🎶 സോളമന്റെ ഉത്തമഗീതം 🎶❤️: ഭാഗം 69

രചന: റിൻസി പ്രിൻസ്‌

കിച്ചൻ സ്ലാബിന് മുകളിൽ കയറിയിരുന്ന് മരിയ അരിയുന്ന ക്യാരറ്റ് എടുത്ത് കഴിക്കുന്ന സോളമനെ കണ്ടപ്പോൾ എന്തെന്നില്ലാത്ത ദേഷ്യം ആണ് ജീനയ്ക്ക് ഉണ്ടായത്. മരിയയോട് അവൻ കാണിക്കുന്ന സ്വാതന്ത്ര്യവും ഒന്നും അവൾക്ക് അത്ര ഇഷ്ടം ആവുന്നുണ്ടായിരുന്നില്ല

” ഞാനെന്തെങ്കിലും ഹെല്പ് ചെയ്യണോ ആന്റി.?

അമലയോട് ആയി ജീന ചോദിച്ചു.

അവളുടെ ആ ചോദ്യം കേട്ടതും അമ്പരപ്പാണ് മരിയ്ക്ക് ഉണ്ടായത്.

സാധാരണ അങ്ങനെ ഒരു രീതിയിൽ ഇടപെടുന്ന വ്യക്തിയെയല്ല ജീന. അമ്മയെ പോലും സാഹയിക്കാറില്ല.

അപ്പോൾ തന്നെ ജീന കൂടി അറിഞ്ഞു കൊണ്ടാണ് ഈ വിവാഹാലോചന എന്ന് മരിയയ്ക്ക് മനസ്സിലായി.

അമലയോട് അടുക്കുവാനുള്ള തത്രപ്പാടാണ് ഈ കാണിക്കുന്നത്.

” വേണ്ട മോളെ ഞങ്ങൾക്ക് ചെയ്യാവുന്ന ജോലിയെ ഇവിടെ ഉള്ളൂ..

അമല പറഞ്ഞതും വിളറി വെളുത്തത് പോലെ നിന്നു പോയിരുന്നു ജീന..

” ഹാ… ഒരാൾ ജോലി ചെയ്യാൻ താല്പര്യത്തോട് വരുമ്പോൾ മമ്മ ഇങ്ങനെ പറയാതെ, ആ കൊച്ചിനും കൂടി ചെയ്യാൻ പറ്റുന്ന എന്തെങ്കിലും ചെറിയ ജോലി കൊടുക്കു, ദേ നമ്മുടെ മരിയ മേഡത്തിന് ഒരു അസിസ്റ്റന്റ് ആവുമല്ലോ…

ചെറുചിരിയോടെ സോളമൻ പറഞ്ഞപ്പോൾ ” മരിയയുടെ അസിസ്റ്റന്റ്” എന്ന് അവളെ പറഞ്ഞത് ജീനക്ക് ഇഷ്ടപ്പെട്ടില്ല.

,” അതിരിക്കട്ടെ നീ അവക്ക് ഇരട്ടി പണി ഉണ്ടാക്കിവെക്കുകയാണല്ലോ.? അവൾ അരിഞ്ഞ ഏതാണ്ട് മുക്കാൽ ക്യാരറ്റും നീ തിന്ന് തീർത്തല്ലോ… വയ്ക്കട അവിടെ

സ്നേഹത്തോടെ അമല അവനെ ശാസിച്ചു.

” നമ്മളില്ലേ…

അതും പറഞ്ഞുകൊണ്ട് ഒരു ക്യാരറ്റും കൂടി എടുത്ത് അവൻ അവിടെ നിന്നും എഴുന്നേറ്റു..

