🎶 സോളമന്റെ ഉത്തമഗീതം 🎶❤️: ഭാഗം 30

രചന: റിൻസി പ്രിൻസ്‌

അവളുടെ ആ കൂട്ടുകാരിയുടെ ആ മോനില്ലേ..? ആ ചെറുക്കൻ നല്ല മിടുക്കനാ അല്ലെ..?

ജെസ്സി തഞ്ചത്തിൽ തന്റെ വിഷയം ജേഷ്ഠനോട് അവതരിപ്പിക്കാനായി ചോദിച്ചു..

” കുഴപ്പമില്ല..! കുറച്ച് ജാഡ പാർട്ടി ആണെന്ന് തോന്നുന്നു

” ഒരു ഡോക്ടറല്ലേ അതിന്റെ ജാഡയൊക്കെ അവന് കാണും, അതൊന്നും സാരമില്ലെന്നേ, നമ്മുടെ ജീന മോൾക്ക് വേണ്ടി ആ ചെറുക്കനെ ഒന്ന് ആലോചിച്ചാലോ..?

അവൾ ചോദിച്ചു

‘ നീയെന്താ ഉദ്ദേശിക്കുന്നത്..?

‘ ഞാൻ ഉദ്ദേശിച്ച കാര്യം തന്നെയാണ് ഏട്ടനോട് പറഞ്ഞത് ആ ചെക്കനെ നമ്മുടെ ജീന മോൾക്ക് വേണ്ടി ഒന്ന് ആലോചിക്കാൻ…..

” അതിനു അവര് സമ്മതിക്കുമോന്നാ..? അവരുടെ ഒറ്റമോനല്ലേ..? മാത്രമല്ല ഡോക്ടർ, നമ്മളെപ്പോലെ ഒരു മിഡിൽ ക്ലാസ് ഫാമിലിയിൽ നിന്നുള്ള കല്യാണമൊക്കെ അവർ സമ്മതിക്കുവോന്ന് അറിയില്ലല്ലോ.

‘ സമ്മതിക്കാതിരിക്കാനും മാത്രം എന്താ എന്റെ മോൾക്ക് കുഴപ്പം..? സൗന്ദര്യം ഇല്ലേ.? കഴിവില്ലേ..? പിന്നെ അവൾ ഡോക്ടർ അല്ലേ? എംബിബിഎസ് അല്ലാന്ന് മാത്രമല്ലേ ഉള്ളൂ, അതൊക്കെ സമ്മതിച്ചു… പക്ഷേ അവരുടെ ആസ്തി ഒക്കെ എത്രയാണെന്ന് ഞാൻ പറയാതെ തന്നെ നിനക്കറിയാമല്ലോ..? ഇത്രയും പണം ഒക്കെ ഉള്ളവർ നമ്മളെ പോലെ ഇടത്തരക്കാരുടെ ബന്ധത്തിന് സമ്മതം നൽകുമോ എന്ന് എനിക്കൊരു സംശയമുണ്ട്.. അതിനെക്കുറിച്ച് ആണ് ഞാൻ പറഞ്ഞത്,

