🎶 സോളമന്റെ ഉത്തമഗീതം 🎶❤️: ഭാഗം 37

രചന: റിൻസി പ്രിൻസ്‌

അവൻ തിരിച്ചിറങ്ങുന്നതിനു മുൻപ് അവൾ അവന്റെ കൈകളിൽ കയറി പിടിച്ചു. മനസ്സിലാവാതെ അവൻ അവളുടെ മുഖത്തേക്ക് നോക്കി..

” ഇങ്ങനെ ആരോടെങ്കിലും ഇതിനു മുൻപ് ഉണ്ടായിട്ടുണ്ടോ..,?

അവളുടെ ചോദ്യം കേട്ടപ്പോൾ അവന് ചിരിയാണ് വന്നത് ആകാംഷയും കുശുമ്പും ഒക്കെ നിറഞ്ഞ ചോദ്യമാണ്

“അങ്ങനെ ചോദിച്ചാൽ ഞാൻ സത്യം പറഞ്ഞാൽ നിനക്ക് ഇഷ്ടപ്പെട്ടില്ലങ്കിലോ..? പക്ഷേ നിന്നോട് കള്ളം പറയാനും എനിക്ക് വയ്യ..!

ചെറു ചിരിയോടെ അവളുടെ മുഖത്തേക്ക് നോക്കി അവൻ പറഞ്ഞപ്പോൾ തന്നെ അതിന്റെ അർത്ഥം അവൾക്കു മനസ്സിലായി…

” പക്ഷേ ഞാ
ൻ ഇത്രത്തോളം ആഗ്രഹിച്ച ഇങ്ങനെ ഒരു മൂഡിൽ അങ്ങനെ സംഭവിച്ചിട്ടില്ല. അതൊക്കെ ഒരു ഫ്ലർട്ടിംഗ് ആയിരുന്നു. ഒരു ഉമ്മയൊക്കെ ലൈഫിൽ സംഭവിച്ചിട്ടുണ്ട്, ഇല്ലെന്ന് പറയാൻ പറ്റില്ല. ഞാൻ അത്യാവിശ്യം ചെറിയൊരു ഉടായിപ്പ് ആയിരുന്നു എന്ന് നിന്നോട് പറഞ്ഞില്ലേ..? പക്ഷേ അതിനപ്പുറത്തേക്ക് ഒന്നും നടന്നിട്ടില്ല. പിന്നെ ഇത് എനിക്ക് വെറുതെ തോന്നിയ ഒന്നല്ല, ഞാൻ പറഞ്ഞില്ലേ ഞാൻ അത്രത്തോളം ആഗ്രഹിച്ച് സംഭവിച്ചതാണിത്. ഇങ്ങനെയൊന്ന് ജീവിതത്തിൽ ഇതുവരെ സംഭവിച്ചിട്ടില്ല. പക്ഷേ നിന്റെ മുന്നിൽ നല്ല കുട്ടി ആവാനും ഞാനില്ല. എന്റെ ജീവിതത്തിൽ ഉമ്മയൊക്കെ കിട്ടിയിട്ടുണ്ട്. ഇതെന്റെ ഫസ്റ്റ് ഉമ്മ ഒന്നുമല്ല.

അവളുടെ മുഖം വാടുന്നത് കണ്ടപ്പോൾ അവന് സങ്കടമായി. താണുപോയ മുഖം താടിതുമ്പിനാൽ ഉയർത്തി അവളുടെ മുഖത്തേക്ക് നോക്കി അവൻ പറഞ്ഞു..

” കഴിഞ്ഞതൊക്കെ കഴിഞ്ഞില്ലേ..? ഇനിയുള്ള കാര്യങ്ങളെപ്പറ്റി ചിന്തിക്കുക, ഞാൻ പറഞ്ഞില്ലേ ഇനി എന്നും ഈ ഒരാളിൽ മാത്രമായിരിക്കും ഞാൻ എന്റെ എല്ലാ സന്തോഷങ്ങളും കണ്ടെത്തുന്നത്…

അവളുടെ ചുണ്ടിൽ ഒരു നിറപുഞ്ചിരി വിരിഞ്ഞു… അത് അവന്റെ ഹൃദയം കവർന്നു എന്ന് പറയുന്നതാണ് സത്യം. അവൻ അലിവോടെ അവളെ തന്റെ നെഞ്ചിലേക്ക് ചേർത്തുപിടിച്ചു, ചുമലിൽ താളം പിടിച്ചു…

ശേഷം രണ്ടുപേരും വീട്ടിലേക്കുള്ള യാത്രയിലായിരുന്നു, വീട് അടുക്കംതോറും വല്ലാത്തൊരു പരിഭ്രമം അവളിൽ നിറയുന്നത് അവൻ അറിയുന്നുണ്ടായിരുന്നു.. അത് അറിഞ്ഞിട്ട് എന്നതുപോലെ അവളുടെ കൈകളിൽ അവൻ ഇടയ്ക്കിടെ പിടിക്കുന്നുണ്ട്.. കൈകൾ ഒക്കെ തണുത്ത് മരച്ചിരിക്കുകയാണ്..