മരിയയും അമലയും മാത്രം ഉള്ളതുകൊണ്ടാണ് അവൻ അടുക്കളയിൽ ഇരുന്നത്. ജീന കൂടി അവിടേക്ക് വന്നതോടെ അവർ എന്തെങ്കിലും സംസാരിക്കട്ടെ എന്ന് കരുതി അവൻ അടുക്കളയിൽ നിന്നും ഇറങ്ങിപ്പോയി. അത് കണ്ടപ്പോൾ ജീനയ്ക്ക് വല്ലാത്ത സങ്കടമായി.

സോളമൻ അവിടെ ഉള്ളതുകൊണ്ടാണ് അടുക്കളയിലേക്ക് കയറി വന്നത് തന്നെ. ഇനിയിപ്പോൾ ഇറങ്ങിപ്പോയാൽ അമല സംശയിക്കില്ലേ എന്ന് അവൾ ഓർത്തു..

അമല പെട്ടെന്ന് തന്നെ കാപ്പിയിട്ട് ഗ്ലാസിലേക്ക് പകർത്തി. അതിൽ കുറച്ച് ആദ്യം ജീനയ്ക്ക് നീട്ടി..

” മോള് കാപ്പി കുടിക്കുമോ.? ഇവിടെ പാൽചായയും കാപ്പിയും ഒന്നും പതിവില്ല.

” ഞാനെന്തും കുടിക്കും ആന്റി

അവൾ വിനയത്തോടെ പറഞ്ഞു. വീട്ടിൽ ചായ കിട്ടിയില്ലേൽ ബഹളം ഉണ്ടാക്കുന്നവൾ ആണെന്ന് മരിയ ഓർത്തു.

” മരിയെ മോളും കുടിക്ക്…

അവൾക്ക് അരികിലേക്ക് ഗ്ലാസ് വച്ചുകൊണ്ട് അമല പറഞ്ഞു.

“മരിയെ ഇത് സോളമന് ഒന്ന് കൊണ്ടു കൊടുക്കാമോ..

സോളമന്റെ കാപ്പി മരിയയുടെ കയ്യിലേക്ക് കൊടുത്തുകൊണ്ട് അമല പറഞ്ഞു… പെട്ടെന്ന് തന്നെ ആ കാപ്പി തട്ടി പറിച്ച് എന്നതുപോലെ വാങ്ങിയിരുന്നു ജീന.

” ഞാൻ കൊടുക്കാം ആന്റി.

അവളുടെ ആ പ്രവർത്തി കൂടുതൽ വേദനയിലേക്കാണ് മരിയയെ കൊണ്ടുവന്ന് എത്തിച്ചത്. തന്നിൽ നിന്നും പ്രിയപ്പെട്ട എന്തോ ഒന്ന് പിടിച്ചു വാങ്ങുന്നത് പോലെ. അവൾ ഹോളിലേക്ക് പോയപ്പോൾ അതേ നോട്ടം നോക്കി തന്നെ കുറച്ചു നേരം മരിയ നിന്നിരുന്നു..

” ജീന എങ്ങനെയാ ആള് പാവമാണോ മോളെ..?

അമല ചോദിച്ചപ്പോൾ മരിയ അത്ഭുതത്തോടെ അവരെ നോക്കി.

മകന് ചേരുന്നവൾ ആണോ എന്ന് അറിയാനുള്ള ഒരു ചോദ്യമാണോ ഇത് എന്ന് അവൾ ഓർത്തു.

” ജീന നല്ല കുട്ടിയാ..

മരിയ പറഞ്ഞു

” മോളോട് എങ്ങനെയാ.? നല്ല ഇഷ്ടത്തിലാണോ.?

“ഉം… കുഴപ്പമില്ല

അവൾ പറഞ്ഞു

അമലയുടെ ചോദ്യവും ജീനയുടെ ചായ വാങ്ങി കൊണ്ടുള്ള പോക്കും എല്ലാം കൂടി ആയപ്പോഴേക്കും മരയ്ക്ക് വല്ലാത്ത ഒരു അവസ്ഥയായിരുന്നു.

ജീന ചായയുമായി എത്തുമ്പോൾ മൊബൈൽ നോക്കി കൊണ്ടിരിക്കുകയാണ് സോളമൻ.