” എനിക്ക് മനസ്സിലായി, അതാ ഞാൻ പറഞ്ഞത്, ഇച്ചായൻ തഞ്ചത്തിൽ അവരോട് ഒന്ന് സംസാരിക്കണം എന്ന്. അത് ആവുമ്പോ അതെങ്ങനെയാ പറയേണ്ടത് എന്ന് ഇച്ചായന് നന്നായിട്ട് അറിയാമല്ലോ, അങ്ങനെയൊന്ന് സംസാരിക്കുക, അപ്പൊൾ ചെലപ്പോ അവര് സമ്മതിച്ചാലോ.? ഇട്ടു മൂടാനുള്ള സ്വത്തും കാര്യങ്ങളും ഉണ്ട് ആ ചെറുക്കന്റെ പേരിൽ, ഏതാണ്ട് രണ്ട് തലമുറയ്ക്ക് ഇരുന്ന് ഉണ്ണാൻ ഉള്ളത് അവരു ഉണ്ടാക്കി വച്ചിട്ടുണ്ട്. എന്റെ അവസ്ഥയൊക്കെ ഇച്ചായന് നന്നായിട്ട് അറിയാവുന്നതല്ലേ..? ഇവൾക്ക് താഴെ ഉള്ളതും ഒരു പെങ്കൊച്ച്, അവളെയും കൂടി എങ്ങനെയെങ്കിലും ഒന്ന് പറഞ്ഞയക്കണം. ഈയൊരു കല്യാണം നടക്കുകയാണെങ്കിൽ ഇവളുടെ ജീവിതം ഏതാണ്ട് നല്ല രീതിയിൽ മുന്നോട്ട് പോയി എന്ന് പറഞ്ഞാൽ മതി. അവരുടെ രണ്ടുപേരുടെയും ഒറ്റമോൻ അല്ലേ..? രണ്ടുപേർക്കും ഇട്ടു മൂടാനുള്ള സ്വത്ത്, എല്ലാം കൊണ്ടും എന്റെ കൊച്ചിന്റെ ജീവിതം സുഖമായിരിക്കും എന്നാണ് എന്റെ ഒരു വിശ്വാസം. അതുകൊണ്ട് ഈ ഒരു കല്യാണം നടക്കണമെന്ന് ആണ് എന്റെ ആഗ്രഹം. മാത്രമല്ല അവനെ ഇടയ്ക്കിടയ്ക്ക് നമ്മുടെ കൊച്ചിനെ നോക്കുകയും ചെയ്യുന്നുണ്ടായിരുന്നു. അമലയാണെങ്കിലും വലിയ വർത്തമാനം ആയിരുന്നു അവളോട്… എനിക്ക് തോന്നുന്നത് അമലക്കും അവളെ ഭയങ്കര ഇഷ്ടപ്പെട്ടെന്ന് ആണ്.. എല്ലാം കൊണ്ടും നല്ല കാര്യമാണ് എന്നാണ് എനിക്ക് തോന്നുന്നത്. തഞ്ചത്തിൽ ഒന്നു പറഞ്ഞാൽ സണ്ണിയും അമലയും കേൾക്കും. അവർക്കും നമ്മുടെ കൊച്ചിനെ ഇഷ്ടപ്പെട്ടിട്ടുണ്ട്. ഇപ്പോൾ എടുത്തടിച്ച പോലെ പെട്ടെന്ന് ഒന്നും പറയണ്ട, ഇനി എപ്പോഴെങ്കിലും അവർ ഇവിടെ വരുമ്പോൾ നേരിട്ട് കാണുമ്പോഴോ മറ്റോ…

” നീ പറഞ്ഞത് ശരിയാണ്, ജീനയും അവനും തമ്മിലുള്ള കല്യാണം നടത്തുകയാണെങ്കിൽ നിന്റെ ജീവിതം നന്നായി എന്ന് പറയുന്നത് സത്യമാണ്. പക്ഷേ അതിന് ചില കാര്യങ്ങളൊക്കെ നമ്മൾ ഒന്ന് ശ്രദ്ധിക്കണം. ഒന്നാമത്തെ കാര്യം ഈ കാര്യത്തെക്കുറിച്ച് മറ്റാരും അറിയാൻ പാടില്ല. തൽക്കാലം ഞാനും നീയും മാത്രം ഇതറിഞ്ഞാൽ മതി, മനസ്സിലായോ..? എന്താണെന്ന് വെച്ചാൽ ഇതിപ്പോൾ ബെറ്റിയോ മറ്റോ അറിഞ്ഞാൽ അമലയോട് സംസാരിച്ചാൽ ചിലപ്പോൾ അമല സമ്മതിക്കാതെ വന്നാലോ..?

