🎶 സോളമന്റെ ഉത്തമഗീതം 🎶❤️: ഭാഗം 22

രചന: റിൻസി പ്രിൻസ്‌

സോളമൻ എവിടെ? കണ്ടില്ലല്ലോ സണ്ണിയാണ് ചോദിച്ചത്

” മുകളിലുണ്ട് ഞാൻ വിളിക്കാം, നിങ്ങൾ വന്നത് അവൻ അറിഞ്ഞു കാണില്ല..

ആനി അങ്ങോട്ട് നോക്കി പറഞ്ഞപ്പോൾ അറിയാതെ മരിയയുടെ മിഴികളും അവിടേക്ക് പോയിരുന്നു.. ആനിയെ തുടർന്നുപോകുന്ന മരിയയുടെ മിഴികൾ ഒരു നിമിഷം സണ്ണിയുടെ കണ്ണിൽ പതിച്ചിരുന്നു .

” മോനെ സോളമ… ദേ പപ്പയും മമ്മിയും വന്നിരിക്കുന്നു,

ആനി പറഞ്ഞപ്പോൾ തന്നെ ഒരു ഷോട്ട്സും ബനിയനും അണിഞ്ഞുകൊണ്ട് ബാൽക്കണിയിൽ സോളമൻ പ്രത്യക്ഷപ്പെട്ടിരുന്നു. അത് കാണെ മരിയയുടെ കണ്ണുകളിൽ ഒരു പ്രത്യേക തിളക്കം അനുഭവപ്പെട്ടു. ചിരിയോടെ താഴെക്കിറങ്ങി വരുന്നവനിൽ തന്നെയായിരുന്നു അവളുടെ രണ്ടു മിഴികളും. ഒരു ഭയത്തോടെയാണ് ആ ഒരു കാഴ്ച സണ്ണി കണ്ടത്.

” നീ ഉറക്കമായിരുന്നോടാ. അവനെ കണ്ട പാടെ എഴുന്നേറ്റ് കൊണ്ട് അമല ചോദിച്ചു

“വേറെ എന്ത് ചെയ്യാനാ..? യാത്രയുടെ ക്ഷീണം ഒന്നു മാറണ്ടെ…? ഞാൻ നല്ല സുഖമായിട്ടൊന്നു ഉറങ്ങി, ഭക്ഷണം ഒക്കെ കഴിച്ചു കഴിഞ്ഞു. മമ്മി കോലം കേട്ടല്ലോ വേഗം പോയി കുളിച്ച് കഴിച്ചിട്ട് കുറച്ചുനേരം കിടക്കാൻ നോക്ക്…

അമലയുടെ മുഖത്തേക്ക് നോക്കി കരുതലോടെ പറഞ്ഞു.

“പപ്പ ഇവിടെ ഇരിക്കുന്നത് നീ കണ്ടില്ലേ…?

സണ്ണി അവന്റെ മുഖത്തേക്ക് നോക്കി ചോദിച്ചു.

” അവനല്ലെങ്കിലും പണ്ടുമുതലേ മമ്മി മോൻ അല്ലേ?

ആനി പറഞ്ഞപ്പോൾ എല്ലാവരും ചിരിച്ചിരുന്നു.

“പപ്പയും ആകെ ടയേഡ് ആയിട്ടുണ്ട്. മുഖം കാണുമ്പോൾ അറിയാം. നന്നായിട്ട് ഒന്ന് ഫ്രഷ് ആയിട്ട് വാ .

“ശരി ഞങ്ങൾ ഫ്രഷ് ആയിട്ട് വരാം, നീ ഏതായാലും കൊണ്ടുപോവാനുള്ളതൊക്കെ പാക്ക് ചെയ്തു വച്ചോ.? നാളെ രാവിലെ തന്നെ നമുക്ക് പോണം.

” അപ്പോ വല്യമ്മച്ചിയെ കാണാൻ ഇനി പോകുന്നില്ലെ..? പോകുന്ന വഴിക്ക് നമുക്ക് ആശുപത്രിയിൽ കയറിയൊന്ന് കാണാം. പിന്നെ മരിയയുടെ വീട്ടിലും കയറണ്ടേ,ആ വഴിക്ക് എന്റെ വീട്ടിലും, അതോക്കേ കഴിഞ്ഞ് നാളെ ഈവനിംഗ് ഫ്ലൈറ്റ് ഞാൻ ബുക്ക് ചെയ്തിട്ടുണ്ട്.

സണ്ണി പറഞ്ഞു

” ഓക്കേ…

കൂളായി പറഞ്ഞുകൊണ്ട് അവൻ മുകളിലേക്ക് കയറിപ്പോയി. പോകുന്നതിനിടയിൽ ആരും ശ്രദ്ധിക്കാത്ത രീതിയിൽ മരിയയൊന്നു നോക്കി കണ്ണടച്ച് കാണിക്കുകയും ചെയ്തിരുന്നു.. മുറിയിലേക്ക് എത്തിയതും അമല ആദ്യം കുളിക്കാനുള്ള തയ്യാറെടുപ്പുകൾ നടത്തുകയാണ് ചെയ്തത്.