ചായയുമായി വരുന്നത് മരിയ ആയിരിക്കുമെന്നാണ് അവൻ പ്രതീക്ഷിച്ചത്.

എന്നാൽ ജീന കാപ്പിയുമായി വന്നത് അവന് ഒട്ടും തന്നെ ഇഷ്ടപ്പെട്ടില്ല. കാപ്പിയും കൊണ്ടുവരുമ്പോൾ അവളോട് സംസാരിക്കാം എന്നായിരുന്നു സോളമൻ കരുതിയത്.

അതുകൂടി നഷ്ടമായ നിമിഷം അവനു വല്ലാത്ത സങ്കടം തോന്നിയിരുന്നു.

“കാപ്പി,

ചിരിയോടെ അവൾ അവന് നേരെ കാപ്പി നീട്ടിയപ്പോൾ അവനത് വാങ്ങി അവൾക്ക് ഒരു പുഞ്ചിരി സമ്മാനിച്ചു.

അവനോട് എങ്ങനെ സംസാരിച്ചു തുടങ്ങും എന്നോർത്താണ് അവൾ അടുത്ത് ഇരുന്നത് അപ്പോഴേക്കും കാപ്പിയുമായി അവൻ മുറിയിലേക്ക് പോയിരുന്നു. ജീനയ്ക്ക് വല്ലാത്ത വേദന തോന്നി.

മുറിയിലേക്ക് ചെന്നപ്പോഴും സോളമൻ ചിന്തിച്ചത് മരിയയെ കുറിച്ചാണ്. അവൾക്ക് എന്തോ വിഷമം ഉള്ളതുപോലെ അവന് തോന്നിയിരുന്നു…

അവളെ ഒന്നുകൂടി കാണണമെന്ന് കരുതിയാണ് കാപ്പി ഒറ്റ വലിക്ക് കുടിച്ച് ഗ്ലാസും കൊണ്ട് അവൻ അടുക്കളയിൽ
ചെന്നത്. നോക്കിയപ്പോൾ അവിടെ വല്യമ്മച്ചി വന്നിട്ടുണ്ട്.

“മമ്മ…..

അതും വിളിച്ചു അവൻ അകത്തേക്ക് വന്നപ്പോൾ പെട്ടെന്ന് മരിയ തിരിഞ്ഞുനോക്കി.

ആ നിമിഷം തന്നെ അവൾ അരിഞ്ഞു കൊണ്ടിരുന്ന പച്ചക്കറിക്കൊപ്പം അവളുടെ വിരലും ഒന്ന് ചീന്തി…

“ആഹ്ഹ്ഹ്….അമ്മേ

വേദന കൊണ്ട് അവൾ വിളിച്ചു പോയിരുന്നു,

അപ്പോഴാണ് അമല അങ്ങോട്ട് നോക്കിയത്…

” എന്തുപറ്റി മോളെ..? കൈ മുറിഞ്ഞൊ.?

അമല ആധിയോടെ ഓടി അവൾക്ക് അരികിലേക്ക് എത്തി.

ഒപ്പം തന്നെ സോളമനും..

” നന്നായി മുറിഞ്ഞൊ..,?

അവൻ അവളുടെ കയ്യിൽ പിടിച്ചുനോക്കി.

അവൻ അവളുടെ കയ്യിൽ പിടിച്ചു. വല്ല്യമ്മച്ചിയ്ക്ക് അവൻ മരിയയുടെ കൈയ്യിൽ പിടിച്ചത് ഇഷ്ടപ്പെട്ടില്ല.

” നീ ആ പെണ്ണിന്റെ കയ്യിൽ നിന്ന് വിട്ടെ സോളമാ, അത്രക്കൊന്നും പറ്റിയിട്ടില്ല… അതെങ്ങനെയാ ആണുങ്ങളുടെ ശബ്ദം കേട്ടാൽ ഉടനെ ചെയ്ത ജോലി പൂർത്തിയാക്കാതെ നേരെ തിരിഞ്ഞ് അങ്ങ് നോക്കുവല്ലേ… വിത്ത് ഗുണം, അല്ലാതെന്താ..?