” ഞാനായിട്ട് അവളോട് പറയില്ലെന്ന് അറിയാല്ലോ ഈ കാര്യം, ഇനി ഇച്ചായൻ അവളോട് പറയാതിരുന്നാൽ മാത്രം മതി. എന്താണെങ്കിലും ഇതൊന്നു നടന്ന് കിട്ടിയ നമ്മൾ രക്ഷപ്പെട്ടു.

” നമ്മളെല്ല നീ രക്ഷപ്പെട്ടു എന്ന് പറഞ്ഞാൽ മതി.. ഈ കല്യാണം നടന്നാൽ ലാഭം മുഴുവൻ നിനക്ക് ആണ്.. എനിക്ക് പ്രത്യേകിച്ച് ഒരു ലാഭവും ഇല്ല. പിന്നെ കൂടപ്പിറപ്പ് നന്നാകട്ടെ എന്ന് കരുതി ഞാൻ സംസാരിക്കാം.

” അങ്ങനെ ഈ കല്യാണം നടന്നാൽ ഇച്ചായനെ ഞാൻ മറക്കത്തൊന്നുമില്ല.. ഈ കല്യാണം നടക്കുകയാണെങ്കിൽ എനിക്ക് തരാമെന്ന് പറഞ്ഞ് ആ 20 സെന്റ് സ്ഥലം എനിക്ക് വേണ്ട..! ഇച്ചായൻ എടുത്തോ

അവളുടെ ആ വാക്കിൽ ജോണി വീണു പോയിരുന്നു. സ്ഥലത്തിനോടും പണത്തിനോടും അത്രത്തോളം അത്യാഗ്രഹമാണ് അയാൾക്ക്. അതുകൊണ്ടുതന്നെ എങ്ങനെയും ആ വിവാഹം നടത്താം എന്ന തീരുമാനത്തിലേക്ക് അയാൾ എത്തിയിരുന്നു.

” സണ്ണിയോടും അമലയോടും എങ്ങനെയെങ്കിലും കാര്യങ്ങൾ സംസാരിച്ച് വിവാഹം നടത്താം

അയാൾ പറഞ്ഞു..

ആ നിമിഷം തന്നെ അയാൾ മനസ്സിൽ ചില കാര്യങ്ങൾ തീരുമാനിച്ചു ഉറപ്പിച്ചു കഴിഞ്ഞിരുന്നു.
💜

രാവിലെ കുളി കഴിഞ്ഞതും കോളേജിലേക്ക് പോകാൻ തയ്യാറെടുക്കുകയായിരുന്നു മരിയ. അതിനു മുൻപ് അവൾ അടുക്കളയിലേക്ക് ചെന്നിരുന്നു. അവിടെ എത്തിയപ്പോൾ പുട്ടും കടലക്കറിയും ഉണ്ടാക്കുകയാണ് അമല… അവൾ പെട്ടെന്ന് അവർക്ക് അരികിലേക്ക് ചെന്നു.

‘ആന്റി എന്തിനാ ഇത് രാവിലെ എഴുന്നേറ്റ് ഉണ്ടാക്കാൻ നിന്നത്. ഞാൻ രാവിലെ കുളി കഴിഞ്ഞ് ഇങ്ങോട്ട് വന്നതുകൊണ്ടാ താമസിച്ചേ, പിന്നെ എഴുന്നേൽക്കാൻ കുറച്ചു താമസിച്ചു…

” അത് സാരമില്ല മോൾ വരുന്നതിനു മുൻപേ ഞാൻ ആയിരുന്നില്ലേ ഇവിടെയെല്ലാം ഉണ്ടാക്കിക്കൊണ്ടിരുന്നത്. മാത്രമല്ല മോൾക്ക് രാവിലെ കോളേജിൽ പോകാനുള്ളതല്ലേ..? അതിനിടയിൽ ഇനി അടുക്കളയിൽ കയറി ആഹാര ഉണ്ടാക്കി എപ്പഴാ,

” അയ്യോ എങ്കിലും ആന്റി ഇന്നലെ യാത്ര ചെയ്ത് ക്ഷീണിച്ചു വന്നിട്ട്, എന്നെ ഒന്ന് വിളിച്ചിരുന്നെങ്കിൽ ഞാൻ വന്നു ഉണ്ടാക്കുമായിരുന്നല്ലോ.

