കൊല്ലം കൊട്ടാരക്കരയിൽ വയോധികയെ ഭർത്താവ് കഴുത്തറുത്ത് കൊന്നു. വെട്ടിക്കവല ചിരട്ടക്കോണം സ്വദേശിനി 76കാരിയായ ഓമനയെയാണ് ഭർത്താവ് കുട്ടപ്പൻ കൊലപ്പെടുത്തിയത്. കുട്ടപ്പനെ പോലീസ് അറസ്റ്റ് ചെയ്തു. ഓമനയെ കൊലപ്പെടുത്തിയ വിവരം കുട്ടപ്പൻ മൂത്ത മകളെ വിളിച്ച് അറിയിക്കുകയായിരുന്നു.
കശുവണ്ടി ഫാക്ടറിയിലെ മുൻ ജീവനക്കാരിയായിരുന്നു ഓമന. ഇളയ മകൾക്കൊപ്പമാണ് ഓമനയും കുട്ടപ്പനും താമസിച്ചിരുന്നത്. മൂത്ത മകൾ അറിയിച്ചതനുസരിച്ച് ഇളയ മകൾ വാതിലിൽ തട്ടി വിളിച്ചപ്പോഴാണ് ഓമനയെ ചോരയിൽ കുളിച്ച നിലയിൽ കണ്ടത്. തുടർന്ന് പോലീസെത്തി കുട്ടപ്പനെ കസ്റ്റഡിയിലെടുത്ത് ചോദ്യം ചെയ്യുകയായിരുന്നു.
പെൻഷനായി ലഭിച്ച തുക ഓമന കുട്ടപ്പനറിയാതെ മറ്റൊരാൾക്ക് നൽകിയതാണ് കൊലപാതകത്തിന് കാരണം. തർക്കത്തിനിടെ കയ്യിലുണ്ടായിരുന്ന വെട്ടുകത്തി ഉപയോഗിച്ചാണ് കുട്ടപ്പൻ ഓമനയെ കൊലപ്പെടുത്തിയത്.
