പന്തിനെ ഞങ്ങളിങ്ങെടുക്കുവാ !!! ധോണിക്ക് പകരം സി എസ് കെക്ക് റിഷഭ് പന്തെത്തുമോ
ഞെട്ടിക്കുന്ന വെളിപ്പെടുത്തലുമായി സുരേഷ് റെയ്ന
ചെന്നൈ: അടുത്ത വര്‍ഷം നടക്കാനിരിക്കുന്ന ഇന്ത്യന്‍ പ്രീമിയര്‍ ലീഗിലെ താര ലേലം ആരംഭിക്കാനിരിക്കെ ഇന്ത്യന്‍ വിക്കറ്റ് കീപ്പറും ഡല്‍ഹിയുടെ ക്യാപ്റ്റനുമായിരുന്ന റിഷഭ് പന്തുമായി ബന്ധപ്പെട്ട് പുതിയ വെളിപ്പെടുത്തല്‍. ക്ലബ്ബില്‍ നിന്നുള്ള കൂടുമാറ്റ സൂചന നേരത്തേ നല്‍കിയതിന് പിന്നാലെ ക്യാപ്റ്റനെ നിലനിര്‍ത്തുന്നില്ലെന്ന് ഡല്‍ഹി ക്യാപിറ്റല്‍സ് വ്യക്തമാക്കിയതിന് പിന്നാലെയാണ് പുതിയ വെളിപ്പെടുത്തല്‍.
അടുത്ത സീസണില്‍ പന്ത്് സി എസ് കെക്കൊപ്പമുണ്ടാകുമെന്ന വെളിപ്പെടുത്തലുമായി കബ്ബിന്റെ മുന്‍ താരം കൂടിയായ സുരേഷ് റെയ്ന വ്യക്തമാക്കി.
സീസണിന് മുന്നോടിയായി നിലനിര്‍ത്തിയ താരങ്ങളുടെ പട്ടിക പുറത്തായിട്ടുണ്ട്. 10 ടീമുകളും തങ്ങളുടെ നിലനിര്‍ത്തലുകള്‍ പ്രഖ്യാപിച്ചപ്പോള്‍ അപ്രതീക്ഷിത പേരുകളും ഇതിനോടൊപ്പം ഉണ്ടായിരുന്നു. റിഷഭ് പന്ത്, മിച്ചല്‍ സ്റ്റാര്‍ക്ക്, ജോസ് ബട്ലര്‍, കെ എല്‍ രാഹുല്‍ എന്നിവരെല്ലാം ഒഴിവാക്കപ്പെട്ടവരുടെ പട്ടികയില്‍ ഉള്‍പ്പെട്ടുവെന്നതാണ് എല്ലാവരേയും ഞെട്ടിച്ചത്. ഇതില്‍ ഡല്‍ഹി നായകന്‍ റിഷഭ് പന്തിനെ ഒഴിവാക്കിയതാണ് ഏറ്റവും ശ്രദ്ധേയം.
റിക്കി പോണ്ടിങ് ഡല്‍ഹി ക്യാപിറ്റല്‍സ് പരിശീലകസ്ഥാനമൊഴിഞ്ഞ് പഞ്ചാബ് കിങ്സിലേക്കെത്തിയിരുന്നു. ഇതോടെ നായകസ്ഥാനത്തേക്ക് റിഷഭിനെ എത്തിക്കാനാണ് നീക്കമെന്നാണ് എല്ലാവരും കരുതിയിരിക്കുന്നത്. എന്നാല്‍ എല്ലാ അഭ്യൂഹങ്ങളും തള്ളി വമ്പന്‍ വെളിപ്പെടുത്തല്‍ നടത്തിയിരിക്കുകയാണ് മുന്‍ സിഎസ്‌കെ താരവും സൂപ്പര്‍ ഓള്‍റൗണ്ടറുമായിരുന്ന സുരേഷ് റെയ്ന. റിഷഭ് പന്ത് സിഎസ്‌കെയിലേക്കാണെന്ന വ്യക്തമായ സൂചന നല്‍കിയിരിക്കുകയാണ് റെയ്ന.
ധോണിക്കൊപ്പം റിഷഭിനെ കണ്ടു ഡല്‍ഹിയില്‍ വെച്ച് എംഎസ് ധോണിയെ കണ്ട ചിത്രം സുരേഷ് റെയ്ന പങ്കുവെച്ചിരുന്നു. എന്നാല്‍ അന്ന് ധോണിയെ ഡല്‍ഹിയില്‍വെച്ച് കണ്ടപ്പോള്‍ ഒപ്പം റിഷഭ് പന്തും ഉണ്ടായിരുന്നുവെന്നാണ് റെയ്ന പറഞ്ഞത്. ജിയോ സിനിമയില്‍ സംസാരിക്കവെയാണ് റെയ്ന ഇത് വെളിപ്പെടുത്തിയത്. ഇതില്‍ നിന്ന് തന്നെ സിഎസ്‌കെ റിഷഭുമായി ധാരണയിലെത്തിയിട്ടുണ്ടെന്ന് വ്യക്തം.
