രാജസ്ഥാനിൽ വ്യോമസേനയുടെ ജാഗ്വാർ യുദ്ധവിമാനം തകർന്നുവീണു; പൈലറ്റിന് ദാരുണാന്ത്യം

ജയ്‌പൂർ: രാജസ്ഥാനിലെ ചുരു ജില്ലയിൽ ഇന്ത്യൻ വ്യോമസേനയുടെ ജാഗ്വാർ യുദ്ധവിമാനം തകർന്നുവീണു. അപകടത്തിൽ പൈലറ്റ് മരിച്ചതായി പ്രതിരോധ ഉദ്യോഗസ്ഥർ അറിയിച്ചു.

ഇന്ന് (2025 ജൂലൈ 9, ബുധനാഴ്ച) ഉച്ചയ്ക്ക് 1:25 ഓടെ ചുരു ജില്ലയിലെ രത്തൻഗഡിനടുത്തുള്ള ഭാനോദ ഗ്രാമത്തിലെ ഒരു കൃഷിയിടത്തിലേക്കാണ് വിമാനം തകർന്നുവീണത്. സൂറത്ഗഢ് വ്യോമതാവളത്തിൽ നിന്ന് പറന്നുയർന്ന വിമാനം പതിവ് പരിശീലന പറക്കലിനിടെയാണ് അപകടത്തിൽപ്പെട്ടത്.

വിമാനം തകർന്നുവീണയുടൻ വൻ ശബ്ദത്തോടെ തീ ആളിക്കത്തുകയായിരുന്നു. അപകടസ്ഥലത്ത് നിന്ന് മനുഷ്യ ശരീരഭാഗങ്ങൾ കണ്ടെത്തിയതായി രാജൽദേശർ എസ്എച്ച്ഒ കംലേഷ് അറിയിച്ചു. പൈലറ്റിന്റെ മൃതദേഹം തിരിച്ചറിയാനുള്ള ശ്രമങ്ങൾ നടന്നുവരികയാണ്. അപകടകാരണം വ്യക്തമല്ലെന്നും, സംഭവത്തിൽ വ്യോമസേന വിശദമായ അന്വേഷണം പ്രഖ്യാപിച്ചിട്ടുണ്ടെന്നും പ്രതിരോധ വൃത്തങ്ങൾ കൂട്ടിച്ചേർത്തു.