ഇന്ത്യ കൂടുതൽ എസ്-400 യൂണിറ്റുകൾ വാങ്ങിയേക്കും; റഷ്യയുമായി നിർണായക ചർച്ചകൾ സജീവം
ഇന്ത്യ റഷ്യയിൽ നിന്ന് കൂടുതൽ എസ്-400 ട്രയംഫ് വ്യോമപ്രതിരോധ സംവിധാനങ്ങൾ വാങ്ങാൻ സാധ്യതയുണ്ടെന്ന് റിപ്പോർട്ടുകൾ. അടുത്തിടെ നടന്ന ഷാങ്ഹായ് കോ-ഓപ്പറേഷൻ ഓർഗനൈസേഷൻ (SCO) പ്രതിരോധ മന്ത്രിമാരുടെ യോഗത്തിനിടെ ഇന്ത്യൻ പ്രതിരോധ മന്ത്രി രാജ്‌നാഥ് സിംഗും റഷ്യൻ പ്രതിരോധ മന്ത്രി ആൻഡ്രി ബെലോസോവും തമ്മിൽ നടന്ന ചർച്ചയിൽ ഇത് സംബന്ധിച്ച താൽപ്പര്യം ഇന്ത്യ ഔദ്യോഗികമായി അറിയിച്ചു എന്നാണ് സൂചന.
2018-ൽ ഒപ്പുവെച്ച 5.43 ബില്യൺ ഡോളറിന്റെ കരാർ പ്രകാരം ഇന്ത്യ അഞ്ച് എസ്-400 യൂണിറ്റുകളാണ് റഷ്യയിൽ നിന്ന് വാങ്ങാൻ തീരുമാനിച്ചിരുന്നത്. ഇതിൽ മൂന്നെണ്ണം ഇതിനോടകം ഇന്ത്യക്ക് ലഭിക്കുകയും വിവിധ തന്ത്രപ്രധാന മേഖലകളിൽ വിന്യസിക്കുകയും ചെയ്തിട്ടുണ്ട്. റഷ്യ-യുക്രെയ്ൻ യുദ്ധം കാരണം ബാക്കിയുള്ള രണ്ട് യൂണിറ്റുകളുടെ വിതരണം വൈകിയിരുന്നു. ഈ യൂണിറ്റുകൾ 2026-27 ഓടെ കൈമാറുമെന്ന് റഷ്യ ഇന്ത്യക്ക് ഉറപ്പ് നൽകിയിട്ടുണ്ട്.
‘ഓപ്പറേഷൻ സിന്ദൂർ’ പോലുള്ള സമീപകാല സൈനിക നടപടികളിൽ എസ്-400 സംവിധാനത്തിന്റെ മികച്ച പ്രകടനം, കൂടുതൽ യൂണിറ്റുകൾ സ്വന്തമാക്കാനുള്ള ഇന്ത്യയുടെ താൽപ്പര്യത്തിന് പിന്നിലെ പ്രധാന കാരണമായി വിലയിരുത്തപ്പെടുന്നു. പാകിസ്ഥാനിൽ നിന്നുള്ള മിസൈൽ, ഡ്രോൺ ആക്രമണങ്ങളെ തടയുന്നതിൽ ഈ സംവിധാനം നിർണായക പങ്ക് വഹിച്ചിരുന്നു.
എസ്-400 ട്രയംഫ് ലോകത്തിലെ ഏറ്റവും നൂതനവും ശക്തവുമായ വ്യോമപ്രതിരോധ സംവിധാനങ്ങളിലൊന്നാണ്. ഡ്രോണുകൾ, മിസൈലുകൾ, റോക്കറ്റുകൾ, യുദ്ധവിമാനങ്ങൾ എന്നിവയുൾപ്പെടെ മിക്കവാറും എല്ലാത്തരം വ്യോമാക്രമണങ്ങളിൽ നിന്നും സംരക്ഷണം നൽകാൻ ഇതിന് കഴിയും. 400 കിലോമീറ്റർ വരെ ദൂരപരിധിയിൽ ഒന്നിലധികം ലക്ഷ്യങ്ങളെ ഒരേസമയം തകർക്കാൻ ഈ സംവിധാനത്തിന് ശേഷിയുണ്ട്.
അധിക എസ്-400 യൂണിറ്റുകൾക്ക് പുറമെ, ഇന്ത്യൻ വ്യോമസേനയുടെ കൈവശമുള്ള സു-30 MKI യുദ്ധവിമാനങ്ങളുടെ നവീകരണവും സംയുക്ത പ്രതിരോധ ഉൽപ്പാദന പദ്ധതികളും ഇരുരാജ്യങ്ങളും തമ്മിലുള്ള ചർച്ചയിൽ വിഷയമായി. ഇന്ത്യ തദ്ദേശീയമായി വികസിപ്പിക്കുന്ന ‘പ്രോജക്ട് കുശ’ എന്ന വ്യോമപ്രതിരോധ സംവിധാനവും പുരോഗതിയിലാണെന്നും 2028-29 ഓടെ ഇത് പ്രവർത്തനക്ഷമമാക്കാനാണ് ലക്ഷ്യമിടുന്നതെന്നും റിപ്പോർട്ടുകൾ പറയുന്നു.
