🎶 സോളമന്റെ ഉത്തമഗീതം 🎶❤️: ഭാഗം 78

രചന: റിൻസി പ്രിൻസ്‌

അവൾ ഏറെ സന്തോഷത്തോടെ അവന്റെ മുഖത്തേക്ക് നോക്കി ചോദിച്ചു..

ആണെടി പെണ്ണെ..

അപ്പോൾ അവളും അവന്റെ നെഞ്ചിലേക്ക് ചാഞ്ഞിരുന്നു..

അവൻ അവളെ തന്നോട് ചേർത്ത് പിടിച്ച് ആ കൈകൾ തന്റെ ചൂണ്ടിൽ അമർത്തി

ഇനിയിപ്പോ എന്തെങ്കിലും കഴിക്കുന്നതുകൊണ്ട് കുഴപ്പമില്ലല്ലോ..

അവളുടെ മുഖത്തേക്ക് നോക്കി അവൻ ചോദിച്ചപ്പോൾ അവന്റെ മുഖത്തേക്ക് നോക്കി അവൾ പറഞ്ഞു

വേണ്ടായിരുന്നു ഇച്ചായ എനിക്കൊന്നും വേണ്ട, ഇത് കേട്ടപ്പോൾ തന്നെ എന്റെ വയറു നിറഞ്ഞു.. നമുക്ക് എത്രയും പെട്ടെന്ന് അവിടേക്ക് പോകാം.

എന്നിട്ട് അവരെന്താ പറയുന്നതെന്ന് നമുക്ക് അറിയാം

നമ്മളിപ്പോൾ അവിടേക്ക് തന്നെയാ പോകുന്നത്. പക്ഷേ നീ ഭക്ഷണം കഴിക്കാതെ ഇവിടുന്ന് എങ്ങോട്ടും പോവില്ല. ആദ്യം വല്ലതും കഴിക്കാം ഇപ്പൊ തന്നെ തളർന്നു വീഴുന്ന അവസ്ഥയിൽ എത്തിയിട്ടുണ്ട് നീ

അവൻ വണ്ടി കൊണ്ടുവന്ന് നിർത്തിയത് റസ്റ്റോറന്റിൽ കയറിയതും അവൾക്കേറേ പ്രിയപ്പെട്ട ചെട്ടിനാട് ബിരിയാണി തന്നെയാണ് അവൻ ഓർഡർ ചെയ്തത്.

ഒട്ടുംതന്നെ വിശപ്പും ക്ഷീണവും തോന്നുന്നുണ്ടായിരുന്നില്ല എങ്കിലും അവൻ വഴക്കു പറയുന്ന് ഉറപ്പുള്ളതു കൊണ്ടുതന്നെ അവളാ ഭക്ഷണം കഴിച്ചു.

അത് കഴിക്കുമ്പോഴും താൻ കണ്ട സ്വപ്നം യാഥാർത്ഥ്യമാകാൻ പോവുകയാണോ അല്ലയോ എന്നുള്ള സംശയമായിരുന്നു അവളുടെ മനസ്സിൽ നിറയെ…

ബിരിയാണിയുടെ വലിയ പീസ് ഒക്കെ അവൾക്ക് നേരെ ഇട്ടുകൊടുത്തുകൊണ്ട് അവൻ അവളെ നന്നായി ഭക്ഷണം കഴിപ്പിക്കുന്നുണ്ട്. അവന്റെ കരുതലും സ്നേഹവും ഒക്കെ കാണെ അവളിൽ വീണ്ടും സന്തോഷം നിറഞ്ഞിരുന്നു.

അതോടൊപ്പം തന്നെ താൻ ഇപ്പോൾ കേട്ട വാർത്ത വെറുതെ ആവരുത് എന്ന ഒരു പ്രാർത്ഥനയും. പലപ്പോഴും ദൈവം ഒരു വലിയ സന്തോഷം കാണിച്ചു തന്ന് പിന്നെ വേദനിപ്പിക്കുകയാണ് ചെയ്യാറുള്ളത്. ഇത് അങ്ങനെ ആവരുത് എന്ന് അവൾ ആഗ്രഹിച്ചിരുന്നു. ഭക്ഷണം വേഗത്തിൽ കഴിച്ച് രണ്ടുപേരും ഫ്ലാറ്റിലേക്ക് തിരിക്കുമ്പോൾ അവൻ സ്റ്റീരിയോ ഓണാക്കി…

