🎶 സോളമന്റെ ഉത്തമഗീതം 🎶❤️: ഭാഗം 62

രചന: റിൻസി പ്രിൻസ്‌

പപ്പയുടെ മമ്മയുടെയും കാര്യം ഓർത്തിട്ടാണെങ്കിൽ അതൊക്കെ ഞാൻ ശരിയാക്കി കൊള്ളാം. നിനക്ക് ഇപ്പൊൾ എന്നോട് ഒപ്പം പോരണമെങ്കിൽ പോരു, ബാക്കി ഒക്കെ ഞാൻ അവരോട് പറഞ്ഞ സെറ്റാക്കി കൊള്ളാം. നിന്റെ മനസ്സിലെ ആ ടെൻഷൻ കള. ഞാനേന്നും നിന്റെ സ്വന്തം ആണ്..അതല്ല ഇത്രയൊക്കെ ചെയ്തിട്ട് ഞാൻ നിന്നെ ചതിക്കുമെന്ന് നിനക്ക് പേടിയുണ്ടോ.?

സോളമൻ അങ്ങനെ ചോദിച്ചപ്പോൾ അരുതാത്തത് എന്തോ കേട്ടതുപോലെ അവൾ അവന്റെ വായ പൊത്തി കളഞ്ഞു.

” അങ്ങനെയൊന്നും ഞാൻ മനസ്സിൽ പോലും ചിന്തിച്ചിട്ടില്ല. അങ്ങനെ ഉണ്ടാവില്ലെന്ന് എനിക്ക് 100% ഉറപ്പാണ്. അതൊന്നുമല്ല എന്റെ വിഷമം. ഇച്ചായൻ എന്റെ ഒപ്പം ഇരിക്കുമ്പോൾ എനിക്ക് കിട്ടുന്ന ആശ്വാസം, അത് വളരെ വലുതാണ്. അതുവരെ എനിക്ക് തോന്നുന്നത് ഈ ലോകത്തിൽ എനിക്ക് ആരുമില്ലെന്ന് ആണ്. ഇച്ചായൻ എന്റെ കൂടെ ഇരിക്കുമ്പോൾ എനിക്ക് ആരൊക്കെയോ ഉള്ളതായി എനിക്ക് തോന്നുന്നു. ഇത്രയും വർഷങ്ങൾ ഞാൻ ജീവിച്ചു എന്ന് പറയാൻ പറ്റുന്നത് ഈ കുറച്ച് മാസങ്ങൾ മാത്രമാണ്.

ജനിച്ച സമയം മുതൽ അവഗണനകള്‍ മാത്രമേ കിട്ടിയിട്ടുള്ളൂ. എന്നേ ഒന്ന് ചേർത്ത് പിടിച്ചത് ഇച്ചായൻ മാത്രമാണ്.

അവൾ കരഞ്ഞപ്പോൾ അവൻ അവളെ ചേർത്ത് പിടിച്ചു.

” വിഷമിക്കേണ്ട ഈ ഇഷ്ടം നേടാൻ വേണ്ടിയായിരുന്നു ഇത്രയും കഷ്ടപ്പാടുകൾ എന്ന് വിചാരിച്ചാൽ മതി.

” നീ കേട്ടിട്ടില്ലേ.? ഒരു വലിയ സന്തോഷത്തിന് നമ്മൾ പകരം കൊടുക്കേണ്ടി വരുന്നത് അത്രത്തോളം തന്നെ വേദനകൾ ആയിരിക്കും.
ഇത്രയും വലിയ വേദനയിൽ നിന്നെ ദൈവം കൊണ്ടുപോയിട്ടത് മറ്റൊന്നിനും വേണ്ടിയല്ല. അത് ദൈവത്തിന്റെ ഒരു നിയോഗം ആണ്. നമ്മളീ അത്ഭുതങ്ങളിലൊക്കെ വിശ്വസിക്കണമെങ്കിൽ ജീവിതത്തിൽ ഒരുപാട് പ്രശ്നങ്ങളും വിഷമങ്ങളും ഉണ്ടാകണം. അതിനുവേണ്ടി ആയിരിക്കും ഇങ്ങനെ ഒരു തീരുമാനം ദൈവം എടുത്തത്. നിന്നോട് ഇത്തിരി കൂടുതൽ കാണിക്കാൻ കാരണം എന്താണെന്ന് അറിയാമോ.?

