🎶 സോളമന്റെ ഉത്തമഗീതം 🎶❤️: ഭാഗം 24

രചന: റിൻസി പ്രിൻസ്‌

ആരും കാണുന്നില്ല എന്ന് മനസ്സിലാക്കി അവളുടെ കൈകളിൽ ഒന്ന് തഴുകി. താൻ കൂടെയുണ്ട് എന്ന് ആശ്വസിപ്പിച്ചു. അത്രയും നേരം ഏറ്റ എല്ലാ അപമാനങ്ങൾക്കും മനസ്സിൽ കെട്ടി നിന്നിരുന്ന ദുഃഖങ്ങൾക്കും ഒരു വലിയ പരിഹാരമായിരുന്നു അവന്റെ ആശ്വസിപ്പിക്കൽ എന്ന് അവൾക്ക് തോന്നിയിരുന്നു. ആ നിമിഷം തന്നെ നിറകണ്ണുകളിൽ ഒരു പുഞ്ചിരി നിറഞ്ഞു. അതിൽ നിന്ന് തന്നെ തന്റെ ആശ്വസിപ്പിക്കലിൽ അവൾ എത്രത്തോളം സന്തോഷം നേടി എന്ന് അവനും മനസ്സിലാക്കാൻ സാധിച്ചു. ഇരുകണ്ണുകളും അടച്ച് അവളുടെ മുഖത്തേക്ക് നോക്കി നന്നായി ഒന്ന് പുഞ്ചിരിച്ചിരുന്നു സോളമൻ

അകത്തേക്ക് കയറിയപ്പോൾ തന്നെ ആരും കാണാതെ അവളുടെ കൈകൾ വിടുകയും ചെയ്തിരുന്നു സോളമൻ.

” നീയെന്താടി ഇവിടെ അതിഥികളെ പോലെ മിണ്ടാതെ നിൽക്കുന്നത്…? അടുക്കളയിൽ ചെന്ന് അവർക്ക് കുടിക്കാൻ എന്തെങ്കിലും എടുക്ക്,

ഒരു ആഞ്ജ പോലെ അകത്തേക്ക് കയറിയപ്പോൾ തന്നെ അവളെ നോക്കി ജെസ്സി പറഞ്ഞിരുന്നു. അവരുടെ വർത്തമാനവും രീതികളും ഒന്നും തുടക്കം മുതൽ തന്നെ സോളമനെ ഇഷ്ടമായിരുന്നില്ല. എങ്കിലും അത് മുഖത്ത് പ്രകടിപ്പിക്കാതെയാണ് അവൻ നിന്നത്. അവളോട് അങ്ങനെ പറഞ്ഞതും അവന് ഇഷ്ടപ്പെട്ടില്ല.

” അവൾ ഒരു യാത്രയൊക്കെ കഴിഞ്ഞ് ക്ഷീണിച്ചു വരല്ലേ ജെസ്സി, ഞാൻ എടുക്കാം ഞാൻ എല്ലാം കരുതി വച്ചിട്ടുണ്ട്.