🎶വെണ്ണക്കൽക്കൊട്ടാരവാതിൽ നമുക്കായ് തുറക്കും
സങ്കൽ‍പസൗഗന്ധികങ്ങൾ നമുക്കായ് വിടരും
പുതിയൊരു പുലർകാലം തിരിയുഴിയുകയായി
മിഴിനീർ തുടയ്‌ക്കുക ഇനി നീ തനിച്ചല്ലെന്നറിയുക
കണ്മണി പോരൂ….🎶

അവളെ ഒന്ന് നോക്കി ഒരു കള്ളച്ചിരി ചിരിച്ചവന്റെ ചുമലിലേക്ക് ഏറെ സന്തോഷത്തോടെ അവൾ ചാഞ്ഞു കിടന്നു.. ആദ്യമായാണ് അവൾ ഇങ്ങനെ.. അതുകൊണ്ടു തന്നെ അവൾ എത്രത്തോളം സന്തോഷവതിയാണെന്ന് അവനും മനസ്സിലാക്കാൻ സാധിച്ചിരുന്നു…

എന്റെ കൊച്ചിന് ഭയങ്കര സന്തോഷമായി എന്ന് തോന്നുന്നല്ലോ.?

മുഖത്തേക്ക് നോക്കി കവിളിൽ തഴുകി അവൻ പറഞ്ഞപ്പോൾ അവൾ നന്നായി ഒന്ന് പുഞ്ചിരിച്ചു..

ഇതൊന്നും വെറുതെ ആവല്ലേ എന്ന് മാത്ര ഇപ്പൊ എന്റെ പ്രാർത്ഥന.

അങ്ങനെയുള്ള ഒരു പേടിയും വേണ്ട ഞാൻ ആദ്യം മുതലേ തന്നോട് പറഞ്ഞില്ലേ എന്റെ മമ്മയും പപ്പയും ഒക്കെ ഈ കാര്യത്തിന് സമ്മതിക്കുമെന്ന്. അവർക്ക് അങ്ങനെയുള്ള ഒരു പ്രശ്നങ്ങളും ഉണ്ടാവില്ലന്ന്.

അങ്ങനെ ആയാൽ മതിയായിരുന്നു

അതെന്താ തനിക്ക് ഇപ്പോഴും ഒരു വിശ്വാസക്കുറവ് പോലെ..

എനിക്കെന്തോ ഈ കാര്യം മാത്രം വിശ്വസിക്കാൻ കഴിയുന്നില്ല…

ആ വിശ്വാസ കുറവോക്കെ നമ്മള് ഫ്ലാറ്റിലേക്ക് ചെല്ലുമ്പോഴേക്കും മാറിക്കോളും.

അവൻ പറഞ്ഞപ്പോൾ അവൾ നന്നായി ഒന്ന് ചിരിക്കുക മാത്രം ചെയ്തു.

ഫ്ലാറ്റിന്റെ മുൻപിൽ എത്തിയപ്പോൾ രണ്ടുപേർക്കും അതുവരെ ഇല്ലാത്ത ഒരു ടെൻഷൻ തോന്നിയിരുന്നു.

എന്നാൽ തന്റെ ടെൻഷൻ അവളെ അറിയിക്കാതിരിക്കാൻ അവൻ നന്നായി തന്നെ പരിശ്രമിച്ചു.

അവളുടെ മുഖത്തേക്ക് നോക്കി ഒന്നുമില്ലെന്ന് പറഞ്ഞ് കണ്ണുകൾ അടച്ചു കാണിച്ചവൻ.

ഫ്ലാറ്റിനു മുൻപിൽ എത്തി ഡോർബൽ അടിക്കുമ്പോൾ രണ്ടുപേരുടെയും ഹൃദയം ക്രമാതീതമായി മിടിച്ചിരുന്നു..
അവൾ അവന്റെ കയ്യിൽ മുറുക്കി പിടിച്ചിട്ടുണ്ട് അവൾ എത്രത്തോളം ടെൻഷൻ അനുഭവിക്കുന്നുണ്ടെന്ന് അതിൽ നിന്ന് തന്നെ അവന് മനസ്സിലായിരുന്നു

അവൻ ഒന്നും ഇല്ലെന്ന് കണ്ണുകൾ അടച്ചു കാണിച്ചു. മുറി തുറന്നത് സണ്ണി ആയിരുന്നു..