ജനലിലൂടെ പുറത്തേക്ക് നോക്കി എന്തോ ആലോചിച്ചു നിൽക്കുന്ന സണ്ണിയെ കണ്ടപ്പോൾ അവൾക്ക് സംശയം തോന്നി. അയാളുടെ ചുമലിൽ ഒന്ന് തൊട്ടുകൊണ്ട് അവൾ ചോദിച്ചു

“എന്താ വലിയ ആലോചന..? കുറെ നേരമായല്ലോ,

” ഒന്നുമില്ല നമ്മൾ ചെന്നിട്ട് വേണം മരിയയ്ക്ക് ഹോസ്റ്റൽ എത്രയും പെട്ടെന്ന് ശരിയാക്കാൻ..

സണ്ണി പറഞ്ഞു

“അതിനു ദൃതി പിടിക്കേണ്ട കാര്യമൊന്നുമില്ലല്ലോ, ഒരു മാസം കൂടി കഴിഞ്ഞാലേ ഹോസ്റ്റൽ കിട്ടു എന്നല്ലേ പറഞ്ഞത്. അതുവരെ അവള് നമ്മുടെ ഫ്ലാറ്റിൽ നിൽക്കട്ടെ… സത്യം പറഞ്ഞാൽ അവളെ ഹോസ്റ്റലിൽ നിർത്തണമെന്ന് എനിക്കില്ല, എനിക്ക് എന്തെങ്കിലും പറഞ്ഞു ഇരിക്കാൻ അവള് വീട്ടിലുള്ളത് തന്നെയാണ് നല്ലത്. ഒരു പാവം കൊച്ചല്ലേ അത്,

അമല പറഞ്ഞു

” അതൊക്കെ ശരിയാ, പക്ഷേ ഒരിക്കലും പ്രായപൂർത്തിയായ രണ്ടുപേരെ ഒരുമിച്ച് നിർത്തുന്നത് ശരിയല്ല.

സണ്ണി പറഞ്ഞു

“നിങ്ങൾ ഇത് എന്തൊക്കെയാ പറയുന്നത്? എനിക്കൊന്നും മനസ്സിലാവുന്നില്ല,

അമല സണ്ണിയുടെ മുഖത്തേക്ക് നോക്കി പറഞ്ഞു

“ഞാൻ സോളമന്റെയും ആ കുട്ടിയുടെയും കാര്യം തന്നെയാ പറഞ്ഞത് എപ്പോ നോക്കിയാലും അവനെ ഇങ്ങനെ കുറ്റം പറയല്ലേ, ഞാൻ പറഞ്ഞില്ലേ അവൻ അങ്ങനെയൊന്നും ആ കൊച്ചിനോട് ചെയ്യത്തില്ല. ഞാൻ അവനോട് പറഞ്ഞു കൊടുത്തിട്ടുണ്ട്. അവളുടെ അവസ്ഥകളും പ്രശ്നങ്ങളും ഒക്കെ.

അമല പറഞ്ഞു

” അവന്റെ മാത്രമല്ല അവളുടെയും പ്രായം ശരിയല്ല. കൊച്ചു പെങ്കൊച്ച് ആണ്. കൗമാരം ആണ് പല ആഗ്രഹങ്ങളും മനസ്സിൽ തോന്നുന്ന പ്രായം നമ്മുടെ മോനും അത്ര നല്ല കൂട്ടത്തിൽ ഒന്നുമല്ലല്ലോ. അവനൊന്ന് ചിരിച്ചു കാണിച്ചാലോ അടുത്ത് ഇടപഴകിയാലോ ആ കൊച്ചിന്റെ മനസ്സിൽ എന്തെങ്കിലും ആശ കയറിയാൽ പിന്നെ അത് വലിയ പ്രശ്നമാകും. അതുകൊണ്ട് അവരെ അങ്ങനെ ഒരുമിച്ച് നിർത്തുന്നത് ശരിയല്ല. എത്രയും പെട്ടെന്ന് തന്നെ ഹോസ്റ്റൽ ശരിയാക്കി മരിയയെ അങ്ങോട്ട് മാറ്റുന്നതാണ് നല്ലത്.

