പത്രപരസ്യത്തിലുള്ള എഫ് ബി പോസ്റ്റുകൾ തന്റേതല്ലെന്ന് സന്ദീപ് വാര്യർ; തെളിയിക്കാൻ വെല്ലുവിളിച്ച് സിപിഎം
സിപിഎം നൽകിയ പത്രപരസ്യത്തിൽ തന്റെ പേരിലുള്ള ഫേസ്ബുക്ക് പോസ്റ്റുകൾ പലതും വ്യാജമാണെന്ന് സന്ദീപ് വാര്യർ. ഇതിനെതിരെ നിയമ നടപടി സ്വീകരിക്കുമെന്നും സന്ദീപ് വാര്യർ പറഞ്ഞു. സിപിഎം വർഗീയ വിഭജനം ലക്ഷ്യമിട്ട് നൽകിയ പത്ര പരസ്യമാണിത്. അതിലുള്ള പല പോസ്റ്റുകളും വ്യാജമാണ്
സിപിഎം കൃത്രിമായി നിർമിച്ചതാണ് തന്റെ പേരിലുള്ള പോസ്റ്റുകൾ. രണ്ട് പത്രങ്ങൾ മാത്രം ഇതിന് തെരഞ്ഞെടുത്തത് തന്നെ അതിന്റെ ഭാഗമാണ്. ബിജെപിയെ പോലെ സിപിഎമ്മും വർഗീയ ധ്രൂവീകരണത്തിന് ശ്രമിക്കുകയാണ്. ഇതിനെതിരെ പാർട്ടിയുമായി ആലോചിച്ച് പരാതി നൽകുമെന്നും സന്ദീപ് വാര്യർ പറഞ്ഞു
എന്നാൽ സന്ദീപിന്റെ പോസ്റ്റുകൾ തന്നെയാണ് പരസ്യത്തിലുള്ളതെന്നും അല്ലെന്ന് തെളിയിക്കട്ടെയെന്നും സിപിഎം പാലക്കാട് ജില്ലാ സെക്രട്ടറി ഇഎൻ സുരേഷ് ബാബു പറഞ്ഞു. സന്ദീപ് പറഞ്ഞ കാര്യങ്ങളാണ് പരസ്യത്തിലുള്ളത്. സിപിഎം വിദ്വേഷ പ്രചാരണം നടത്തുന്നില്ല. സന്ദീപ് പറഞ്ഞ കാര്യം മാത്രമാണ് അതിലുള്ളതെന്നും സുരേഷ് ബാബു പറഞ്ഞു.