” അതിനിപ്പോ എന്താ..? നീ ആണെങ്കിലും ക്ഷീണിച്ചു നില്കുവല്ലേ..? അപ്പോൾ ആരേലും ആഹാരം ഉണ്ടാക്കിയാൽ പോരെ..? മാത്രമല്ല നിന്നെ ഇവിടെ കൊണ്ട് വന്നത് ഇവിടുത്തെ ജോലി ചെയ്യാൻ വേണ്ടിയൊന്നുമല്ല. പഠിക്കാൻ വേണ്ടിയാണ്. അതിൽ കൂടുതൽ ശ്രദ്ധ കൊടുക്ക്.. പിന്നെ നിന്റെ വീട്ടിലെ പോലെ നീ ജോലി ചെയ്തില്ല എന്നും പറഞ്ഞ് ഇവിടെ നിന്നെ ആരും വഴക്കു പറയാൻ ഒന്നും വരില്ല. പഠിച്ചു നല്ലൊരു ജോലി മേടിക്കണം, അതുമാത്രമേ ഉള്ളൂ ആന്റിക്ക്.

വാത്സല്യത്തോടെ അവളുടെ തലമുടി ഇഴകളിൽ തലോടി അമല അത് പറഞ്ഞപ്പോൾ അവളുടെ ഉള്ളിൽ എവിടെയോ ഒരു വല്ലാത്ത കുറ്റബോധം അലതല്ലുന്നത് അവൾ അറിയുന്നുണ്ടായിരുന്നു.. ഇത്രയും സ്നേഹത്തോടെയും ആത്മാർത്ഥതയോടെയും തന്റെ അരികിൽ നിൽക്കുന്ന ഈ സ്ത്രീയെ ആണല്ലോ താൻ പറ്റിക്കുന്നത് എന്നൊരു ചിന്ത. പക്ഷേ മനസ്സിൽ നിറഞ്ഞു നിൽക്കുന്ന സന്തോഷത്തിനും സമാധാനത്തിനും കാരണക്കാരൻ ആ ഒരുവൻ മാത്രമാണ്.. ആ ചിന്തയിലേക്ക് ഒരുപാട് കാട് കയറാൻ അവൾ അപ്പോൾ ആഗ്രഹിച്ചിരുന്നില്ല.

” അങ്കിളിനെ ചായ കൊടുത്തോ..?

” ഇല്ല മോളെ അങ്കിൾ വെളുപ്പിനെ പോയി, ഒരു സർജറി ഉണ്ടായിരുന്നു ഹോസ്പിറ്റലിൽ നിന്ന് വിളിച്ചപ്പോൾ രാവിലെ തന്നെ അങ്കിൾ പോയി. ഇല്ലായിരുന്നെങ്കിൽ മോളെ കൂടി കൊണ്ടുപോകാമെന്ന് പറഞ്ഞാ ഇന്നലെ രാത്രി കിടന്നത്.. എന്നോട് പറഞ്ഞു ഒരു യൂബർ വിളിച്ച് നിന്നെ പറഞ്ഞു വിടാൻ

“എന്തിന്? അതിന്റെ ഒന്നും ആവശ്യമില്ല,

“മോൾ കുറച്ച് ദിവസം ആയില്ലേ പോയിട്ട്, വഴി വീണ്ടും എല്ലാം മറന്നിട്ടുണ്ടാവില്ലേ..?