അവൻ ചോദിച്ചു

” അവളില്ലന്ന് കണ്ണുകൾ അടച്ചു കാണിച്ചു..

” നിന്റെ കയ്യിൽ ബൈബിൾ ഇരിപ്പുണ്ടോ.?

” റൂമിലുണ്ട്, നീ അവിടെ ചെന്ന് എശയ്യയുടെ പുസ്തകം 49 ന്റെ 15 മുതൽ 16 വരെ ഉള്ള വാക്യങ്ങൾ നോക്കണം അപ്പോൾ അതിനുള്ള മറുപടി നിനക്ക് അവിടുന്ന് കിട്ടും..

അവൻ പറഞ്ഞപ്പോൾ അവൾ അനുസരണയോടെ തലയാട്ടി.

അവളെ ഒന്നുകൂടി തന്നോട് ചേർത്ത് നിർത്തി ആ നെറ്റിയിൽ ഒന്നുകൂടി ചുംബിച്ചു അവൻ.

” എന്റെ മോൾ വിഷമിക്കാതെ ചെല്ല്, നാളെ നീ വീട്ടിലേക്ക് വരുമല്ലോ, ഈ ഒരു രാത്രിയുടെ കാര്യമല്ലേ, അതിനൊരു നൂറ് ഓർമ്മകൾ ഞാൻ തന്നിട്ടില്ലേ. എന്റെ ചുംബനം ഏറ്റ് വിടർന്ന ഈ ചെമ്പനീർ ചുണ്ടുകൾ മാത്രം പോരെ,

കുസൃതിയോട് അവൻ പറഞ്ഞപ്പോൾ അവൾ ഒന്ന് ചുവന്നു.

” ഇനി സമാധാനമായിട്ട് ചെല്ല്

അവളെ ആശ്വസിപ്പിച്ചു വിടുമ്പോൾ എന്തുകൊണ്ടോ വല്ലാത്തൊരു വേദന അവനും തോന്നിയിരുന്നു. അവൾ പറഞ്ഞതുപോലെ അരികിൽ നിന്നും അവള് അപ്രത്യക്ഷമാകുന്ന നിമിഷങ്ങൾ താൻ താനല്ലാതാവുന്നതുപോലെ തോന്നുന്നു വേദന തന്നെ വല്ലാതെ മൂടുന്നു. പ്രാണനിൽ അലിഞ്ഞൊരു പ്രണയം നൽകിയ നേർത്ത വിരഹവേദനയിൽ അവന്റെ ഹൃദയവനം നിറഞ്ഞു,

അവൾ റൂമിൽ ചെന്ന് ഉടനെ തന്നെ ബൈബിൾ തുറന്നു നോക്കി.

അതിലെ വാചകങ്ങൾ അവൾ മനസ്സിൽ ഉരുവിട്ടു

“ഒരു അമ്മയ്ക്ക് തൻ്റെ നെഞ്ചിലെ കുഞ്ഞിനെ മറക്കാനും താൻ പ്രസവിച്ച കുഞ്ഞിനോട് കരുണ കാണിക്കാതിരിക്കാനും കഴിയുമോ? അവൾ മറന്നാലും ഞാൻ നിന്നെ മറക്കില്ല! ഇതാ, ഞാൻ നിന്നെ എൻ്റെ കൈപ്പത്തിയിൽ കൊത്തിവെച്ചിരിക്കുന്നു”

അവളുടെ ഉള്ളം നിറഞ്ഞു.

