Sunday, 22 November 2026 About Us · Contact Us

ജന്തർ മന്തറിൽ ദേശീയ പതാക ഉയർത്തുന്നത് കുറ്റമാക്കുന്നവർ രാജ്യദ്രോഹികൾ : അഭിജീത് ദിപ്കെ

Republic Tv Journalists Beat Up Cjp Member I May Be - അഭിജിത്ത്
റിപ്പബ്ലിക് ടിവി മാധ്യമപ്രവർത്തകർ സിജെപി അംഗത്തെ മർദിച്ചു; ഞാൻ ഏത് നിമിഷവും അറസ്റ്റിലായേക്കാം: അഭിജീത് ദീപ്കെ

ന്യൂഡൽഹി: ജനാധിപത്യ പ്രതിഷേധങ്ങളുടെ കേന്ദ്രമായ ജന്തർ മന്തറിൽ ദേശീയ പതാക ഉയർത്തിയതിന് പ്രവർത്തകരെ കസ്റ്റഡിയിലെടുത്ത ഡൽഹി പൊലീസ് നടപടിയിൽ രൂക്ഷ വിമർശനവുമായി കോക്രോച്ച് ജനതാ പാർട്ടി (സിജെപി) സ്ഥാപകൻ അഭിജീത് ദിപ്കെ. ജന്തർ മന്തറിൽ ത്രിവർണ പതാക ഉയർത്തുന്നത് കുറ്റമായി കാണുന്നവർ രാജ്യദ്രോഹികളാണെന്ന് ദിപ്കെ തുറന്നടിച്ചു.

സിജെപി നേതാക്കളായ അശുതോഷ് റങ്ക, സൗരവ് ദാസ്, അജിൻക്യ ഷിൻഡെ എന്നിവരുൾപ്പെടെയുള്ള പ്രവർത്തകരെയാണ് ചൊവ്വാഴ്ച പുലർച്ചെ ജന്തർ മന്തറിൽ നിന്ന് പൊലീസ് കസ്റ്റഡിയിലെടുത്തത്. പുലർച്ചെ തന്നെ ബാരിക്കേഡുകൾ മറികടന്ന് ജന്തർ മന്തറിൽ പ്രവേശിച്ച സംഘം അവിടെ ത്രിവർണ പതാക ഉയർത്തുകയായിരുന്നു. പൊലീസ് എത്തും മുൻപ് തന്നെ പതാക ഉയർത്തൽ പൂർത്തിയാക്കിയതായി ദിപ്കെ സമൂഹ മാധ്യമമായ എക്സിൽ കുറിച്ചു. ബാരിക്കേഡ് ചാടിക്കടന്ന് അകത്ത് കയറുന്നതിന്റെ ദൃശ്യങ്ങൾ അശുതോഷ് റങ്ക തന്നെ സമൂഹമാധ്യമങ്ങളിൽ പങ്കുവെച്ചിരുന്നു.

പ്രതിഷേധ കേന്ദ്രങ്ങളുടെ പട്ടികയിൽ നിന്ന് ജന്തർ മന്തറിനെ ഒഴിവാക്കിയ ഡൽഹി പൊലീസിന്റെ തീരുമാനത്തിനെതിരെയായിരുന്നു ഈ പ്രതീകാത്മക പ്രതിഷേധം. തിങ്കളാഴ്ചയാണ് കേന്ദ്ര ആഭ്യന്തര മന്ത്രാലയം നിയോഗിച്ച സമിതിയുടെ ശുപാർശ പ്രകാരം ഡൽഹി പൊലീസ് കമ്മീഷണർ അനുരാഗ് കുമാർ ജന്തർ മന്തറിന്റെ അംഗീകാരം റദ്ദാക്കി ഉത്തരവ് പുറത്തിറക്കിയത്. ഇനി മുതൽ ജന്തർ മന്തറിൽ പ്രതിഷേധങ്ങൾക്ക് അനുമതി ഉണ്ടായിരിക്കില്ല. പകരം സെൻട്രൽ ഡൽഹിയിലെ രാംലീല മൈതാനം, നോർത്ത് ഡൽഹിയിലെ ബുറാഡി മൈതാനം, ഈസ്റ്റ് ഡൽഹിയിലെ സിബിഡി മൈതാനം എന്നിവിടങ്ങളിലായിരിക്കും പ്രതിഷേധങ്ങൾക്ക് അനുമതി നൽകുക. ഇത് സംബന്ധിച്ച വിശദമായ മാർഗരേഖ ഉടൻ പുറത്തിറക്കുമെന്നും പൊലീസ് അറിയിച്ചിട്ടുണ്ട്.