അവരുടെ മുഖത്ത് നോക്കി ബെറ്റി പറഞ്ഞു. ഇപ്പോഴെങ്കിലും ഒന്ന് വാ തുറന്നല്ലോ എന്നുള്ള ഭാവം ആയിരുന്നു ആ സമയത്ത് ബെറ്റിയെ കണ്ടപ്പോൾ സോളമന് തോന്നിയത്. ബെറ്റി അകത്തേക്ക് പോയ പുറകെ തന്നെ കൂടെ മരിയയും അകത്തേക്ക് പോയിരുന്നു. ഇല്ലെങ്കിൽ പ്രശ്നമാണെന്ന് അവൾക്ക് തോന്നിയതുകൊണ്ടാണ് അവൾ അത്തരത്തിൽ ചെയ്തത് എന്ന് സോളമനും തോന്നി. ഇപ്പോൾ തങ്ങളെല്ലാവരും ഉണ്ടായിട്ടും ഇത്തരം ഒരു അവസ്ഥയിലൂടെയാണ് അവൾ കടന്നു പോകുന്നത് അപ്പോൾ ഇതിനു മുൻപ് അവളുടെ അവസ്ഥ എത്ര ബുദ്ധിമുട്ടേറിയതായിരിക്കുമെന്നാണ് അവൻ ചിന്തിച്ചത്. എന്തൊക്കെ അവൾ ഈ വീട്ടിൽ സഹിച്ചിട്ടുണ്ട്. ആരോടും പറയാതെ എത്രയോ രാത്രികളിൽ അവളുടെ തലയിണകൾ അവളുടെ കണ്ണുനീരിന്റെ ദുഃഖം പേറീട്ടുണ്ടാവും. ഒന്ന് ചേർത്തു പിടിക്കാൻ ആരുമില്ലാതെ എത്ര രാത്രികളിൽ അവൾക്ക് കണ്ണീരൊഴുക്കിയിട്ടുണ്ടാകും. അതൊക്കെ ഓർമിച്ചപ്പോൾ സോളമന് വല്ലാത്ത കരച്ചിൽ വന്നു. ആദ്യമായാണ് ഇത്തരമൊരു ചിന്ത തന്നെ കീഴടക്കുന്നത്. ഇന്നുവരെ ഒരു പെണ്ണിന് വേണ്ടി കരയേണ്ടി വന്നിട്ടില്ല. ഇതാദ്യമായാണ് മനസ്സ് മറ്റൊരുവളുടെ വേദനയിൽ ഉരുകുന്നത്. അകത്തേക്ക് പോയവളെ പുറത്തേക്ക് കാണാതെ വല്ലാത്തൊരു വീർപ്പുമുട്ടൽ സോളമൻ അനുഭവിക്കാൻ തുടങ്ങി.

ജെസ്സി ആണെങ്കിൽ കാര്യമായി അമലയോട് സംസാരിക്കുകയാണ്. പൊതുവേ ആരോടും ദേഷ്യപ്പെടുന്ന സ്വഭാവം അമലക്കില്ല. അതുകൊണ്ടു തന്നെ അവരുടെ രീതികൾ ഒന്നും ഇഷ്ടപ്പെട്ടില്ല എങ്കിൽ പോലും അത് മുഖത്ത് വരാത്ത രീതിയിലാണ് അമല സംസാരിക്കുന്നത്. അവരുടെ ഭരണവും രീതികളും ഒന്നും അമലക്കും ഇഷ്ടമായിട്ടില്ല എന്ന് സോളമന് ഉറപ്പായിരുന്നു. എന്നാൽ ഒരു തരി പോലും അവരോട് വിദ്വേഷം തോന്നാത്ത രീതിയിലാണ് അമല സംസാരിക്കുന്നത്. അത് അവരുടെ നല്ലൊരു ക്വാളിറ്റി ആയാണ് അവന് തോന്നുന്നത്. ഇന്നുവരെ ഒരു മനുഷ്യനോട് പോലും അമല മുഖം കറുത്ത് സംസാരിച്ചിട്ടില്ല. ചിന്തകൾക്ക് വിരാമം വിട്ടുകൊണ്ട് അടുക്കളയിൽ നിന്നും ബെറ്റിയ്ക്കൊപ്പം മരിയയും ഇറങ്ങി വന്നിരുന്നു. എല്ലാവരുടെയും നേരെ ജൂസിന്റെ ട്രെ നീട്ടി അവൾ.

” മോള് കുടിക്കുന്നില്ലേ..?

സണ്ണി അവളോട് ആയി ചോദിച്ചു

” അവള് അവസാനം എങ്ങാനും കുടിച്ചോളും, നിങ്ങൾ കുടിക്ക്

ജെസി പറഞ്ഞപ്പോൾ സോളമന് വല്ലാത്ത ദേഷ്യം തോന്നിയിരുന്നു. അവർ അത്രയും പറഞ്ഞിട്ടും ബെറ്റിയതിന് എതിർക്കുന്നില്ല എന്നതായിരുന്നു വലിയ തോതിൽ തന്നെ സോളമനേ അമ്പരപ്പെടുത്തിയ കാര്യം. കയ്യിലിരുന്ന ജ്യൂസ് കുടിക്കാതെ അവൻ ഇരിക്കുന്നത് കണ്ടപ്പോൾ തന്നെ മരിയയ്ക്ക് കാര്യം മനസ്സിലായിരുന്നു. അവൾ കണ്ണുകൾ കൊണ്ട് അവനോട് കുടിക്കാൻ പറഞ്ഞിട്ടും അവൻ അത് കുടിക്കാതിരിക്കുകയാണ്.

