യമില്ലാതെ അവൻ മറുപടി പറഞ്ഞു. അപ്പോഴേക്കും മരിയ എല്ലാവരും കുടിച്ച ഗ്ലാസ്സുകളുമായി അകത്തേക്ക് പോയിരുന്നു. അകത്തേക്ക് പോയവളുടെ പിറകെ ആയിരുന്നു അവന്റെ മിഴികൾ ആ നിമിഷവും. എന്നാൽ അവനെ ചുറ്റിപ്പറ്റി ജെസ്സിയുടെ മകൾ ജീനയുടെ മിഴികൾ പരതി നടന്നു

ജെസ്സി വീണ്ടും എന്തൊക്കെയോ സംസാരിക്കുന്നുണ്ട് അവരുടെ സംസാരവും രീതികളും ഒന്നും തന്നെ താല്പര്യമില്ലാത്തതുകൊണ്ട് തന്നെ മൊബൈൽ ഫോണും എടുത്തു കൊണ്ട് നേരെ പുറത്തേക്കിറങ്ങിയിരുന്നു സോളമൻ. വെറുതെ ഫോൺ സ്ക്രോൾ ചെയ്ത് ഇൻസ്റ്റഗ്രാമിലെ റീലുകൾ കാണുകയും ഗെയിം കളിക്കുകയും ഒക്കെ ചെയ്തു അവൻ. ഇതിനിടയിൽ അമല വന്ന് ഭക്ഷണം കഴിക്കാൻ വിളിച്ചപ്പോൾ താല്പര്യം ഇല്ലാതെയാണെങ്കിലും അവൻ അമലയ്ക്കൊപ്പം നടന്നിരുന്നു.. ഡൈനിങ് റൂമിന്റെ അരികിൽ തന്നെയായിരുന്നു അടുക്കള. ഡൈനിങ് റൂമിൽ ഇരുന്നാൽ അടുക്കളയിൽ ഉള്ളവർ എന്താണ് ചെയ്യുന്നത് എന്ന് കാണാൻ സാധിക്കും. അകത്തുനിന്ന് മരിയ ജോലി ചെയ്യുന്നത് വ്യക്തമായി തന്നെ സോളമന് കാണാമായിരുന്നു..ആ കാഴ്ച കണ്ടതും അവനു വല്ലാത്ത ദേഷ്യം ആണ് തോന്നിയത്..ഒരു യാത്ര കഴിഞ്ഞ് ക്ഷീണിച്ചു വന്ന പെൺകുട്ടിയാണ്, ആ മാന്യത പോലും ഇല്ലാതെ അവളെക്കൊണ്ട് കഷ്ടപ്പെടുത്തിയിരിക്കുകയാണ്. വന്നപ്പോൾ ഉണ്ടായിരുന്ന തെളിമ ആ മുഖത്ത് നിന്നും നഷ്ടമായിരിക്കുന്നു. പെട്ടെന്ന് തന്നെ വിയർപ്പും ക്ഷീണവും ആ മുഖത്ത് ഇടം പിടിച്ചിട്ടുണ്ട്. എന്തൊക്കെ വറക്കുകയോ പൊരിക്കുകയോ ഒക്കെയാണ്. എല്ലാം പറഞ്ഞു കൊടുത്തുകൊണ്ട് ജെസ്സിയും അരികിലുണ്ട്. ബെറ്റി ആണെങ്കിൽ ജോലി കൂടെ ചെയ്യുന്നുണ്ടെങ്കിൽ മകളെ കൊണ്ട് ഒന്നും ചെയ്യിപ്പിക്കേണ്ട എന്ന് പറയുന്നില്ല.