എന്നാൽ പൊലീസ് നടപടി ജനാധിപത്യത്തെ അടിച്ചമർത്താനുള്ള ശ്രമമാണെന്നാണ് സിജെപിയുടെ ആരോപണം. രാവിലെ തങ്ങളുടെ ടീം ജന്തർ മന്തറിൽ ത്രിവർണ പതാക ഉയർത്തി. അതെപ്പോഴാണ് കുറ്റമായതെന്നും പതാക ഉയർത്തിയതിന്റെ പേരിൽ ആളുകളെ അറസ്റ്റ് ചെയ്യുന്ന എന്ത് രാജ്യമാണിതെന്നും ഇത് സ്വേച്ഛാധിപത്യത്തിന്റെ ഏറ്റവും വലിയ ഉദാഹരണമാണെന്നും ദിപ്കെ മാധ്യമങ്ങളോട് പറഞ്ഞു.

കസ്റ്റഡിയിലെടുത്തവർക്ക് നിയമപരമായ അവകാശങ്ങൾ നിഷേധിക്കരുതെന്നും ദിപ്കെ ആവശ്യപ്പെട്ടു. 24 മണിക്കൂർ അഭിഭാഷകനെ കാണാൻ പോലും അനുവദിക്കാത്ത സാഹചര്യം ഉണ്ടാകരുത്. തനിക്ക് മുൻപ് ഇത്തരമൊരു അനുഭവം ഉണ്ടായിട്ടുണ്ടെന്നും അദ്ദേഹം ചൂണ്ടിക്കാട്ടി.

ജന്തർ മന്തർ വെറുമൊരു സ്ഥലമല്ല മറിച്ച് ചെറുത്തുനിൽപ്പിന്റെ ആത്മാവാണ്. ഇത് സർക്കാരിന്റെ സ്വകാര്യ സ്വത്തല്ല 140 കോടി ഇന്ത്യക്കാരുടേതാണ്. തങ്ങളെ ഭയപ്പെടുത്തി നിശബ്ദരാക്കാൻ കഴിയില്ല. രാജ്യം മുഴുവൻ ജന്തർ മന്തർ ആകും. മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാർ രാജിവെക്കും വരെ തങ്ങൾ അവിടെ ത്രിവർണ പതാക ഉയർത്തിക്കൊണ്ടിരിക്കുമെന്നും ദീപ്കെ വ്യക്തമാക്കി.

ചെറുത്തുനിൽപ്പിനെ പട്ടികയിൽ നിന്ന് ഒഴിവാക്കി ഇല്ലാതാക്കാൻ കഴിയില്ലെന്നായിരുന്നു ദിപ്കെയുടെ എക്സിൽ പങ്കുവെച്ച പോസ്റ്റ്. ജന്തർ മന്തറിനെ തൊടരുതെന്ന് അശുതോഷ് റങ്കയും കുറിച്ചു.

അതേസമയം വോട്ടർ പട്ടികയുടെ പ്രത്യേക തീവ്ര പരിഷ്കരണത്തിൽ (എസ്.ഐ.ആർ) ക്രമക്കേട് ആരോപിച്ച് മുഖ്യ തെരഞ്ഞെടുപ്പ് കമ്മീഷണറുടെ രാജി ആവശ്യപ്പെട്ടുള്ള പ്രതിഷേധങ്ങൾ ഡൽഹിയിൽ ശക്തമാകുന്നതിനിടെയാണ് ജന്തർ മന്തറിന് വിലക്ക് ഏർപ്പെടുത്തിയത്. എസ്ഐആർ വിഷയത്തിൽ പ്രതിപക്ഷ പാർട്ടികളും പൗരസമൂഹവും ഒന്നിച്ച് പ്രതിഷേധം തുടരുകയാണ്.