” ഞങ്ങൾ ഇങ്ങോട്ട് വരുന്ന വഴിക്ക് വെള്ളമൊക്കെ കുടിച്ചിട്ട് വന്നത് ആണ്. എനിക്ക് ഇത്രയും വേണ്ട. നിങ്ങൾ തരുമ്പോൾ എന്തെങ്കിലും കഴിക്കാതിരിക്കാൻ പറ്റില്ലല്ലോ, അതുകൊണ്ട് വാങ്ങി എന്നേയുള്ളൂ. ഒരു ഗ്ലാസ്സിങ് എടുത്തോണ്ട് വാ മരിയെ

അമല പറഞ്ഞപ്പോൾ എല്ലാവരെയും ഒന്ന് നോക്കിയതിനുശേഷം മരിയ അകത്തേക്ക് പോയി ഒരു ഗ്ലാസ് എടുത്തു അമലയുടെ കയ്യിൽ കൊടുത്തു. പകുതിയോളം ജ്യൂസ് ആ ഗ്ലാസിൽ ഒഴിച്ചതിനു ശേഷം മരിയയോട് കുടിക്കുവാൻ അമല അപ്പോൾ തന്നെ ആവശ്യപ്പെട്ടു. അത് കാണെയാണ് സോളമനും ഒരു ആശ്വാസം തോന്നിയത്.

” എനിക്ക് വേണ്ട ആന്റി, ഞാൻ പിന്നെ കുടിച്ചോളാം.

മരിയ പറഞ്ഞു

“ഇപ്പൊൾ കുടിക്ക്, നമ്മളെല്ലാവരും ഒരേ പോലെ ക്ഷീണിച്ചു വന്നതല്ലേ. നീ കുടിക്ക്…!

അമല പറഞ്ഞപ്പോൾ പിന്നീട് എതിർക്കാൻ അവൾക്കും സാധിച്ചിരുന്നില്ല. എന്നാൽ അമലയുടെ ആ പ്രവർത്തി ജെസ്സിക്ക് ഒട്ടും തന്നെ ഇഷ്ടമായിരുന്നില്ല. മറ്റു മാർഗ്ഗം ഒന്നുമില്ലാതെ എല്ലാവരും ഉള്ളതുകൊണ്ട് തന്നെ കയ്യിൽ തന്ന ജൂസ് മരിയ കുടിച്ചു തുടങ്ങിയിരുന്നു. ആ നിമിഷമാണ് സോളമനും അത് കുടിച്ചത്. തന്റെ അമ്മയോട് അവന് ഓരോ നിമിഷവും ബഹുമാനം കൂടിക്കൊണ്ടിരിക്കുകയായിരുന്നു. അവരുടെ പ്രവർത്തികളോടും..

” വൈകുന്നേരത്തേക്ക് നിങ്ങൾക്ക് പോകണം അല്ലേ?

ചോദ്യം ചോദിച്ചത് ജോൺ ആണ്

“അതെ വൈകിട്ടത്തേക്ക് പോകണം അപ്പോഴത്തേക്ക് ഫ്ലൈറ്റ് ബുക്ക് ചെയ്തിരിക്കുന്നത്

സണ്ണി പറഞ്ഞു

” എന്നാണെങ്കിലും ഉച്ചയോടെ കഴിച്ചിട്ടല്ലേ പോകത്തുള്ളൂ.

ബെറ്റി ചോദിച്ചു

” ഞങ്ങൾ ഒന്ന് കയറിയിട്ട് പെട്ടെന്ന് ഇറങ്ങാവുന്ന കരുതി വന്നതാ

സണ്ണി പറഞ്ഞു

” ഏതായാലും വന്ന സ്ഥിതിക്ക് കഴിച്ചിട്ട് പോയാൽ മതി

ബെറ്റി പറഞ്ഞു ബെറ്റിയുടെ അഭിപ്രായത്തെ ജോണും അനുകൂലിച്ചു.