” നീ എന്തിനാ..? ഇങ്ങനെ പേടിക്കുന്നത്..? മമ്മ അത്ര വലിയ ഭീകര ജീവി ഒന്നുമല്ല, നീ നിന്റെ കൂട്ടുകാരുടെ കൂടെ ഒരു ഷോപ്പിങ്ങിന് പോയി എന്ന് പറഞ്ഞ മമ്മ ഒന്നും പറയാൻ പോകുന്നില്ല..

അവളുടെ മുഖത്തേക്ക് നോക്കി അവളെ സമാധാനിപ്പിക്കാൻ ആയി അവൻ പറഞ്ഞു..

” നമ്മൾ ഒരുമിച്ച് ചെല്ലുമ്പോൾ അത് കാണുമ്പോൾ ആന്റിക്ക് എന്തെങ്കിലും തോന്നിയാലോ..?

” അത് നമ്മുടെ മനസ്സിൽ കള്ളത്തരം ഉള്ളതുകൊണ്ട് തോന്നുന്നത് ആണ്, നമ്മൾ ഒരുമിച്ച് ചെല്ലുന്നത് തന്നെ ആണ് എന്തുകൊണ്ടും ബെറ്റർ, അങ്ങനെയാവുമ്പോൾ സംശയങ്ങൾ ഒന്നും തോന്നില്ല. ഞാൻ പറഞ്ഞില്ലേ ഞാൻ ഹാൻഡിൽ ചെയ്തോളാം. താൻ എന്റെ കൂടെ നിന്ന് തന്നാൽ മതി.

അവൻ അത്രയും പറഞ്ഞപ്പോൾ അവൾക്ക് സമാധാനമായിരുന്നു.

കാർ പാർക്ക് ചെയ്ത് ഫ്ലാറ്റിലേക്ക് അവന്റെ ഒപ്പം നടക്കുമ്പോൾ അവൾ ചുറ്റും നോക്കുന്നത് അവൻ കണ്ടു. ആരെങ്കിലും കാണുന്നുണ്ടോ എന്നാണ്. എല്ലാത്തിനും അവൾക്ക് ഭയമാണ്, ഡോർബൽ അടിച്ചത് സോളമൻ തന്നെയായിരുന്നു. അമല വാതിൽ തുറന്നപ്പോൾ മുൻപിൽ രണ്ടുപേരും ഒരുമിച്ച് നിൽക്കുന്നു. അവർ ഒന്നും മനസ്സിലാവാതെ രണ്ടുപേരെയും നോക്കി..

“നിങ്ങൾ ഒന്നിച്ചാണോ വന്നത്..?

സാധാരണ എന്നത് പോലെ അമല ചോദിച്ചപ്പോഴാണ് കുറച്ചെങ്കിലും മരിയ്ക്ക് ആശ്വാസമായത്,

” അതെ മറുപടി പറഞ്ഞത് സോളമൻ ആണ്…

“ഞാന് വിനുവിന്റെ കൂടെ ബീച്ചിൽ പോയിരിക്കുകയായിരുന്നു, അവിടെവച്ച് ഞാൻ ഒരാളെ കണ്ടു.

” ആര്..?

അമല ചോദിച്ചു

” ഇയാളെ തന്നെ, അവിടെ കൂട്ടുകാരുടെ ഒക്കെ കൂടെ നിന്ന് കടൽ കാണുന്നു. തിരിച്ചു പോരാന് നേരം ഒരു ലിഫ്റ്റ് കൊടുക്കാമെന്ന് വിചാരിച്ചു.

വളരെ കൂളായി പറയുന്നവനെ തന്നെ സൂക്ഷിച്ചു നോക്കുകയായിരുന്നു മരിയ.

“ആഹാ.. മോള് ബീച്ചിൽ ഒക്കെ പോയോ..?

ചിരിയോടെ അമല അവളോട് ചോദിച്ചു

” അത് പിന്നെ ആന്റി ഫ്രണ്ട്സ് ഒക്കെ നിർബന്ധിച്ചപ്പോൾ, ക്ലാസ് കഴിഞ്ഞ് ഒന്ന് ഷോപ്പിങ്ങിന് പോകാൻ പറഞ്ഞു. ഞാൻ വരുന്നില്ല എന്ന് പറഞ്ഞത് ആണ് പക്ഷേ അവരാരും കേട്ടില്ല.