അവനെ ഒന്നു നോക്കി എങ്കിലും ഒരു ചിരി അയാൾ നൽകിയത് മരിയയ്ക്കായായിരുന്നു. അയാളുടെ ചിരി കണ്ടപ്പോൾ തന്നെ അവൾക്ക് പകുതി ആശ്വാസമായി.

എന്നാൽ അത് ഏറ്റവും കൂടുതൽ സമാധാനം നൽകിയത് അവനിൽ ആണെന്ന് അയാൾക്ക് മനസ്സിലാക്കാൻ സാധിച്ചില്ല

” അകത്തേക്ക് വാ

രണ്ടുപേരോടുമായി പറഞ്ഞ് അയാൾ അകത്തേക്ക് കയറിയപ്പോൾ ഡൈനിങ് ടേബിളിന്റെ കസേരയിലിരുന്ന് ഫോൺ നോക്കുന്ന അമലയേയാണ് കണ്ടത്..

മരിയയ്ക്ക് അവരോട് എങ്ങനെ സംസാരിക്കണം എന്ന് അറിയുമായിരുന്നില്ല. ഓടിച്ചെന്ന് അവരുടെ കാലിൽ വീണ മാപ്പ് ചോദിക്കാനാണ് അവൾക്ക് തോന്നിയത്. പക്ഷേ ഇഷ്ടമായില്ലെങ്കിലോ.?അതുകൊണ്ട് അവൾ മടിച്ചു നിന്നു.

മോൾ ഇരിക്കെ, ഇവനോട് ഞങ്ങൾ ഒന്ന് സംസാരിക്കട്ടെ

സണ്ണി പറഞ്ഞപ്പോൾ അവൾ സമ്മതപൂർവ്വം തലയാട്ടി. അവളോട് കണ്ണുകൾ കൊണ്ട് ഇപ്പോൾ വരാമെന്ന് കാണിച്ചു അവൻ സണ്ണിക്കൊപ്പം അകത്തേക്ക് പോയിരുന്നു.. അമലയും അവർക്കൊപ്പം എഴുന്നേറ്റ് പോയപ്പോൾ അവൾക്ക് വീണ്ടും മനസ്സിൽ ഒരു സംശയം നിറഞ്ഞു. ഇനി തന്നെ വേണ്ട എന്ന് അവനെക്കൊണ്ട് പറയിപ്പിക്കാൻ വേണ്ടിയാണോ അവര് പോകുന്നത് എന്ന്.?

മുറിയിലേക്ക് ചെന്നതും സണ്ണി സോളമന്റെ മുഖത്തേക്ക് നോക്കി പറഞ്ഞു…

നിന്റെ ഇഷ്ടം പോലെ കല്യാണം നടത്താമെന്ന് ഞാനും നിന്റെ മമ്മയും കൂടി തീരുമാനിച്ചിരിക്കുന്നത്. പക്ഷേ എന്നെപ്പോലെ തന്നെ അവൾക്ക് ഒരു പേടിയുണ്ട് നിന്റെ ഭ്രമം കഴിയുമ്പോൾ നീ ആ പെങ്കൊച്ചി ഉപേക്ഷിക്കുമോ എന്ന്..

സണ്ണി അത് പറഞ്ഞപ്പോൾ അവൻ വിശ്വാസം വരാത്തതുപോലെ അമലയുടെ മുഖത്തേക്ക് നോക്കി. തന്നെ കുറിച്ച് അമ്മ അങ്ങനെ ചിന്തിക്കുമെന്ന് അവൻ പ്രതീക്ഷിച്ചിരുന്നില്ല. ഒരു നിമിഷം അവന് അവനോട് തന്നെ പുച്ഛം തോന്നിയിരുന്നു.

അവൾക്ക് എന്നെ അറിയാം…

മറ്റെവിടെയോ നോക്കി അവൻ പറഞ്ഞു. പക്ഷെ അവന്റെ കണ്ണുകൾ കലങ്ങി

അവന്റെ വാക്കിൽ അവൾക്ക് അവനോട് ഉള്ള വിശ്വാസം എത്രത്തോളം ഉണ്ട് എന്ന് വ്യക്തമാണ് എന്ന് സണ്ണിക്ക് തോന്നിയിരുന്നു…

ഏതായാലും പത്തിരുപത്തെട്ടു കൊല്ലം വളർത്തി വലുതാക്കിയതല്ലേ, അവളെക്കാൾ ഞങ്ങൾക്ക് നിന്നെ അറിയില്ലേ.?