” അങ്ങനെയൊന്നുമില്ല, എനിക്ക് ഒരു വഴി ഒരുവട്ടം പോയ നല്ല നിശ്ചയം ആണ്… അതുകൊണ്ട് അങ്ങനെ ടെൻഷൻ ഒന്നും വേണ്ട, ഏതായാലും ആന്റി പുട്ടും കടലയും ഉണ്ടാക്കിയാലോ ഉച്ചക്കത്തേക്ക് എന്തെങ്കിലും അരിയാനോ മറ്റോ ഉണ്ടെങ്കിൽ ഞാൻ വേഗം അരിഞ്ഞു തരാം.. എനിക്ക് കുറച്ച് സമയം കൂടി ഉണ്ട് ബസ് വരാൻ വേണ്ടി.

” എനിക്ക് ഇവിടെ ഒന്നും ആവശ്യമില്ല കൊച്ചേ… നീ ചെന്ന് ഒരുങ്ങാൻ നോക്ക്, അതല്ല സമയം ബാക്കിയുണ്ടെങ്കിൽ കുറച്ച് നേരം ഇരുന്ന് പഠിക്ക്. നിങ്ങളെല്ലാവരും പോയിക്കഴിയുമ്പോൾ എനിക്ക് മാത്രമായിട്ട് ഞാൻ അങ്ങനെ ഒന്നും ഉണ്ടാകില്ല. ചിലപ്പോൾ ഇത്തിരി ഓട്സ് കഴിക്കും. അല്ലെങ്കിൽ ഇവിടെ എന്തെങ്കിലും കാണും, അല്ലേൽ ഫ്രൂട്ട്സ് കട്ട് ചെയ്ത് കഴിക്കാം. ഉച്ചയ്ക്ക് അങ്ങനെ ഒന്നും വേണമെന്ന് നിർബന്ധമില്ല.. പിന്നെ ഞാൻ താഴെ ഫ്ലാറ്റിലെ ലില്ലി ആന്റിയുടെ അടുത്തേക്ക് ഒന്ന് പോവാ, രാവിലെ അങ്ങോട്ട് ചെല്ലണമെന്ന് അവര് പറഞ്ഞതായിരുന്നു.. ഒന്ന് പോയിട്ട് ഓടി വരാം.. സോളമൻ എഴുന്നേൽക്കുകയാണെങ്കിൽ ഫ്ലാസ്ക്കിൽ ചായ ഇരിപ്പുണ്ട്, ചായ കൊടുത്തേക്കണേ.. ഓരോ ദിവസവും ഓരോ മൂഡാ ഇന്നലെ ചായ മതി എന്നായിരുന്നു രാവിലെ പറഞ്ഞത്. ഇന്നിനി രാവിലെ രുചി കേറുന്നത് എന്തിനാണ് എന്ന് ആർക്കറിയാം? കാപ്പി ആണെങ്കിൽ സമയമുണ്ടെങ്കിൽ ഒന്ന് ഇട്ടു കൊടുത്തേക്ക്. മിക്കവാറും ഇപ്പോഴെങ്കിലും എഴുനേൽക്കുന്ന ലക്ഷണമില്ല, ഉച്ചയ്ക്കോ മറ്റോ കയറിയാൽ മതി അതുകൊണ്ട് ഒരു 11 മണിയാവുമ്പോഴേ എഴുന്നേറ്റു വരു, എന്നാലും രാവിലെ തന്നെ ഒരു കപ്പ് കിട്ടാതെ കട്ടിലിൽ നിന്ന് എഴുന്നേൽകുമെന്ന് തോന്നുന്നില്ല. വേണമെങ്കിൽ കാപ്പിയും ചായയും കിട്ടാത്തതുകൊണ്ട് ആ കിടപ്പ് അവിടെത്തന്നെ കിടക്കും. പിന്നെ ഉണർത്താൻ വേണ്ടി ഞാൻ അവനോട് മൽപ്പിടുത്തം നടത്തേണ്ടിവരും., അതുകൊണ്ട് ഞാൻ പോയിട്ട് മോള് പോകുന്ന സമയത്തിന് മുമ്പ് വരാം.. നീ ഒരുങ്ങി കഴിഞ്ഞാൽ എടുത്ത് കഴിച്ചോണം, ഞാൻ എല്ലാമെടുത്ത് ഡൈനിങ് ടേബിളിൽ വയ്‌ക്കുന്നുണ്ട്. എല്ലാം എടുത്ത് കഴിച്ചിട്ട് പോകാവൂ. ഞാൻ ഇത്തിരി വരാൻ താമസിച്ചു എന്ന് പറഞ്ഞ് പട്ടിണി പോയേക്കരുത്, ആ നീല ഫ്ലാസ്കിൽ കുറച്ച് പാലുകാച്ചി ഞാൻ വെച്ചിട്ടുണ്ട്. അതും കൂടി എടുത്തു കുടിക്കണം, ഉച്ചവരെ ഇരിക്കേണ്ടത് അല്ലേ..?ഉച്ചയ്ക്ക് പിന്നെ അവിടുന്ന് കിട്ടുന്ന ഭക്ഷണം, നിങ്ങൾക്ക് ഇഷ്ടപ്പെടുമോന്ന് എങ്ങനെ അറിയാം..? അവിടുത്തെ ഭക്ഷണം ഒക്കെ ഒരുമാതിരി ആണ്. അതുകൊണ്ട് ഇവിടുന്ന് രാവിലെ നന്നായി വല്ലോം കഴിച്ചിട്ട് പോയാൽ മതി.