എല്ലാവർക്കും ഭക്ഷണം വിളമ്പിയപ്പോഴും മരിയ ഡൈനിങ് ടേബിളിൽ ഇരുന്നില്ല എന്നത് സോളമനെ വിഷമിപ്പിച്ച കാര്യമായിരുന്നു. മരിയ കൂടി കഴിക്കാൻ അമല നിർബന്ധിച്ചുവെങ്കിലും പിന്നീട് കഴിക്കാമെന്ന് മരിയ പറഞ്ഞു. അപ്പോഴേക്കും ബാക്കിയുള്ളവർ ഡൈനിങ് ടേബിളിൽ ഇടം പിടിക്കുകയും ചെയ്തിരുന്നു. സോളമൻറെ നേരെ എതിർവശത്തായിരുന്നു ജെസ്സിയുടെ മകൾ ജീന ഇരുന്നിരന്നത് ഇടയ്ക്കിടെ ഭക്ഷണം കഴിക്കുമ്പോഴെല്ലാം അവൾ അവന്റെ മുഖത്തേക്ക് തന്നെ നോക്കുന്നുണ്ടായിരുന്നു. നന്നേ വെളുത്ത വട്ട മുഖവും അതിലെ കറുത്ത രോമങ്ങളും അവനെ സുന്ദരൻ ആക്കിയതായി അവൾക്ക് തോന്നി. നേർത്തതെങ്കിലും അത്യാവശ്യം കട്ടിയുള്ള താടിയാണ് വെച്ചിരിക്കുന്നത്. സ്ട്രോബറി നിറമുള്ള ചുണ്ടുകൾ ആ വെളുത്ത നിറത്തിന് കുറച്ചുകൂടി മനോഹാരിത പകരുന്നതായി അവൾക്ക് തോന്നിയിരുന്നു. അവന്റെ കണ്ണുകൾ ഇടയ്ക്കിടെ പായുന്നത് അടുക്കളയിലേക്ക് ആണ് എന്ന് അവൾക്ക് മനസ്സിലാക്കാൻ സാധിച്ചു. ആരെയാണ് അവൻ തിരയുന്നത് എന്നായിരുന്നു അവൾ ശ്രദ്ധിച്ചിരുന്നത്. ഭക്ഷണം കഴിച്ചു എന്ന് വരുത്തുക മാത്രമാണ് സോളമൻ ചെയ്തത്. ഭക്ഷണം കഴിച്ചതിനു ശേഷം കുറച്ച് സമയം ജോണും ആയും സണ്ണിയുമായും വർത്തമാനം പറയാനായി ഇരുന്നു. ബെറ്റീയുമായി വർത്തമാനം പറഞ്ഞുകൊണ്ട് അമലയും, അപ്പോൾ ഒന്നും തന്നെ മരിയ ഭക്ഷണം കഴിക്കുന്നത് കണ്ടിരുന്നില്ല സോളമൻ. അവൾ ഭക്ഷണം കഴിച്ചിട്ടില്ലന്ന് അവന് മനസ്സിലായി വെള്ളം കുടിക്കാൻ ആയി ഡൈനിങ് ടേബിളിലേക്ക് ചെന്നപ്പോൾ കണ്ടു സിങ്കിൽ ഒരു കുന്ന് പാത്രങ്ങൾ കഴുകിക്കോണ്ടിരിക്കുന്ന മരിയ. അവൾ പോകുന്ന സമയം വരെ പറ്റാവുന്ന പണികൾ ഒക്കെ ചെയ്യിപ്പിക്കുകയാണ് അവർ. ആ കാഴ്ച കണ്ടപ്പോൾ അവന്റെ മനസ്സ് വല്ലാതെ ഉലഞ്ഞു. അവൾ കഴിച്ചോ എന്ന് അമ്മ പോലും തിരക്കുന്നില്ലല്ലോ എന്നാണ് ആ നിമിഷം അവൻ ചിന്തിച്ചത്. കൂടുതൽ ഇക്കാര്യത്തെക്കുറിച്ച് തനിക്ക് അമ്മയോട് പറയാനും സാധിക്കില്ല. താൻ അവളുടെ കാര്യത്തിൽ ഒരു പ്രത്യേക താൽപര്യം കാണിക്കുന്നു എന്ന് തോന്നിയാൽ ചിലപ്പോൾ അമ്മയ്ക്ക് ഇപ്പോൾ അവളോടുള്ള സ്നേഹം കുറഞ്ഞു പോയേക്കും എന്ന് അവനു ഭയം തോന്നി. താൻ അവളെ പ്രണയിക്കുമോ എന്ന പേടി മമ്മയ്ക്ക് ഉണ്ടാകും.. അതുകൊണ്ടു തന്നെ അക്കാര്യം ചോദിക്കാനും പറ്റുന്നില്ല. എന്നാൽ അവൾ ഭക്ഷണം കഴിക്കാത്തതിനാൽ അവൻ വല്ലാതെ ഉരുകുന്നുണ്ടായിരുന്നു.. അടുക്കളയിലേക്ക് കയറി അവളോട് സംസാരിക്കാൻ തുടങ്ങിയപ്പോഴാണ് ജെസി വരുന്നത് അവൻ കണ്ടത്.. അപ്പോൾ തന്നെ അവൻ ആ ശ്രമം ഉപേക്ഷിച്ചിരുന്നു. പുറത്തേക്ക് പോയി അമലയുടെ അരികിലായി ഇരുന്നു.