സ്വതന്ത്ര പത്രപ്രവർത്തനത്തെ പിന്തുണയ്ക്കൂ ❤️
ഒറ്റത്തവണയോ എല്ലാ മാസവുമോ ചെറിയൊരു തുക നൽകാം
Support

ബന്ധപ്പെട്ട വാർത്തകൾ

രണ്ടര മാസം പ്രായമുള്ള സഹോദരി അസുഖത്തെ തുടർന്ന് മരിച്ചു; മനോവിഷമം കാരണം 10 വയസുകാരി ജീവനൊടുക്കി

രണ്ടര മാസം പ്രായമുള്ള സഹോദരി അസുഖത്തെ തുടർന്ന് മരിച്ചു; മനോവിഷമം കാരണം 10 വയസുകാരി ജീവനൊടുക്കി

5 മണിക്കൂർ മുൻപ്
​13 ലക്ഷത്തിന്റെ കാർ വേണമെന്ന് വാശി; സ്ത്രീധനമായി നൽകിയത് 9.5 ലക്ഷത്തിന്റെ കാറായതിനാൽ വിവാഹത്തിൽ നിന്ന് പിന്മാറി ഡൽഹി പോലീസ് ഉദ്യോഗസ്ഥൻ

​13 ലക്ഷത്തിന്റെ കാർ വേണമെന്ന് വാശി; സ്ത്രീധനമായി നൽകിയത് 9.5 ലക്ഷത്തിന്റെ കാറായതിനാൽ വിവാഹത്തിൽ നിന്ന് പിന്മാറി ഡൽഹി പോലീസ് ഉദ്യോഗസ്ഥൻ

6 മണിക്കൂർ മുൻപ്
ചൗമീൻ കഴിച്ചു; ഭക്ഷ്യവിഷബാധയേറ്റ് 100ലധികം കുട്ടികൾ ആശുപത്രിയിൽ

ചൗമീൻ കഴിച്ചു; ഭക്ഷ്യവിഷബാധയേറ്റ് 100ലധികം കുട്ടികൾ ആശുപത്രിയിൽ

9 മണിക്കൂർ മുൻപ്
രാജസ്ഥാനിൽ വാഹനാപകടം; ഒരു കുടുംബത്തിലെ ഒൻപത് പേർ മരിച്ചു: എട്ട് പേർക്ക് പരുക്ക്

രാജസ്ഥാനിൽ വാഹനാപകടം; ഒരു കുടുംബത്തിലെ ഒൻപത് പേർ മരിച്ചു: എട്ട് പേർക്ക് പരുക്ക്

11 മണിക്കൂർ മുൻപ്
മുംബൈയിൽ നിന്ന് ടാൻസാനിയയിലേക്ക് നേരിട്ടുള്ള പ്രതിദിന വിമാന സർവീസ് ആരംഭിച്ച് ഇൻഡിഗോ; ഇന്ത്യ-ആഫ്രിക്ക വ്യോമബന്ധം കൂടുതൽ ശക്തമാകുന്നു

മുംബൈയിൽ നിന്ന് ടാൻസാനിയയിലേക്ക് നേരിട്ടുള്ള പ്രതിദിന വിമാന സർവീസ് ആരംഭിച്ച് ഇൻഡിഗോ; ഇന്ത്യ-ആഫ്രിക്ക വ്യോമബന്ധം കൂടുതൽ ശക്തമാകുന്നു

12 മണിക്കൂർ മുൻപ്
സ്വർണം വാങ്ങുന്നത് കുറയ്ക്കണമെന്ന ആഹ്വാനം ജനങ്ങൾ കേട്ടു; പ്രശംസിച്ച് പ്രധാനമന്ത്രി മോദി

സ്വർണം വാങ്ങുന്നത് കുറയ്ക്കണമെന്ന ആഹ്വാനം ജനങ്ങൾ കേട്ടു; പ്രശംസിച്ച് പ്രധാനമന്ത്രി മോദി

13 മണിക്കൂർ മുൻപ്