അമല മറുപടി പറഞ്ഞു

ഞങ്ങളെക്കാൾ ഈ ചെറിയ സമയം കൊണ്ട് അവൾ നിന്നെ മനസ്സിലാക്കിയോ

ദേഷ്യത്തോടെ അമല ചോദിച്ചപ്പോൾ ഒരു വഴക്കു വേണ്ട എന്ന് തരത്തിൽ സണ്ണി അവരെ ഒന്ന് നോക്കി…

നോക്കി വളർത്തിയെങ്കിലും എന്നെ ശരിക്കും അവളോളം മനസ്സിലാക്കാൻ അമ്മയ്ക്ക് സാധിച്ചിട്ടില്ല അതിപ്പോ ഈ വാക്കുകളിൽ നിന്ന് തന്നെ എനിക്ക് മനസ്സിലാവുന്നുണ്ട്..

അവന്റെ വാക്കുകളിൽ വേദന നിറഞ്ഞിരുന്നു

എന്തോ പറയാൻ വന്ന അമലേ സണ്ണി കണ്ണുകൾ കൊണ്ട് തടഞ്ഞു..

ബെറ്റിയോട് അമല ഇപ്പോൾ സംസാരിച്ചു. കാര്യങ്ങളൊക്കെ കേട്ടപ്പോൾ ബെറ്റി കരയുക ആണ്. അയാൾ ഒരു കാര്യങ്ങളും വിളിച്ചു അവരോട് പറഞ്ഞിട്ടില്ല. അയാൾ പ്രശ്നം ഉണ്ടാക്കാനുള്ള രീതിയിലാ പോയത്. അതുകൊണ്ട് അവരുടെ ഭാഗത്തു നിന്ന് എത്രത്തോളം സഹകരണം ഉണ്ടാകും എന്ന് എനിക്കറിയില്ല. പിന്നെ ഇവിടെ നിന്റെ മമ്മയുടെ അമ്മച്ചിയും സമ്മതിക്കാൻ താല്പര്യമൊന്നും കാണുന്നില്ല.

എന്താണെങ്കിലും ഞാൻ വീട്ടിൽ വിളിച്ച് അപ്പച്ചനോട് പറഞ്ഞിട്ടുണ്ട് അച്ഛനോട് സംസാരിച്ചിട്ട് ഒരു ഡേറ്റ് അറിയിക്കണം എന്ന്. അപ്പച്ചൻ പറഞ്ഞിരിക്കുന്നത് നമ്മുടെ ഇടവക പള്ളിയിൽ വച്ച് തന്നെ കല്യാണം നടത്താം എന്നാണ്. ചെറിയൊരു മിന്നുകെട്ട് നടത്തിയിട്ട് ഇവിടെ വന്ന് നമ്മുടെ പരിചയക്കാർക്കും സുഹൃത്തുക്കൾക്കും ഒക്കെ ചെറിയൊരു പാർട്ടി! ഞാൻ അങ്ങനെയാ കരുതിയിരിക്കുന്നത്. എന്താ നിന്റെ അഭിപ്രായം.?

സണ്ണി ചോദിച്ചു

രജിസ്റ്റർ മാരേജ് ആണെങ്കിലും എനിക്ക് സമ്മതം ആണ്. പക്ഷേ അവളുടെ മനസ്സിൽ ഒരു വിവാഹ പന്തലും നാലാൾ അറിഞ്ഞുള്ള കല്യാണവും ഒക്കെ കാണും. അതിനു വേണ്ടിയാണ് ഞാൻ എല്ലാവരുടെയും സമ്മതം കാത്തിരുന്നതും.

അവൻ പറഞ്ഞപ്പോൾ തന്റെ മകൻ ഒരുപാട് മാറിപ്പോയി എന്ന് സണ്ണിക്കും തോന്നി. അവന്റെ ജീവിതത്തെ മാറ്റിമറിക്കാൻ വേണ്ടി ആയിരിക്കാം ഒരുപക്ഷേ മരിയ ഇവിടേക്ക് വന്നത് എന്ന് അയാൾ ചിന്തിച്ചു. ഒരേ സമയം അയാൾക്ക് സമാധാനവും സന്തോഷവും തോന്നി.