ഉടനെ തന്നെ വാട്സാപ്പിൽ അവന്റെ ഒരു വീഡിയോയും എത്തി അവൾ അത് പ്ലേ ചെയ്തപ്പോൾ. ഒരു ചെറിയ ഇൻസ്റ്റഗ്രാം റീലാണ് അതിൽ മോഹൻലാൽ പറയുന്ന ഡയലോഗുകളാണ്.

“”നീ എനിക്ക് പ്രിയങ്കരിയാണ് പൊന്നോമനയാണ് പെറ്റമ്മ മറന്നാലും ഞാൻ നിന്നെ മറക്കുകയില്ല ”

താഴെയായി അവൻ ടെക്സ്റ്റ് ചെയ്ത ഒരു മെസ്സേജും അയച്ചിരിക്കുന്നു

” നീ എനിക്കും ഏറെ പ്രിയങ്കരിയാണ് ഈ ജന്മവും വരും ജന്മങ്ങളിലും.

അവളിൽ ഒരു ചിരി വിടർന്നു. ഒരു ഉമ്മയുടെ സ്മൈലി പകരം അയച്ചവൾ

തിരികെ വീട്ടിലേക്ക് എത്തിയപ്പോൾ ആരെയോ ഫോൺ വിളിച്ചു കൊണ്ടിരിക്കുകയാണ് മമ്മ. അവനെ കണ്ടതും കൈ നീട്ടി അവർ അവിടേക്ക് വിളിച്ചിരുന്നു. അവൻ മമ്മയ്ക്ക് അരികിലേക്ക് ചെന്ന് അവരുടെ മടിയിലേക്ക് കിടന്നു. അവർ ഫോണിൽ സംസാരിക്കുന്നത് കേട്ടപ്പോൾ തന്നെ വല്യമ്മച്ചി ഇവിടേക്ക് വരുന്ന കാര്യമാണെന്ന് അവന് മനസ്സിലായി.

“ഡാ അമ്മച്ചി നാളെ രാവിലെ ഇങ്ങു എത്തും..

ഫോൺ കട്ട് ചെയ്തതും അവന്റെ മുഖത്തേക്ക് നോക്കി അവർ പറഞ്ഞു.

“എത്തട്ടെ

അവൻ അതിന് തലയാട്ടി കാണിക്കുകയാണ് ചെയ്തത്.

“ഒരു പ്രശ്നമുണ്ട്.?

” എന്താ.?

“അമ്മച്ചി നാളെ ഇങ്ങോട്ട് വരുമ്പോൾ ഇവിടെ മരിയയേ കണ്ടാൽ ഇഷ്ടാവില്ല. പിന്നേ ആ കുട്ടിയേ ഓരോന്ന് പറഞ്ഞ് വിഷമിപ്പിക്കുകയും ചെയ്യും. ഞാനാണെങ്കിൽ ആ കുട്ടിയോട് ഇവിടേക്ക് വരുന്ന കാര്യം പറയുകയും ചെയ്തു. അവൾ നാളെ ഇവിടേക്ക് വരും. അമ്മ ഇവിടെ ഉണ്ടെങ്കിൽ…. അതാ ഞാൻ ഓർക്കുന്നത്.

അമല ചിന്താകുഴപ്പത്തിലായി

” നമ്മുടെ വീട്ടിൽ ആരൊക്കെ നിൽക്കണം എന്ന് തീരുമാനിക്കുന്നത് നമ്മൾ അല്ലേ, അതിൽ അഭിപ്രായം പറയാൻ വല്യമ്മച്ചി ആരാണ്.?

താല്പര്യമില്ലാതെ അവൻ പറഞ്ഞു.

” മമ്മ ഇങ്ങനെ വലിയമ്മച്ചിയെ പേടിച്ച് ജീവിക്കാൻ പറ്റുമോ.?

