🎶 സോളമന്റെ ഉത്തമഗീതം 🎶❤️: ഭാഗം 43

രചന: റിൻസി പ്രിൻസ്‌

അതൊക്കെ പറയാം എനിക്ക് ചില കാര്യങ്ങൾ അപ്പോൾ തന്നെ തന്നില്ലെങ്കിൽ ഒരു സമാധാനം ഉണ്ടാവില്ല. നീ അടുക്കളയിൽ വച്ച് ഒരു കാര്യം തന്നില്ലേ അത് തിരിച്ചു വരാൻ വേണ്ടി വന്നതാ…

“മോളെ….

പുറത്ത് അമല കതകിൽ കൊട്ടിയപ്പോൾ രണ്ടുപേരും ഒരേ പോലെ ഞെട്ടിപ്പോയിരുന്നു

എന്തുചെയ്യണമെന്നറിയാതെ പെട്ടെന്ന് അവന്റെ മുഖത്തേക്ക് ആധിയോടെ അവൾ നോക്കി. ഒരു നിമിഷം എന്ത് ചെയ്യണം എന്ന് സോളമനുമറിയില്ലായിരുന്നു.

മുറിക്കകത്തേക്ക് അമല കയറി വന്നാൽ തന്നെ കാണുമെന്ന് ഉറപ്പാണ്. ആ നിമിഷം മരിയയെ കുറിച്ചാണ് ചിന്തിച്ചത് അവൾക്ക് വരാൻ പോകുന്ന മാനഹാനിയെ കുറിച്ച്…

ധൈര്യം വീണ്ടെടുത്തുകൊണ്ട് അവൾടെ മുഖത്തേക്ക് നോക്കി മിണ്ടരുത് എന്ന് അവൻ ആംഗ്യം കാണിച്ചു. ശേഷം നേരെ ഭിത്തിയുടെ അരികിലേക്ക് ചേർന്നു നിന്നു.. കതക് തുറക്കുകയാണെങ്കിൽ അത് അവനെ മൂടിയാണ് നിൽക്കുന്നത്.

ഒന്നും മിണ്ടാതെ കതക് തുറക്കാൻ അവൻ ആംഗ്യം കാണിച്ചപ്പോൾ ഭയത്തോടെ നിൽക്കുകയാണ് അവൾ. വീണ്ടും അവൻ തന്നെ കാണിച്ചപ്പോൾ അല്പം ഭയത്തോടെ ആണെങ്കിലും അവൾ ഡോറിന്റെ ലോക്ക് എടുത്തു മുഴുവൻ തുറക്കാതെ പകുതി മാത്രം ഡോർ തുറന്നു…

മുൻപിൽ അമലയെ കണ്ടതും അവളുടെ ശരീരത്തിലൂടെ ഒരു വിറയൽ കടന്നു പോയിരുന്നു.

.” എന്താ ആന്റി ഈ സമയത്ത്.. എന്തെങ്കിലും വയ്യാഴ്കയോ മറ്റോ വന്നോ. അവൾ അമലയുടെ മുഖത്തേക്ക് നോക്കിക്കൊണ്ട് ചോദിച്ചു…

” ഇല്ല മോളെ… കിടന്നിട്ട് ഉറക്കം വന്നില്ല, മോളെ ഒന്ന് കാണാമെന്ന് കരുതി..

” കട്ടൻകാപ്പിയോ അങ്ങനെ എന്തെങ്കിലും വേണോ..?

” വേണ്ട മോളെ കുറച്ചു മുമ്പ് ആരോ നടക്കുന്നത് പോലെ തോന്നി… അപ്പോൾ ഞാൻ വിചാരിച്ചു മോൾ ഉണർന്നതായിരിക്കും, മോൾ അടുക്കളയിൽ പോയതോ മറ്റോ ആവും എന്ന്.. ഉറങ്ങിയില്ലെങ്കിൽ മോളോട് കുറച്ചു നേരം സംസാരിച്ചിരിക്കാം എന്ന് കരുതി…

അതുകേട്ടതും സോളമൻ തലയിൽ കൈവച്ചു പോയി. സംസാരിക്കാനായി മമ്മ റൂമിലേക്ക് കയറി കട്ടിലിൽ ഇരുന്നാൽ തീർച്ചയായും തന്നെ കാണും,

” ഞാൻ എഴുന്നേറ്റില്ലല്ലോ ആന്റി,

“ആണോ എങ്കിൽ പിന്നെ എനിക്ക് തോന്നിയതാവും, മോള് ഒരുപാട് ക്ഷീണിച്ചു കിടക്കുകയല്ലേ.. രാവിലെ പഠിക്കാൻ പോകേണ്ടതല്ലേ, എങ്കിൽ പിന്നെ കിടന്നോ, ഞാൻ മോളാണെന്ന് ഓർത്താ വിളിച്ചത്,..