“നിങ്ങൾ അവനെ എന്തു വേണമെങ്കിലും പറഞ്ഞോ പക്ഷേ ആ കൊച്ചിനെ കുറിച്ച് ആവശ്യമില്ലാത്ത ഒന്നും പറയണ്ട. അവൾ അങ്ങനെയൊന്നും ചിന്തിക്കുന്ന കൂട്ടത്തിൽ ആണെന്ന് എനിക്ക് തോന്നുന്നില്ല. അങ്ങനെ ചെയ്യുമെന്നും തോന്നുന്നില്ല,

” എടി ഈ പ്രായത്തിലുള്ള പിള്ളേരുടെ മനസ്സിനെക്കുറിച്ച് നിനക്ക് എന്തറിയാം.? ചരട് പൊട്ടിയ പട്ടം പോലെ ആണ് ഈ പ്രായം. സൂക്ഷിച്ചില്ലെങ്കിൽ ദുഃഖിക്കേണ്ടിവരും. അതുകൊണ്ട് ആണ് പറയുന്നത്

അത്രയും പറഞ്ഞ് സണ്ണി ഷർട്ട് അഴിച്ചുകൊണ്ട് കുളിക്കാനായി തയ്യാറെടുത്തപ്പോൾ ഒന്നും മനസ്സിലാവാതെ നിൽക്കുകയായിരുന്നു അമല..

അന്നത്തെ രാത്രി സോളമനും മരിയ്ക്കും വളരെ പ്രധാനപ്പെട്ടതായിരുന്നു. ഭക്ഷണം കഴിക്കുന്നതിനിടയിൽ ആരും കാണാതെ അവളുടെ കൈകളിൽ ഒന്ന് പിടിക്കുകയും കണ്ണുകൾ കൊണ്ട് താൻ ഒപ്പം ഉണ്ടെയെന്ന് ഒരു ആംഗ്യം കാണിക്കുകയും ഒക്കെ ചെയ്യുന്നുണ്ടായിരുന്നു സോളമൻ. മറ്റുള്ളവരുടെ മുൻപിൽ വച്ച് അവനെ നോക്കാതിരിക്കാൻ കഴിവതും മരിയ ശ്രമിക്കുന്നുണ്ടായിരുന്നു പക്ഷേ നോട്ടം അറിയാതെ അവിടേക്ക് തന്നെയാണ് ചെല്ലുന്നത്. എന്ത് ചെയ്യാൻ സാധിക്കും. ഇടയ്ക്കിടെ തന്നെയും അവനെയും മാറിമാറി നോക്കുന്ന സണ്ണിയുടെ കണ്ണുകൾ അവൾ കാണുന്നുണ്ടായിരുന്നു. അതുകൊണ്ടു തന്നെ അവനെ നോക്കാതിരിക്കാൻ ആണ് അവൾ ശ്രദ്ധിച്ചത്. ഭക്ഷണം കഴിച്ചു കഴിഞ്ഞതോടെ അടുക്കളയിൽ അമലയും ആനിയും വർത്തമാനത്തിലായി. പാത്രങ്ങളൊക്കെ കഴുകി മരിയയും അടുക്കളയിൽ തന്നെയായിരുന്നു. കിടക്കുമുൻപ് അവളെ ഒന്ന് കാണണമെന്ന് സോളമൻ ഉണ്ടായിരുന്നു. എന്ത് പറഞ്ഞ് അടുക്കളയിലേക്ക് കയറിച്ചെല്ലും വീട്ടിൽ ആണെങ്കിൽ മമ്മിയോട് എന്തെങ്കിലും പറയാനാണെന്നു പറഞ്ഞ് ചെല്ലാം. ഇതിപ്പോൾ അതും പറ്റില്ല. അവസാനം വെള്ളം വാഷ്ബെസനിൽ ഒഴിച്ച് കളഞ്ഞതിനു ശേഷം കാലി ജഗ്ഗുമായി അവൻ അടുക്കളയിലേക്ക് ചെന്നിരുന്നു. കുറച്ചു വെള്ളം നിറച്ച് തന്നെ മമ്മി അവന്റെ ശബ്ദം കേട്ടതും ഏറെ ഉത്സാഹത്തോടെ തിരിഞ്ഞു നോക്കുകയായിരുന്നു മരിയ. ആ നിമിഷം തന്നെ അവൻ കണ്ണുകൾ കൊണ്ട് ഉറങ്ങാൻ പോവുകയാണ് എന്ന് അവളോട് പറഞ്ഞിരുന്നു. അവൾ മൗനമായി സമ്മതം നൽകുകയും ചെയ്തിരുന്നു. അവർക്ക് രണ്ടുപേർക്കും മാത്രം മനസ്സിലാവുന്ന അജ്ഞാതമായ ഒരു ഭാഷ അവിടെ ഉടലെടുക്കുകയായിരുന്നു. പ്രണയത്തിന് മാത്രം മനസ്സിലാക്കി എടുക്കാൻ സാധിക്കുന്ന ഒരു മാന്ത്രികമായ ലിപി..! ജഗ്ഗുമായി തിരികെ പോകുമ്പോൾ രണ്ടുപേരുടെയും മനസ്സ് ശാന്തമായിരുന്നു. ഉറങ്ങും മുൻപ് ഒന്ന് കാണണമെന്ന് രണ്ടുപേരും അത്രത്തോളം ആഗ്രഹിച്ചിരുന്നു. അന്നത്തെ രാത്രി ഒരുപാട് പ്രതീക്ഷകളോടെയാണ് മരിയയും ഉറങ്ങാൻ കിടന്നത്. ജീവിതത്തിൽ ആദ്യമായി ഒരു വിവാഹവും കുടുംബജീവിതവും ഒക്കെ അവൾ സ്വപ്നം കണ്ടു. ഇന്നുവരെ ഇങ്ങനെയൊരു കാര്യത്തെക്കുറിച്ച് മനസ്സിൽ പോലും ചിന്തിച്ചിട്ടില്ല. പക്ഷേ ഇപ്പോൾ ജീവിതത്തിന് ഒരു പ്രത്യേക സൗന്ദര്യം തോന്നുന്നുവെന്ന് അവൾക്ക് തോന്നിയിരുന്നു. ആ രാത്രി ഉറങ്ങാൻ അവൾക്ക് ഒട്ടും ബുദ്ധിമുട്ടുണ്ടായിരുന്നില്ല

