പ്രമുഖ പലചരക്ക് കട ശൃംഖലകൾക്ക് തങ്ങളുടെ “പ്രൈവറ്റ് ലേബൽ” (സ്വന്തം ബ്രാൻഡ്) വൈനും ബിയറും വിൽക്കാൻ അനുവാദം നൽകണമെന്ന് ഒന്റാറിയോ സർക്കാരിനോട് ആവശ്യപ്പെട്ടു. കോസ്റ്റ്‌കോയുടെ കിർക്ക്‌ലാൻഡ് സിഗ്നേച്ചർ ബ്രാൻഡ് പോലെ, സൂപ്പർമാർക്കറ്റ് ശൃംഖലകൾക്ക് അവരുടെ സ്വന്തം ബ്രാൻഡിൽ മദ്യം വിൽക്കാൻ അനുമതി നൽകുന്നത് സംബന്ധിച്ച് പ്രീമിയർ ഡഗ് ഫോർഡ് സർക്കാരുമായി വ്യവസായ രംഗത്തെ പ്രമുഖർ ചർച്ച നടത്തിയിരുന്നു.
നിലവിലെ പ്രവിശ്യാ നിയമങ്ങൾ പ്രകാരം, ഏതെങ്കിലും ബിയർ അല്ലെങ്കിൽ വൈൻ ബ്രാൻഡിൽ “നേരിട്ടോ അല്ലാതെയോ സാമ്പത്തിക താൽപ്പര്യമുള്ള” മദ്യം പലചരക്ക് കടകളിൽ വിൽക്കുന്നത് നിരോധിച്ചിട്ടുണ്ട്. എന്നാൽ ഈ നിരോധനം എടുത്തുകളയണമെന്നാണ് വലിയ റീട്ടെയിലർമാരുടെ ആവശ്യം.
ഈ മാറ്റം നടപ്പിലാക്കിയാൽ അത് ഒന്റാറിയോയിലെ ചെറിയ വൈൻ നിർമ്മാതാക്കൾക്ക് വലിയ തിരിച്ചടിയാകുമെന്ന് ആശങ്ക ഉയർന്നിട്ടുണ്ട്. 100-ൽ അധികം വൈൻ നിർമ്മാതാക്കളെ പ്രതിനിധീകരിക്കുന്ന ഒന്റാറിയോ ക്രാഫ്റ്റ് വൈനറീസ് പ്രസിഡന്റും സിഇഒയുമായ മിഷേൽ വാസിലിഷെൻ, പലചരക്ക് കടകളിലും വലിയ സ്റ്റോറുകളിലും സ്വന്തം ബ്രാൻഡ് വൈനുകൾക്ക് അനുമതി നൽകുന്നത് പ്രാദേശിക വൈൻ വ്യവസായത്തിന് കനത്ത പ്രഹരമാകുമെന്ന് അഭിപ്രായപ്പെട്ടു. പ്രാദേശികമായി ഉത്പാദിപ്പിക്കുന്ന വൈനുകളെ വലിയ സൂപ്പർമാർക്കറ്റ് ശൃംഖലകൾക്ക് പിന്തള്ളാൻ ഇത് ഇടയാക്കുമെന്നും അവർ ചൂണ്ടിക്കാട്ടി.
കഴിഞ്ഞ വർഷം, ഒന്റാറിയോ സർക്കാർ 2026-ഓടെ എല്ലാ പലചരക്ക് കടകളിലും മദ്യവിൽപ്പനയ്ക്ക് അനുമതി നൽകുമെന്ന് പ്രഖ്യാപിച്ചിരുന്നു. ഇതിന്റെ ഭാഗമായി ഈ വർഷം ഓഗസ്റ്റ് 1 മുതൽ 450 പലചരക്ക് കടകളിൽ ബിയറും വൈനും വിൽക്കാൻ അനുമതി നൽകിയിട്ടുണ്ട്. എന്നാൽ സ്വന്തം ബ്രാൻഡ് മദ്യം വിൽക്കുന്നതിനുള്ള നിരോധനം തുടരണമെന്നാണ് പ്രാദേശിക വൈൻ വ്യവസായത്തിന്റെ ആവശ്യം.