അവന് ദേഷ്യം വന്നു

” പേടിയല്ലടാ എന്തെങ്കിലും അമ്മച്ചി പറഞ്ഞാൽ… അതുകൊണ്ട് ആണ്

” അവളോട് എങ്ങനെ പറയാനാണ് വരണ്ടാന്നു ഞാൻ അതാണ് ഓർക്കുന്നത്

” അങ്ങനെ പറയണ്ട മമ്മ അവൾക്കത് വിഷമമാകും,

അപേക്ഷ പോലേ അവൻ പറഞ്ഞു

“അവൾ നാളെ വരാനായിട്ട് ഒരുപാട് ആഗ്രഹിച്ചിരുന്നതല്ലേ

അവന്റെ മനസ്സിൽ പെട്ടെന്ന് അവൾ ആരുമില്ല എന്ന് പറഞ്ഞ് കരഞ്ഞതാണ് ഓർമ്മ വന്നത്.

” നാളെ ഇവിടേക്ക് വരാമെന്നുള്ള സന്തോഷത്തിലാണ് അവൾ. അതിനിടയിൽ വേദനിപ്പിക്കുന്നത് ശരിയല്ല എന്ന് അവന് തോന്നി.

മമ്മയോട് ഇതിൽ കൂടുതൽ തനിക്ക് ഈ സാഹചര്യത്തിൽ പറയാനും സാധിക്കില്ലല്ലോ..

” എങ്കിൽ പിന്നെ അവൾ വരട്ടെ, അമ്മച്ചിയോട് ഒന്നും പറയരുതെന്ന് ഞാൻ പറഞ്ഞു മനസ്സിലാക്കാം.. അല്ലാതെ ഇപ്പോൾ എന്ത് ചെയ്യാൻ പറ്റും.?..

അമല അങ്ങനെ പറഞ്ഞപ്പോൾ അവനും വലിയ സമാധാനം തോന്നിയിരുന്നു

പിറ്റേന്ന് രാവിലെതന്നെ സണ്ണിയാണ് അമ്മച്ചിയെ വിളിക്കുവാൻ വേണ്ടി പോയത്. അമ്മച്ചിക്കൊപ്പം തന്നെ അമലയുടെ സഹോദരനും ഉണ്ടായിരുന്നു. വലിയ സന്തോഷത്തോടെയാണ് അമ്മച്ചി വന്നത്. ഒരുപാട് സമയം എല്ലാവരും ഒരുമിച്ചിരുന്ന് സംസാരിക്കുകയും ഒക്കെ ചെയ്തു. ശേഷം ആണ് സഹോദരൻ മടങ്ങിയത്. ഇന്ന് പോകേണ്ട എന്ന് സണ്ണിയും അമലയും അയാളെ നിർബന്ധിച്ചു എങ്കിലും ഇന്ന് തന്നെ പോകണം എന്ന് തീരുമാനത്തിൽ ആയിരുന്നു അയാൾ. പിന്നീട് ഇരുവരും ഒന്നും പറഞ്ഞില്ല.

വന്നപാടെ അമ്മച്ചി സോളമനെ കെട്ടിപ്പിടിച്ച് കുറെ സമയം വിശേഷം പറഞ്ഞു.

” എന്റെ കുഞ്ഞിന്റെ കല്യാണം കൂടി കണ്ടിട്ടെ എനിക്ക് എന്തെങ്കിലും പറ്റാവുന്നാ എന്റെ ആഗ്രഹം,

അവനെ കെട്ടിപ്പിടിച്ചുകൊണ്ട് അമ്മച്ചി പറഞ്ഞു

” അതിനെന്താ എന്റെ കല്യാണവും മൂന്നാല് പിള്ളേരെയും കണ്ടിട്ട് വല്ല്യമ്മച്ചിയേ ഞാൻ മുകളിലോട്ട് വിടത്തുള്ളു.. പോരെ.?

ഏറെ സ്നേഹത്തോടെ അവരെ ചേർത്ത് പിടിച്ച് അവനും പറഞ്ഞു.