വല്യമ്മ പറഞ്ഞപ്പോഴേക്കും അവൾ കരഞ്ഞുകൊണ്ട് പുറത്തേക്ക് ഇറങ്ങിപ്പോയിരുന്നു..

അത് കണ്ടപ്പോൾ സോളമന് വല്ലാത്ത വിഷമവും ദേഷ്യവും വന്നു…

” വല്യമ്മച്ചിക്ക് ഇത് എന്തിന്റെ സൂക്കേടാ, ഏതു നേരം നോക്കിയാലും അവളെ കുത്തി പറഞ്ഞു കൊണ്ടിരിക്കണം. പ്രായമായാൽ കുറച്ചൊക്കെ ഒതുങ്ങണം. ഈ സ്വഭാവം ഒക്കെ സ്വന്തം വീട്ടിൽ വച്ചാൽ മതി.

ദേഷ്യത്തോടെ അവരോടെ അത്രയും പറഞ്ഞ് അവൻ പുറത്തേക്കിറങ്ങി പോയപ്പോൾ അമല പോലും അത്ഭുതപ്പെട്ടു പോയിരുന്നു..

ഇത്രയും ദേഷ്യത്തിൽ അവനെ കണ്ടിട്ടില്ല.

പെട്ടെന്ന് അടുക്കളയിലേക്ക് വന്ന ജീനയും അവൻ ദേഷ്യപെട്ട് പുറത്തേക്കിറങ്ങി പോകുന്നതാണ് കണ്ടത്.

“എന്താണ് ആന്റി

ജീന ചോദിച്ചു

” ഒന്നുമില്ല മോളെ

അമല പെട്ടെന്ന് മറുപടി പറഞ്ഞു

ശേഷം അമ്മച്ചിയേ ഒന്ന് രൂക്ഷമായി നോക്കി, അവർ വിഷമിച്ചു എന്നത് പോലെ അപ്പോഴേക്കും പുറത്തേക്ക് ഇറങ്ങിപ്പോയി.

അമല അവരുടെ പിന്നാലെ പോയി.

” അമ്മച്ചി അവൻ ഒന്നും മനസ്സിൽ വിചാരിച്ച് പറഞ്ഞതായിരിക്കില്ല.

അമ്മച്ചി ആ സമയത്ത് അങ്ങനെ പറഞ്ഞതുകൊണ്ട് ആണ്.

അമല അവരോട് പറഞ്ഞു.

” ഏതോ ഒരു പെണ്ണിന് വേണ്ടി എന്നെ ഇങ്ങനെയൊക്കെ അവൻ പറഞ്ഞല്ലോ, എനിക്ക് തൃപ്തിയായി..! ഞാൻ ഇന്ന് തന്നെ എന്റെ വീട്ടിൽ പോവാ, എനിക്ക് കൊച്ചുമക്കളുടെ ആട്ടും തുപ്പും ഒന്നും കേട്ട് കഴിയേണ്ട യാതൊരു ആവശ്യവുമില്ല,

ദേഷ്യത്തോടെ അതും പറഞ്ഞു അവരും മുറിയിലേക്ക് പോയപ്പോൾ അമല വല്ലാത്തൊരു അവസ്ഥയിലായിരുന്നു. മുറിയിൽ പോയി ഫസ്റ്റഡ് ബോക്സും എടുത്ത് എന്തും വരട്ടെ എന്ന് കരുതി സോളമൻ മരിയുടെ മുറി തുറന്നു അകത്തേക്ക് കയറി…കാത്തിരിക്കൂ………

മുന്നത്തെ പാർട്ടുകൾ വായിക്കാൻ ഇവിടെ ക്ലിക്ക് ചെയ്യുക…