ഒമാൻ മനുഷ്യക്കടത്ത് തടയാൻ നിയമനിർമ്മാണം ശക്തമാക്കി

മസ്കറ്റ്: മനുഷ്യക്കടത്ത് തടയുന്നതിനുള്ള നിയമനിർമ്മാണവും സ്ഥാപനപരമായ ചട്ടക്കൂടും ശക്തിപ്പെടുത്തുന്നതിൽ ഒമാൻ വലിയ പുരോഗതി കൈവരിച്ചതായി റോയൽ ഒമാൻ പോലീസ് (ROP) അറിയിച്ചു. അന്താരാഷ്ട്ര മനുഷ്യക്കടത്ത് വിരുദ്ധ ദിനത്തോടനുബന്ധിച്ച് റോയൽ ഒമാൻ പോലീസും മറ്റ് ബന്ധപ്പെട്ട അധികാരികളും നടത്തിയ പ്രസ്താവനയിലാണ് ഇക്കാര്യം വ്യക്തമാക്കിയത്. “ഓർഗനൈസ്ഡ് ക്രൈം – എൻഡ് എക്സ്പ്ലോയിറ്റേഷൻ” എന്ന ഈ വർഷത്തെ ആഗോള പ്രമേയത്തിന് അനുസൃതമായാണ് ഒമാൻ മനുഷ്യക്കടത്ത് തടയുന്നതിനുള്ള ശ്രമങ്ങൾ ഊർജിതമാക്കിയിരിക്കുന്നത്. നിയമനിർമ്മാണങ്ങൾ പരിഷ്കരിച്ചും, ഏജൻസികൾ തമ്മിലുള്ള ഏകോപനം മെച്ചപ്പെടുത്തിയും, ഉദ്യോഗസ്ഥർക്ക് ആവശ്യമായ പരിശീലനവും ടൂളുകളും നൽകിയും ഒമാൻ ഈ കുറ്റകൃത്യങ്ങളെ പ്രൊഫഷണലായി നേരിടാൻ തയ്യാറാണെന്ന് ക്രിമിനൽ ഇൻവെസ്റ്റിഗേഷൻ ഡയറക്ടർ ജനറൽ ബ്രിഗ്. ജമാൽ ബിൻ ഹബീബ് അൽ ഖുറൈഷി പറഞ്ഞു. മനുഷ്യക്കടത്ത് വിരുദ്ധ ദേശീയ സമിതി “അമാൻ” എന്ന പേരിൽ ഒരു ബോധവൽക്കരണ കാമ്പയിനും ആരംഭിച്ചിട്ടുണ്ട്. പൊതുജനങ്ങളെ ബോധവൽക്കരിക്കാനും, റിപ്പോർട്ട് ചെയ്യാൻ പ്രോത്സാഹിപ്പിക്കാനും, ഇരകൾക്ക് അവരുടെ അവകാശങ്ങളെക്കുറിച്ച് വിവരങ്ങൾ നൽകാനും ഈ കാമ്പയിൻ ലക്ഷ്യമിടുന്നു. മനുഷ്യക്കടത്ത് ഇരകളെ തിരിച്ചറിയാനും സംരക്ഷിക്കാനും ROP ഒരു പുതിയ സംവിധാനം നടപ്പിലാക്കിയിട്ടുണ്ട്. പബ്ലിക് പ്രോസിക്യൂഷനുമായും സാമൂഹിക വികസന മന്ത്രാലയവുമായും മെച്ചപ്പെട്ട ഏകോപനം ഉറപ്പാക്കി, ഇരകളെ ഔദ്യോഗിക സംരക്ഷണ കേന്ദ്രങ്ങളിലേക്ക് റഫർ ചെയ്യാൻ ഇത് സഹായിക്കും. ഈ വർഷം അന്വേഷിച്ച നിരവധി കേസുകളിൽ രാജ്യാന്തര ക്രിമിനൽ ശൃംഖലകൾ ഉൾപ്പെട്ടിരുന്നതായും ബ്രിഗ്. അൽ ഖുറൈഷി വെളിപ്പെടുത്തി. നിയമപരമായ തൊഴിൽ കരാറുകളുടെ പ്രാധാന്യവും, തെറ്റിദ്ധാരണകൾ മനുഷ്യക്കടത്തിന് ഇടയാക്കാമെന്നും അദ്ദേഹം ഊന്നിപ്പറഞ്ഞു. മനുഷ്യക്കടത്ത് തടയുന്നതിനും എല്ലാ താമസക്കാർക്കും സമാധാനപരമായ ജീവിതം ഉറപ്പാക്കുന്നതിനും റോയൽ ഒമാൻ പോലീസ് പ്രതിജ്ഞാബദ്ധമാണെന്നും അദ്ദേഹം കൂട്ടിച്ചേർത്തു.