” പോടാ ,മോനെ സണ്ണി നമ്മുടെ സക്കറിയക്ക് ഒരു മോളുണ്ട്. നമ്മുടെ പള്ളിയിലുള്ള കൊച്ചാണ്. നല്ല കുടുംബക്കാരാ. ആ പെൺകുട്ടി വക്കീൽ ആണ് എന്നാണ് കേൾക്കുന്നത്. ഞാൻ എന്റെ കുഞ്ഞിനുവേണ്ടി ഒന്നാലോചിക്കട്ടെ.?

സണ്ണിയോട് ആയി വല്യമ്മച്ചി ചോദിച്ചപ്പോൾ
അവന്റെ മുഖം ഒന്ന് മങ്ങിയിരുന്നു.

” തൽക്കാലം സക്കറിയയുടെ മോൾ അവിടെ ഇരിക്കട്ടെ, അതിനൊക്കെ ഇഷ്ടംപോലെ സമയം ഉണ്ടല്ലോ… അതിനെക്കുറിച്ച് ഒന്നും ഇപ്പോൾ ആലോചിക്കാൻ നിൽക്കണ്ട

ഗൗരവത്തിൽ അത്രയും പറഞ്ഞ് സോളമൻ താല്പര്യമില്ലാതെ ഇറങ്ങിപ്പോയപ്പോൾ അവരുടെ മുഖം മങ്ങിയിരുന്നു.

“അവന് കല്യാണകാര്യം പറയുമ്പോൾ ഇങ്ങനെ ഒരു രീതിയാ, അമ്മച്ചി അത് കാര്യമാക്കണ്ട.

അവരെ ആശ്വസിപ്പിച്ചു സണ്ണിയും ഇറങ്ങി.

അതിനുശേഷം അമ്മച്ചിയെ ഒറ്റയ്ക്ക് കിട്ടിയ സമയത്താണ് അമല ഈ കാര്യത്തെക്കുറിച്ച് അവരോട് സംസാരിക്കാൻ തീരുമാനിക്കുന്നത്

” ഞാന് ഒരു കാര്യം അമ്മച്ചിയോട് പറയാൻ വേണ്ടിയാണ് അവരൊക്കെ പോകാൻ വേണ്ടി കാത്തിരുന്നത്.

“എന്നതാടി

അവർ ചോദിച്ചു

” ഇന്ന് വൈകിട്ട് ആ കൊച്ചു ഇങ്ങോട്ട് വരും. അമ്മച്ചി അതിനോട്അന്ന് കാണിച്ചത് പോലെ ഒന്നും കണികല്ലേ

“ഏത് കൊച്ചു

അവര് ചോദിച്ചു

” നമ്മുടെ ബെറ്റി ഇല്ലേ.? അവളുടെ മോൾ, അവൾ ഇവിടെയല്ലേ പഠിക്കുന്നത്.?

” അവൾ ഏതോ ഹോസ്റ്റലിലോട്ട് മാറിയെന്ന് നീ പറഞ്ഞില്ലേ.?

“‘ മാറി എങ്കിലും എല്ലാ ആഴ്ചയിലും അവളോട് ഞാൻ ഇവിടേക്ക് വരാൻ പറഞ്ഞിട്ടുണ്ട്.

” നിനക്കെന്തിന്റെ അസുഖം ആണ് അമലേ. ഇതിനെ ഒന്നും വീട്ടിൽ കയറ്റാൻ കൊള്ളില്ലാത്തതാ. അവസാനം ഇത് നിനക്ക് തന്നെ പാര ആയിട്ട് വരും. ഞാൻ പറഞ്ഞില്ലെന്ന് വേണ്ട.

ദേഷ്യത്തോടെ അമ്മച്ചി പറഞ്ഞു..കാത്തിരിക്കൂ………

മുന്നത്തെ പാർട്ടുകൾ വായിക്കാൻ ഇവിടെ ക്ലിക്ക് ചെയ്യുക…