” ഏതായാലും വന്ന സ്ഥിതിക്ക് രണ്ടുമൂന്നു ദിവസം മരിയ ഇവിടെ നിൽക്കട്ടെ അത് കഴിഞ്ഞിട്ട് പോയാൽ പോരെ, ഞങ്ങളും രണ്ടു മൂന്നു ദിവസം ഇവിടെയുണ്ട്

ജെസ്സി പറഞ്ഞപ്പോൾ ഇടനെഞ്ചിൽ ഒരു ഇടി വെട്ടിയിരുന്നു സോളമന്റെ, അവളെ കാണാതിരിക്കുന്ന കാര്യം ഇനി ചിന്തിക്കാൻ പോലും സാധിക്കുന്നതല്ല. എന്തെങ്കിലും പറഞ്ഞ് അമ്മ അത് മുടക്കും എന്ന വിശ്വാസം അവനുണ്ടായിരുന്നു

” അവിടെ ചെന്നിട്ട് വേണം ഇനി ഹോസ്റ്റലിന്റെ കാര്യവും മറ്റും ശരിയാക്കാൻ. ഉടനെ ചെന്നില്ലെങ്കിൽ ചിലപ്പോൾ ഹോസ്റ്റൽ പിന്നെയും പോകും. വീണ്ടും കുറച്ചുനാളും കൂടി വെയിറ്റ് ചെയ്യേണ്ടി വരും. ഇപ്പോഴാണെങ്കിൽ പെട്ടെന്ന് ഹോസ്റ്റലിൽ കിട്ടും. ഒരാൾ ഇറങ്ങാൻ നോക്കിയിരിക്കുക അടുത്ത ആള് കയറാൻ. മരിയ കൂടി ഇല്ലെങ്കിൽ പിന്നെ കിട്ടാൻ ബുദ്ധിമുട്ട് ആയിരിക്കും. അതുകൊണ്ട് ഞങ്ങളുടെ കൂടെ മരിയ വരുന്നത് തന്നെയാണ് നല്ലത്

സണ്ണി പറഞ്ഞപ്പോൾ സോളമന് ആശ്വാസം തോന്നി. ഒപ്പം തന്നെ മരിയ്ക്കും

” ഇത്തിരി പതുക്കെ കിട്ടിയാലും മതി അല്ലെങ്കിൽ ഈ വർഷം അങ്ങ് പോട്ടെന്നു വയ്ക്കണം.

വളരെ ലാഘവത്തോടെ ജെസ്സി പറഞ്ഞു

” അങ്ങനെയാണെങ്കിൽ വേറെ കുഴപ്പമൊന്നുമില്ല നിങ്ങൾ അടച്ച പണം തിരികെ കിട്ടില്ല. മാത്രമല്ല അവരുമായിട്ട് നമുക്കൊരു എഗ്രിമെന്റ് ഉള്ളതുകൊണ്ടുതന്നെ ചിലപ്പോൾ മുഴുവൻ പണത്തിന്റെ പകുതിയും കൂടി അടയ്ക്കേണ്ടി വരും.

അമല പറഞ്ഞപ്പോൾ ജോൺ ഒന്ന് ഞെട്ടിയിരുന്നു.

” അതൊന്നും വേണ്ട ഇപ്പോൾ തന്നെ എത്ര രൂപ പോയി. അവൾ ഇവരുടെ കൂടെ തന്നെ പോട്ടെ. ഇനി ഇവിടുന്ന് തിരിച്ച് അങ്ങോട്ട് പോകണമെങ്കിൽ അത് വേറൊരു ചെലവ് ആണ്. ഇതാവുമ്പോ നിങ്ങളുടെ കൂടെ അങ്ങ് പോകാല്ലോ.