അതും പറഞ്ഞു അമല തന്റെ ജോലികൾ തുടർന്നപ്പോൾ മനസ്സ് തുറന്ന് ചിരിക്കാൻ അവൾക്ക് സാധിച്ചിരുന്നില്ല. താനെന്തോ തെറ്റ് ചെയ്യുന്നതുപോലെയാണ് അവളുടെ മനസ്സിൽ ആ നിമിഷം തോന്നിയിരുന്നത്, അവളോട് യാത്ര പറഞ്ഞ് അമല പോയതും പുറകെ സോളമന്റെ ശബ്ദം അടുക്കളയിലേക്ക് എത്തിയിരുന്നു..

” മമ്മ ഒരു കാപ്പി…

അവൻ വിളിച്ചു പറഞ്ഞപ്പോൾ തന്നെ അവൾക്ക് ഒരു പ്രത്യേക ഉല്ലാസവും തോന്നി. പെട്ടെന്ന് അവൾ അടുക്കളയിലേക്ക് ചെന്ന് കാപ്പി ഇടാൻ തുടങ്ങി. അത്രയും പ്രിയപ്പെട്ടവന് വേണ്ടി ഇടുന്നത് ആയതുകൊണ്ട് തന്നെ അത് വളരെ മികച്ചതാവണമെന്ന് അവൾക്കൊരു നിർബന്ധം ഉണ്ടായിരുന്നു. എന്തൊക്കെ രുചിക്കൂട്ടുകൾ അതിൽ ചേർക്കാൻ സാധിക്കുമോ അതൊക്കെ ഇട്ട് അത്രമേൽ രുചികരമായി ഉണ്ടാക്കാൻ അവൾ ശ്രമിച്ചു. തനിക്ക് വരുന്ന മാറ്റങ്ങളെ അത്ഭുതപൂർവ്വം അവൾ നോക്കി കാണിക്കുകയായിരുന്നു. കാപ്പിയിട്ട് കഴിഞ്ഞതും അതുമായി അവന്റെ അരികിലേക്ക് പോകാൻ തുടങ്ങിയപ്പോൾ വല്ലാത്തൊരു സന്തോഷവും ഉത്സാഹവും തന്നെ വലയം ചെയ്യുന്നത് അവൾ അറിഞ്ഞു…..കാത്തിരിക്കൂ………

മുന്നത്തെ പാർട്ടുകൾ വായിക്കാൻ ഇവിടെ ക്ലിക്ക് ചെയ്യുക…