” അതിനെന്താ ഇടക്കൊക്കെ ഇങ്ങനെ കൂട്ടുകാരുടെ കൂടെയൊക്കെ പോണം, എങ്കിൽ മാത്രമേ ഈ നാടും നഗരവും ഒക്കെ ഒന്ന് പരിചയപ്പെടാനും പറ്റുകയുള്ളൂ..

” ഞാൻ അതുതന്നെയാ ഇയാളോട് പറഞ്ഞത്, ഇങ്ങോട്ട് വരുന്നതുവരെ ആൾക്ക് ഭയങ്കര ടെൻഷൻ ആയിരുന്നു. താമസിച്ചു പോയതിന് മമ്മ വഴക്ക് പറയുമോന്ന്, ഒരു ലിഫ്റ്റ് കൊടുക്കാന്ന് പറഞ്ഞാൽ കേറണ്ടേ, പിന്നെ പുള്ളിക്കാരിയുടെ കൂട്ടുകാർ എല്ലാവരും കൂടി ആണ് കയറ്റി വിട്ടത്…

അമല നന്നായോന്ന് ചിരിച്ചു കാണിച്ചിരുന്നു.. അപ്പോഴാണ് മരിയയ്ക്ക് ആശ്വാസമായത്.

” നിങ്ങൾക്ക് ഞാൻ കഴിക്കാൻ വല്ലതും എടുക്കാം..

അമല അടുക്കളയിലേക്ക് പോയപ്പോൾ അവൾ ആശ്വാസപൂർവ്വം അവനെ നോക്കി…

” ഞാൻ പറഞ്ഞില്ലേ..?ഇത്രയേ ഉള്ളൂ കാര്യം നമ്മുടെ മുഖത്ത് വരുന്ന ഭാവങ്ങളാണ് നമുക്ക് തന്നെ പണി തരുന്നത്.. എന്ത് കള്ളത്തരം കാണിച്ചാലും കോൺഫിഡന്റ് ആയി പറയണം, അപ്പോൾ അപ്പുറത്ത് നിൽക്കുന്നവർക്ക് തോന്നും നമ്മൾ പറയുന്നത് സത്യമാണെന്ന്, പിന്നീട് സംശയത്തിന്റെ ഇടവരുന്നതേയില്ല…

അവൻ അവളുടെ മുഖത്തേക്ക് നോക്കി പറഞ്ഞു,

” ഈ കാര്യത്തിലെ എനിക്ക് സാറിന്റെ അത്രയ്ക്ക് എക്സ്പീരിയൻസ് ഇല്ലല്ലോ… അവനെ ഒന്ന് ആക്കിയാണ് അവൾ പറഞ്ഞതെന്ന് മനസ്സിലായതും അവൻ കൂർപ്പിച്ച് അവളെ ഒന്ന് നോക്കി..

” ആഹാ ആളങ്ങ് മാറിപ്പോയല്ലോ, നീ അങ്ങ് കൂകി തെളിഞ്ഞല്ലോ,

” സത്യമല്ലേ എക്സ്പീരിയൻസിൽ നിന്നല്ലേ ഇപ്പോൾ ഇത്രയും നന്നായിട്ട് കള്ളം പറയാൻ പറ്റുന്നത്… എനിക്ക് അങ്ങനെ പറ്റില്ല,

അവൾ അവന്റെ മുഖത്തേക്ക് നോക്കി പറഞ്ഞു

” ഒന്ന് സഹായിക്കാം എന്ന് കരുതിയപ്പോൾ നമുക്ക് കുറ്റം നമ്മളില്ലേ,

” ആകെ നനഞ്ഞു നിൽക്കുകയല്ലേ വേഗം പോയി കുളിക്കാൻ നോക്ക് ഇല്ലെങ്കിൽ പനി പിടിക്കും

അവൾ പറഞ്ഞു

” കുളിപ്പിച്ചു തരാൻ ഒരാളുണ്ടായിരുന്നെങ്കിൽ നന്നായിരുന്നു,

അവളുടെ മുഖത്തേക്ക് നോക്കി കുസൃതിയോടെ പറഞ്ഞവനെ അവൾ ഒന്ന് കൂർപ്പിച്ചു നോക്കി ..കാത്തിരിക്കൂ………

മുന്നത്തെ പാർട്ടുകൾ വായിക്കാൻ ഇവിടെ ക്ലിക്ക് ചെയ്യുക…