പിറ്റേന്ന് നേരത്തെ തന്നെ അവൾ ഉണർന്നു. ആനിക്കൊപ്പം അടുക്കളയിലെത്തി ബ്രേക്ക് ഫാസ്റ്റ് ഉണ്ടാക്കാനും മറ്റും കൂടെ കൂടി. കുറച്ചു കഴിഞ്ഞപ്പോഴേക്കും അമലയും എഴുന്നേറ്റ് വന്നിരുന്നു പിന്നീട് മൂന്നുപേരും കൂടി വർത്തമാനം പറച്ചിലും ഭക്ഷണം ഉണ്ടാക്കലും ഒക്കെയായി അങ്ങനെ പോയി. ബ്രേക്ഫാസ്റ്റ് കഴിഞ്ഞതും പെട്ടെന്ന് തന്നെ പോകാൻ റെഡിയായിരുന്നു. പോകും മുൻപ് ആനി ഒരു കവറിൽ കുറച്ച് അധികം തുണികൾ എടുത്തുകൊണ്ട് മരിയയുടെ കൈകളിലേക്ക് കൊടുത്തു.

” ഇതൊക്കെ എന്റെ ചുരിദാർ ആണ്.. ഒരുപാട് ഇട്ടിട്ടൊന്നുമില്ല. ഒന്നോ രണ്ടോ വട്ടം ഇട്ടതേയുള്ളൂ. കൊച്ചിന് നല്ല ഡ്രസ്സ് ഒന്നും ഇല്ലല്ലോ അതുകൊണ്ട് ഇത് കയ്യിലിരിക്കട്ടെ കോളേജിൽ ഒക്കെ പോകുമ്പോൾ ഉപകരിക്കും. അതിനകത്ത് ഇടാത്തത് ഉണ്ട് കേട്ടോ..? രണ്ടു വലിയ കവറിൽ നിറയെ തുണി അവൾക്ക് നേരെ നീട്ടിക്കൊണ്ട് ആനി പറഞ്ഞു. സന്തോഷത്തോടെ അവൾ അത് കൈകളിൽ വാങ്ങി. എന്നാൽ ആ സമയം സോളമന്റെ മുഖത്ത് ദേഷ്യം അലതല്ലുന്നത് അവൾ കണ്ടിരുന്നു.. കാരണം എന്താണെന്ന് അവൾക്ക് മനസ്സിലാക്കാൻ സാധിച്ചിരുന്നില്ല. ഒരു വാക്കിൽ എല്ലാവരോടും യാത്ര പറഞ്ഞ് അവൻ ആദ്യം തന്നെ ഇറങ്ങി കാറിന്റെ ഡ്രൈവിംഗ് സീറ്റിലേക്ക് കയറിയിരുന്നു. മരിയയുടെ മുഖത്തേക്ക് പോലും അവൻ നോക്കിയില്ല. ദേഷ്യത്തിൽ ചുവന്നിരിക്കുകയാണ് മുഖം. എന്താണ് കാര്യമെന്ന് അവൾക്കും മനസ്സിലാക്കാൻ സാധിച്ചില്ല. പക്ഷേ അവന്റെ ദേഷ്യം നിറഞ്ഞ മുഖം അവളിൽ ഒരു അസ്വസ്ഥത നിറച്ചിരുന്നു…..കാത്തിരിക്കൂ………

മുന്നത്തെ പാർട്ടുകൾ വായിക്കാൻ ഇവിടെ ക്ലിക്ക് ചെയ്യുക…