” മമ്മ നമുക്ക് കുറച്ച് നേരത്തെ ഇറങ്ങണം വല്ല ബ്ലോക്കൊ മറ്റോ ഉണ്ടെങ്കിൽ പിന്നെ സമയത്ത് ഫ്ലൈറ്റ് കിട്ടില്ല.

അമലയോട് ആയി അവൻ പറഞ്ഞു.

” അത് ശരിയാ കഴിഞ്ഞ പ്രാവശ്യം ഞങ്ങൾ വന്നിട്ട് ഇങ്ങനെ ഫ്ലൈറ്റ് ക്യാൻസൽ ആയി പോയിരുന്നു. അമല അത് പറഞ്ഞപ്പോൾ സോളമന് ആശ്വാസം തോന്നിയിരുന്നു.

” എങ്കിൽ പിന്നെ എല്ലാരും ഫുഡ് ഒക്കെ കഴിച്ചില്ലേ നമുക്ക് ഇറങ്ങാം

സണ്ണി ചോദിച്ചു

“മരിയ എവിടെ..? അവളെ കൂടി വിളിക്കട്ടെ

അമല അതും പറഞ്ഞ് അടുക്കളയിലേക്ക് ചെന്നപ്പോഴാണ് സോളമന് ആശ്വാസമായത്. പിന്നെയും സണ്ണിയും ജോണും എന്തൊക്കെയോ പറയുന്നുണ്ട്. ഇടയ്ക്കിടെ സോളമന്റെ കണ്ണുകൾ ഡൈനിങ് റൂമിലേക്ക് ചെന്നു. അടുക്കളയിലേക്ക് ചെന്ന് അമല അവളോട് ഭക്ഷണം കഴിക്കാൻ പറയുന്നത് കേട്ടിരുന്നു.

” ഇതും കൂടി കഴിഞ്ഞിട്ട് കഴിക്കാം ആന്റി, ഇല്ലെങ്കിൽ പിന്നെ ഒരുപാട് ആകും.

“ഈ പാത്രം ഒക്കെ കഴുകി കഴിയുമ്പോഴേക്കും വൈകുന്നേരം ആകും അതുവരെ നിനക്ക് ഇവിടെ നിൽക്കാൻ പറ്റുമോ..? ബെറ്റി…

ഉറക്കെ അമല വിളിച്ചപ്പോൾ ബെറ്റി അരികിലേക്ക് വന്നിരുന്നു.

” ഇവൾ ഞങ്ങടെ കൂടെ വരാനുള്ളതല്ലേ ഈ പാത്രം ഒക്കെ കഴുകിയിട്ട് ഇനി എപ്പോ വരാനാ.?

അമല അല്പം താല്പര്യക്കുറവോടെ തന്നെ ബെറ്റിയോട് ചോദിച്ചു.

” അയ്യോ ഞാൻ അത് ശ്രദ്ധിച്ചില്ല.!നീ ആ പാത്രം അവിടെ ഇട്ടോ എന്നിട്ട് വേഗം ചെല്ലാൻ നോക്ക്,

ബെറ്റി പറഞ്ഞു

” അതിന് അവൾ ഇതുവരെ ഒന്നും കഴിച്ചില്ലല്ലോ

അമല പറഞ്ഞപ്പോഴാണ് ബെറ്റി ആ കാര്യം ശ്രദ്ധിച്ചത്.

” നീ ഇതുവരെ കഴിച്ചില്ലേ

ബെറ്റി അവളോട് ആയി ചോദിച്ചു

എന്തു മറുപടി പറയണമെന്ന് അറിയാതെ നിൽക്കുകയായിരുന്നു മരിയ.

” അവൾക്ക് ഇവിടെ വന്നു കഴിഞ്ഞ് പിന്നെ പണികൾ ഒഴിഞ്ഞ് നേരമില്ലല്ലോ. പിന്നെങ്ങനെ കഴിക്കാനാ.? നീ അതൊന്നും ശ്രെദ്ധിക്കുന്നുമില്ല

അല്പം ദേഷ്യത്തോടെ തന്നെയാണ് അമലയതിന് മറുപടി പറഞ്ഞത്.