എങ്കിൽ പിന്നെ ഈ കാര്യങ്ങൾ എല്ലാം മരിയോട് പറയാം. കല്യാണം കഴിയുന്നതുവരെ അവൾ തൽക്കാലം ഹോസ്റ്റലിൽ തന്നെ നിന്നാൽ മതി.

അതും പറഞ്ഞു സണ്ണിയും അമലയും നടന്നു..

മമ്മ…

അവൻ വിളിച്ചപ്പോൾ അവർ ഒന്ന് തിരിഞ്ഞു നോക്കിയിരുന്നു.

എന്റെ റിക്വസ്റ്റ് ആയി കണ്ടാൽ മതി. എന്നോടും മമ്മ എന്തുവേണമെങ്കിലും കാണിചോ ? പിണക്കമോ ദേഷ്യമോ അങ്ങനേ എന്തും കാണിച്ചോ.? പക്ഷേ അവളോട് അങ്ങനെ കാണിക്കരുത്. അവൾക്കത് താങ്ങാൻ കഴിയില്ല. ഞങ്ങൾ തമ്മിൽ സ്നേഹത്തിലായ സമയത്ത് ഞാൻ അവൾക്ക് ഒരു റിംഗ് സമ്മാനിക്കാൻ വേണ്ടി പള്ളിയിൽ കൊണ്ടുപോയിരുന്നു. അവിടെവച്ച് അത് ഇട്ടുകൊടുക്കാമെന്ന് ഞാൻ കരുതിയത്, പക്ഷേ അവൾ സമ്മതിച്ചില്ല. മമ്മയുടെയും പപ്പയുടെയും അനുവാദത്തോടെ ഒരു ദിവസം അത് കയ്യിലിട്ടാൽ മതിയെന്നും അന്ന് മാത്രമേ അത് സ്വീകരിക്കുവെന്നും ആണ് അവൾ എന്നോട് പറഞ്ഞത്..

അത്രത്തോളം മമ്മയ്ക്കും പപ്പയ്ക്കും അവൾ പ്രാധാന്യം നൽകുന്നുണ്ട്. നിങ്ങളെ സ്നേഹിക്കുന്നുണ്ട്. നിങ്ങൾ അവളോട് അകൽച്ച കാണിക്കരുത്. എന്ത് ദേഷ്യം ഉണ്ടെങ്കിലും പരിഭവം ഉണ്ടെങ്കിലും അത് എന്നോട് കാണിച്ചോളൂ. അവൾ ഒരു നൂറ് തവണ പറ്റില്ലെന്ന് പറഞ്ഞിട്ടും പിറകെ നടന്നതും അവളെ ഇതിലേക്ക് വലിച്ചിട്ടതും ഞാനാ. ഞാൻ മാത്രം, അതിന്റെ പൂർണ ഉത്തരവാദിയും ഞാനാ.

സ്വന്തം അമ്മയേക്കാൾ കാര്യം ആയിട്ടാ മമ്മയേ അവൾ കാണുന്നത്. മമ്മയേ വിഷമിപ്പിച്ച് ഒരു ജീവിതത്തിന് തയ്യാറല്ലെന്നാ കുറച്ചു മുൻപ് കൂടി അവൾ എന്നോട് പറഞ്ഞത്. പറ്റുമെങ്കിൽ ഈ വിവരം മമ്മ തന്നെ അവളോട് പറ.

അവൾക്ക് സന്തോഷം ആകും. അവൾ അത് ആഗ്രഹിക്കുന്നുണ്ട് ജീവിതത്തിൽ ഒരുപാട് വിഷമങ്ങൾ അനുഭവിച്ചതല്ലേ, നമ്മൾ കാരണം ഒരു സന്തോഷം കിട്ടുമെങ്കിൽ അത് നല്ല കാര്യമല്ലേ മമ്മ.?

അവൻ പറഞ്ഞപ്പോൾ ഒന്നും മിണ്ടാതെ മുറിക്ക് പുറത്തേക്ക് ഇറങ്ങിപ്പോയിരുന്നു അമല. എല്ലാം ഇനി പഴയതുപോലെ ആകുമോ എന്ന സംശയത്തോടെ തന്നെ നിന്നു സോളമനും…കാത്തിരിക്കൂ………

മുന്നത്തെ പാർട്ടുകൾ വായിക്കാൻ ഇവിടെ ക്ലിക്ക് ചെയ്യുക…