റിയാദ്: സൗദി അറേബ്യയിൽ കാട പക്ഷികൾക്ക് ഒരേ സമയം രുചികരമായ ഒരു വിഭവമെന്ന നിലയിലും സംരക്ഷിക്കപ്പെടേണ്ട ഒരു ജീവിവർഗ്ഗമെന്ന നിലയിലും വലിയ പ്രാധാന്യമുണ്ട്. സൗദി സംസ്കാരത്തിലും പാചകത്തിലും കാടകൾക്ക് ദീർഘകാലത്തെ ബന്ധമാണുള്ളത്. എന്നാൽ, വർധിച്ചുവരുന്ന ഭീഷണികൾ ഈ പക്ഷികളുടെ നിലനിൽപ്പിന് വെല്ലുവിളിയുയർത്തുന്നതിനാൽ ഇവയുടെ സംരക്ഷണം അനിവാര്യമായി മാറിയിരിക്കുകയാണ്.
പരിസ്ഥിതിയുടെ ആരോഗ്യത്തിൻ്റെ സൂചകങ്ങളായി കാടകൾ വർത്തിക്കുന്നു. വിത്ത് വിതരണം ചെയ്യുന്നതിലും സസ്യങ്ങളുടെ പരാഗണത്തിലും പ്രാണികളെ നിയന്ത്രിക്കുന്നതിലും അവ നിർണായക പങ്ക് വഹിക്കുന്നു. ഇത് പരിസ്ഥിതി സന്തുലിതാവസ്ഥ നിലനിർത്തുന്നതിന് അത്യന്താപേക്ഷിതമാണ്.
സൗദി അറേബ്യയിലൂടെ ദേശാന്തരഗമനം നടത്തുന്ന പക്ഷികളിൽ പ്രധാനപ്പെട്ടവയാണ് കാടകൾ. കോമൺ കാട (Coturnix coturnix), ഹാർലെക്വിൻ കാട (Coturnix delegorguei) എന്നിങ്ങനെ രണ്ട് പ്രധാനപ്പെട്ട കാട വർഗ്ഗങ്ങളാണ് ഇവിടെ കാണപ്പെടുന്നത്. വർഷങ്ങളായി വേട്ടയാടൽ ഈ പക്ഷികൾക്ക് വലിയ ഭീഷണിയായിരുന്നു.
ഈ സാഹചര്യത്തിൽ, സൗദി അറേബ്യൻ സർക്കാർ കാടകളെ സംരക്ഷിക്കുന്നതിനായി കർശനമായ നിയമങ്ങൾ കൊണ്ടുവന്നിട്ടുണ്ട്. കാടകളെ വേട്ടയാടുന്നത് രാജ്യത്ത് നിയമവിരുദ്ധമാണ്. നിയമം ലംഘിക്കുന്നവർക്ക് ഒരു പക്ഷിക്ക് 1,500 സൗദി റിയാൽ (ഏകദേശം 400 ഡോളർ) പിഴ ചുമത്തും. കോമൺ കാടക്ക് 3,000 റിയാലും ഹാർലെക്വിൻ കാടക്ക് 7,000 റിയാലും നഷ്ടപരിഹാര മൂല്യം നിശ്ചയിച്ചിട്ടുണ്ട്.
1980-കളിൽ സൗദി അറേബ്യയിൽ വാണിജ്യാടിസ്ഥാനത്തിൽ കാടവളർത്തൽ ആരംഭിച്ചിരുന്നു. പ്രാഥമികമായി വേട്ടപ്പരുന്തുകൾക്ക് ഭക്ഷണം നൽകാനായിരുന്നു ഇത് തുടങ്ങിയതെങ്കിലും പിന്നീട് ഒരു രുചികരമായ വിഭവമായി മാറുകയായായിരുന്നു. കാടമുട്ടകൾക്ക് സൗദി അടുക്കളകളിൽ ഏറെ പ്രിയമുണ്ട്. അവയുടെ ചെറിയ വലിപ്പം, നേർത്ത സ്വാദ്, ഉയർന്ന പോഷകമൂല്യം എന്നിവ പരമ്പരാഗതവും ആധുനികവുമായ വിഭവങ്ങളിൽ അവയെ ഒരു പ്രധാന ചേരുവയാക്കി മാറ്റി. പ്രോട്ടീൻ, വിറ്റാമിൻ എ, ബി, ഡി, ഇരുമ്പ്, ഫോസ്ഫറസ് തുടങ്ങിയ അവശ്യ ധാതുക്കളാൽ സമ്പന്നമാണ് കാടമുട്ടകൾ.
സൗദി നാഷണൽ സെൻ്റർ ഫോർ വൈൽഡ് ലൈഫ് കാടകളെ സംരക്ഷിക്കുന്നതിനുള്ള വിപുലമായ പദ്ധതികൾക്ക് നേതൃത്വം നൽകുന്നുണ്ട്. സംരക്ഷിത മേഖലകളിലും ജൈവവൈവിധ്യ സമ്പുഷ്ടമായ പ്രദേശങ്ങളിലും പക്ഷി വർഗ്ഗങ്ങളെയും അവയുടെ വിതരണത്തെയും കുറിച്ച് സർവ്വേകൾ നടത്തുന്നത് ഈ സംരക്ഷണ പ്രവർത്തനങ്ങളുടെ ഭാഗമാണ്.