” നീ വേഗം പോയി ഭക്ഷണം കഴിക്കാൻ നോക്ക് മരിയെ, നമുക്ക് പെട്ടെന്ന് പോകേണ്ടത് ആണ്

അമല പറഞ്ഞപ്പോൾ ബെറ്റിയുടെ മുഖത്തേക്ക് മരിയ ഒന്ന് നോക്കി. ബെറ്റി തന്നെ പ്ലേറ്റിൽ അവൾക്കുള്ള ഭക്ഷണം എടുത്തു കൊടുത്തിരുന്നു. അടുക്കളയിലുള്ള ചെറിയൊരു കസേരയിൽ ഇരുന്നു തന്നെയാണ് അവളത് കഴിച്ചത്. ആ സമയം കൊണ്ട് പാത്രങ്ങളൊക്കെ കഴുകിയത് ബേറ്റിയാണ് കുറച്ചുസമയം അമല ബെറ്റിയോട് ഒന്നും സംസാരിച്ചില്ല. അവരുടെ നിസ്സംഗമായ രീതികൾ ഒന്നും തന്നെ അമലയ്ക്ക് ഇഷ്ടപ്പെട്ടില്ല എന്നതാണ് സത്യം. കുറച്ചൊക്കെ പ്രതികരിക്കുക തന്നെ വേണം മരിയുടെ സ്ഥാനത്ത് തന്റെ മകളായിരുന്നു എങ്കിൽ താൻ ഇങ്ങനെ പ്രതികരിക്കുമായിരുന്നോ.?ഒരിക്കലുമില്ല തന്റെ മകൾക്ക് വേണ്ടി താൻ ശബ്ദമുയർത്തുമായിരുന്നു. എന്നാൽ ബെറ്റി എന്തുകൊണ്ടാണ് അങ്ങനെ ചെയ്യാതിരിക്കുന്നത്.? അത് അമലയിലും ഒരു വല്ലാത്ത വേദന തന്നെ നിറച്ചിരുന്നു. ഭക്ഷണം കഴിച്ചു കഴിഞ്ഞതും ആ പ്ലേറ്റും കഴുകിയാണ് മരിയ പുറത്തേക്ക് വന്നത്. എല്ലാവരോടും അമലയും കുടുംബവും യാത്ര പറഞ്ഞിരുന്നു. ബെറ്റിയല്ലാതെ മറ്റാരും തന്നെ മരിയയുടെ സംസാരിക്കുന്നത് അമല കണ്ടിരുന്നില്ല. ഒന്നും തന്നെ അവളോട് പറയുകയോ യാത്ര പറയുകയോ ചെയ്തിരുന്നില്ല. അത് വലിയൊരു വേദന തന്നെയാണ് അമലയിലും നിറച്ചത്. എന്നാൽ അത് മരിയയ്ക്ക് തോന്നാതിരിക്കാൻ വേണ്ടി അറിഞ്ഞതായി അമല ഭാവിക്കുകയും ചെയ്തില്ല.. വണ്ടിയിലേക്ക് കയറിയപ്പോൾ ബെറ്റിയുടെ കണ്ണുകൾ നിറയുന്നത് അമല കണ്ടിരുന്നു. പ്രതികരിക്കേണ്ട സ്ഥലത്ത് പ്രതികരിക്കാതെ ആവശ്യമില്ലാത്ത ഈ കണ്ണുനീർ ഒഴുക്കുന്നത് ഒരു വലിയ ബുദ്ധിമുട്ട് തന്നെയാണെന്ന് ഒരു നിമിഷം അമല ഓർത്തു. സ്വന്തം മകളെ ഒന്ന് ചേർത്ത് പിടിക്കാൻ ധൈര്യമില്ലാത്തവൾ എന്തിനാണ് അവൾക്കു വേണ്ടി കണ്ണുനീർ ചിന്തുന്നത് എന്നാണ് ആ നിമിഷം അമല ചിന്തിച്ചത്. സോളമന്റെ മനസ്സിലും അതേ ചിന്തയായിരുന്നു. അതോടൊപ്പം എങ്ങനെയെങ്കിലും ഇവിടെ നിന്നും മരിയയെ രക്ഷപ്പെടുത്താൻ സാധിച്ചല്ലോ എന്ന ആശ്വാസവും…കാത്തിരിക്കൂ………

മുന്നത്തെ പാർട്ടുകൾ വായിക്കാൻ ഇവിടെ ക്ലിക്ക് ചെയ്യുക…