“ഞാൻ വേണമെങ്കിൽ വരാം ആന്റി…

” വേണ്ട മോളുടെ ഉറക്കം കളയണ്ട, നമുക്ക് രാവിലെ സംസാരിക്കാം…

വല്ലാത്തൊരു ആശ്വാസം സോളമനും തോന്നിയിരുന്നു. അമലയോട് ശരിയെന്ന് പറഞ്ഞതിനു ശേഷം അവൾ കതകടച്ചു…

ആ നിമിഷം അവൾ കൂർപ്പിച്ച് അവനെ ഒന്ന് നോക്കി, അവളുടെ നോട്ടത്തിൽ വലിയ ദേഷ്യം ഉണ്ടെന്ന് അവന് മനസ്സിലാക്കാൻ സാധിക്കുന്നുണ്ടായിരുന്നു…

” എന്തിനാ ഈ സമയത്ത് ഇങ്ങോട്ട് വന്നത്..? വളരെ പതുക്കെ അടക്കിപ്പിടിച്ച് അവൾ ചോദിച്ചു, ആന്റി കണ്ടിരുന്നെങ്കിൽ എന്താവുമാരുന്നു..?

” കണ്ടില്ലല്ലോ

“ഇനി ഇങ്ങനെ ഒന്നും വേണ്ടാട്ടോ ഇച്ചായാ, എനിക്ക് പേടി വന്നിട്ട് വയ്യ…

“ഇല്ല, ഇനി ഇങ്ങനെ ഉണ്ടാവില്ല. എനിക്ക് കിടന്നിട്ട് ഉറക്കം വന്നില്ല. നിന്നോട് ഉറങ്ങുന്നതിനു മുന്നേ സംസാരിക്കാൻ വന്നതാ, വൈകുന്നേരം നിന്നോട് സംസാരിക്കാൻ പറ്റിയില്ലല്ലോ, ഒന്ന് സംസാരിക്കണം എന്ന് തോന്നി…

ഭയന്നിരിക്കുന്ന അവളുടെ മുഖത്തേക്ക് നോക്കി ആ തോളിൽ പിടിച്ച് അവൻ പറഞ്ഞു. അവൾ ഒരു നേർത്ത പുഞ്ചിരി അവന് സമ്മാനിച്ചു… ഒന്നും പറയാതെ അവളുടെ മുഖം കൈകളിൽ എടുത്ത് കുറച്ചുനേരം അവൻ നോക്കി നിന്നു.. വല്ലാത്തൊരു വാത്സല്യമാണ് അവന് അവളോട് തോന്നിയത്. പിന്നെ ആ മുഖം ഒന്ന് തഴുകി മുഖത്തേക്ക് വീണുകിടക്കുന്ന മുടി പിന്നിലേക്ക് ഒതുക്കി വച്ച് ഏറെ സ്നേഹത്തോടെ അവളുടെ നെറ്റിയിൽ അവന്റെ ചുണ്ടുകൾ പതിഞ്ഞു. ഒരു സംരക്ഷണ മുദ്ര പോലെ…

” ഇനി കിടന്നോ ഞാൻ പോവുകയാണ്…

അതും പറഞ്ഞ് അവൻ ഡോർ തുറന്നപ്പോൾ പുറത്തെ സെറ്റിയിൽ ഇരുന്ന് എന്തോ വായിക്കുന്ന അമലയാണ് കണ്ടത്.. അവൻ പെട്ടെന്ന് തന്നെ ഡോർ അടച്ചു…

കാര്യം മനസ്സിലാവാതെ അവൾ അവന്റെ മുഖത്തേക്ക് നോക്കി

” മമ്മ പോയി കിടന്നിട്ടില്ല, വെളിയിൽ ഉണ്ട്…

“അയ്യോ അപ്പൊൾ എന്ത് ചെയ്യും.?

” എന്ത് ചെയ്യാൻ, മമ്മ പോയതിനു ശേഷം അല്ലേ ഇനി പോകാൻ പറ്റു,

“ആന്റി ഇച്ചായന്റെ റൂമിലേക്ക് പോയി വിളിച്ചാലോ..? അപ്പൊൾ ഇച്ചായൻ അവിടെ ഇല്ലെന്ന് മനസ്സിലാകില്ലേ..? അവൾ പറഞ്ഞത് ആലോചിക്കേണ്ട ഒരു കാര്യമാണെന്ന് സോളമന് തോന്നിയിരുന്നു… പക്ഷേ അവളെ ഭയപ്പെടുത്താൻ അവൻ തയ്യാറായിരുന്നില്ല….

” അങ്ങനെ ഒന്നും വരില്ല, ഉറക്കത്തിൽ വിളിക്കുന്നത് എനിക്കിഷ്ടമല്ല, അത് മമ്മയ്ക്ക് അറിയാം…

” അതുകൊണ്ട് എന്നെ അങ്ങനെ വിളിക്കുക ഒന്നുമില്ല, അതോർത്ത് താൻ ടെൻഷൻ അടിക്കേണ്ട,

“എങ്കിലും ഈ മുറിയിൽ ഇരുന്നാൽ എങ്ങനെയാ..? സ്വന്തം മുറിയിലേക്ക് പോകുന്നത് എങ്ങനെയാ..?