ജോൺ കൂടി അങ്ങനെ പറഞ്ഞതോടെ ജെസ്സിയുടെ മുൻപിൽ മറ്റ് മാർഗങ്ങൾ ഇല്ലാതെയായി കുറച്ച് നാളുകൾ അവധിക്ക് സഹോദരനൊപ്പം നിൽക്കാൻ വന്നതാണ് ജെസ്സിയും മക്കളും. എന്നാൽ വീട്ടിലെ ജോലികൾ ചെയ്യാൻ ഇത്തിരി ബുദ്ധിമുട്ടാണ്. മരിയുണ്ടെങ്കിൽ അതെല്ലാം നടക്കും. അതിനാണ് അവളെ ഇവിടെ പിടിച്ചുനിർത്താൻ നോക്കുന്നത്
.

” അമലയുടെ മോൻ ഡോക്ടർ ആണല്ലേ

സോളമനെ നോക്കിക്കൊണ്ട് ജെസ്സി വിഷയം മാറ്റി.

” അതെ

ചിരിയോടെ അമല മറുപടി പറഞ്ഞു

” എന്റെ മോളും ഡോക്ടറിനെ പഠിച്ചുകൊണ്ടിരിക്കുകയാണ്.

മോളെ ചൂണ്ടി അഭിമാനത്തോടെ ജെസ്സി പറഞ്ഞിരുന്നു. ആ നിമിഷമാണ് ആ പെൺകുട്ടിയുടെ മുഖത്തേക്ക് സോളമൻ ഒന്ന് നോക്കിയത്. നന്നായി വെളുത്ത് തടിച്ച ഒരു പെൺകുട്ടി. അവൾ സോളമനെ നോക്കി നന്നായി ഒന്ന് ചിരിച്ചിരുന്നു. അവനും ഒന്ന് പുഞ്ചിരിച്ചു.

” ഏതില സ്പെഷ്യലൈസ് ചെയ്യുന്നത്..?

എന്തെങ്കിലുമൊന്ന് ചോദിക്കേണ്ട എന്ന് കരുതി സോളമൻ ചോദിച്ചു

” ഞാൻ എംബിബിസ് അല്ല , ഡെന്റൽ ആണ്

ആ പെൺകുട്ടി താല്പര്യത്തോടെ പറഞ്ഞു

“ഡെന്റൽ ആണെന്ന് പറഞ്ഞാലും ഡോക്ടർ ഡോക്ടർ അല്ലാതെ ആവോ.? അല്ലെ അമലെ..?

ജെസ്സി അവരുടെ മുഖത്തേക്ക് നോക്കി ചോദിച്ചു.

” പിന്നല്ലേ നമുക്ക് പല്ലിന് ഒരു വേദന വരുമ്പോഴല്ലേ ഡോക്ടറുടെ വില മനസ്സിലാവു. മറ്റ് എവിടെ എന്ത് വേദന വന്നാലും നമുക്ക് സഹിക്കാം പക്ഷേ പല്ലുവേദന അങ്ങനെ സഹിക്കാൻ പറ്റുമോ.? അതുകൊണ്ട് അത് ഒരിക്കലും കുറഞ്ഞ ഒരു പഠിത്തം ഒന്നുമല്ല.

അമല പറഞ്ഞു.

“അതെ അതു തന്നെയാണ് ഞാനും പറഞ്ഞത്.

ഉത്സാഹത്തോടെ ജെസ്സി പറഞ്ഞു.

” മോൻ എന്തിന്റെ ഡോക്ടർ ആണ്.

അവന്റെ മുഖത്തേക്ക് നോക്കി ജെസ്സി ചോദിച്ചു

” ന്യൂറോളജിസ്റ്റ്

താല്പര്യമില്ലാതെ അവൻ മറുപടി പറഞ്ഞു. അപ്പോഴേക്കും മരിയ എല്ലാവരും കുടിച്ച ഗ്ലാസ്സുകളുമായി അകത്തേക്ക് പോയിരുന്നു. അകത്തേക്ക് പോയവളുടെ പിറകെ ആയിരുന്നു അവന്റെ മിഴികൾ ആ നിമിഷവും. എന്നാൽ അവനെ ചുറ്റിപ്പറ്റി ജെസ്സിയുടെ മകൾ ജീനയുടെ മിഴികൾ പരതി നടന്നു…കാത്തിരിക്കൂ………

മുന്നത്തെ പാർട്ടുകൾ വായിക്കാൻ ഇവിടെ ക്ലിക്ക് ചെയ്യുക…