” അതാ ഞാൻ ഓർക്കുന്നത്..

“മമ്മ അവിടെ എന്തോ ഒരു പുസ്തകം വായിച്ചു കൊണ്ടിരിക്കുകയാണ്…

” എനിക്ക് പേടിയാവുന്നു…

അവൾ നിന്ന് വിറക്കാൻ തുടങ്ങി..

” നീ പേടിക്കൊന്നും വേണ്ട, ഇനി മമ്മ ഇങ്ങോട്ട് വരില്ല…

അവളെ അവൻ ആശ്വസിപ്പിച്ചു. കുറേ സമയം രണ്ടുപേരും ഉണർന്നിരുന്നു, എങ്കിലും അമല പോയിരുന്നില്ല…

” എനിക്ക് ഉറക്കം വരുന്നു. രാവിലെ ഞാൻ പോകുന്നുള്ളൂ

അതും പറഞ്ഞ് അവൻ കട്ടിലിലേക്ക് കയറി കിടന്നപ്പോൾ അവൾ അമ്പരന്നു പോയിരുന്നു..

” എന്താണ് ഈ കാണിക്കുന്നേ..? ഇവിടെ കിടക്കാൻ പോവാണോ..?

” പിന്നല്ലാതെ..? ഇനിയിപ്പോ മമ്മ റൂമിലേക്ക് പോകുന്നത് എപ്പോഴാണ് എന്ന് അറിയില്ലല്ലോ , എനിക്കാണെങ്കിൽ രാവിലെ ഒരു സർജറി ഉണ്ട്.. നന്നായിട്ട് ഉറക്കം കിട്ടിയില്ലെങ്കിൽ അത് ശരിയാവില്ല.. അപ്പോൾ ഗുഡ് നൈറ്റ്, മമ്മ പോകുമ്പോൾ എന്നെ വിളിച്ചാൽ മതി.. ഞാൻ അപ്പൊൾ പൊയ്ക്കോളാം,

അതും പറഞ്ഞ് അവളെ ഗൗനിക്കാതെ കട്ടിലിലേക്ക് കയറി കിടക്കുന്നവനെ അവൾ അത്ഭുതത്തോടെ നോക്കി…

കുറെ സമയം കഴിഞ്ഞിട്ടും ഇടയ്ക്കിടെ വാതിൽ തുറന്നു നോക്കുകയും കുറ്റിയിടുകയും ചെയ്യുന്ന അവളെ കണ്ടവന് ചിരി വന്നു…

” മമ്മ പെട്ടെന്ന് തിരിഞ്ഞു നോക്കുമ്പോൾ നീ കതക് തുറന്നു പിടിച്ചു നിൽക്കുന്ന കണ്ടാല് പിന്നെ സംശയം തോന്നും.. നീ ഇങ്ങനെ വടി പോലെ നിൽക്കാതെ ഇവിടെ വന്ന് കിടക്ക്… കുറച്ചുകഴിയുമ്പോൾ എഴുന്നേൽക്കാല്ലോ, അപ്പോഴേക്കും മമ്മ പോകും…

” എവിടെ കിടക്കാൻ..?

അവൾ സംശയത്തോടെ അവന്റെ മുഖത്തേക്ക് നോക്കി ചോദിച്ചു..

” ഇവിടെ നിനക്ക് കിടക്കാൻ ആവശ്യത്തിനു സ്ഥലമുണ്ട്,

താൻ കിടക്കുന്ന കട്ടിലിൽ കുറച്ചങ്ങോട്ട് നീങ്ങി അവൻ പറഞ്ഞപ്പോൾ അവൾ അവനെ തന്നെ തുറിച്ചു നോക്കി..

” നല്ല ഉദ്ദേശം…

അവൾ അവനെ കൂർപ്പിച്ചു നോക്കിക്കൊണ്ട് പറഞ്ഞു

” എന്റെ പൊന്നു മോളെ എനിക്ക് ഒരു ദുരുദ്ദേശവും ഇല്ല, നല്ല ഉറക്കം വരുന്നുണ്ട്. അതുകൊണ്ട് ആണ്, നിനക്ക് കൺട്രോൾ ഉണ്ടെങ്കിൽ നീ അങ്ങോട്ട് കിടന്നോ.? നീ എന്നെ ഒന്നും ചെയ്യാതിരുന്നാൽ മതി. എനിക്ക് നന്നായിട്ട് ഉറക്കം വരുന്നുണ്ട്.

അതും പറഞ്ഞ് അവൻ തിരിഞ്ഞു കിടന്നപ്പോൾ എന്ത് ചെയ്യണം എന്ന് അറിയാതെ നിന്നു പോയിരുന്നു മരിയ…കാത്തിരിക്കൂ………

മുന്നത്തെ പാർട്ടുകൾ വായിക്കാൻ ഇവിടെ ക്ലിക്ക് ചെയ്യുക…