ദുബായിൽ അനധികൃതമായി ഫ്ലാറ്റുകൾ പങ്കിടുന്നതുമൂലം കുടുംബങ്ങൾ കടുത്ത ബുദ്ധിമുട്ടുകൾ നേരിടുന്നതായി റിപ്പോർട്ട്. ഒരു ഫ്ലാറ്റിൽ 35 പേർ വരെ തിങ്ങിപ്പാർക്കുന്ന സാഹചര്യങ്ങൾ നിലവിലുണ്ടെന്നും ഇത് അസഹനീയമായ ശബ്ദശല്യത്തിനും തിരക്കിനും കാരണമാകുന്നതായും താമസക്കാർ പരാതിപ്പെടുന്നു.
നിയമവിരുദ്ധമായ ബെഡ് സ്പേസ് ഷെയറിംഗും ഫ്ലാറ്റുകൾ പാർട്ടീഷൻ ചെയ്ത് കൂടുതൽ പേരെ താമസിപ്പിക്കുന്നതും വ്യാപകമായതോടെയാണ് പ്രശ്‌നങ്ങൾ രൂക്ഷമായത്. ഇത് കെട്ടിടങ്ങളുടെ സുരക്ഷയെയും താമസക്കാരുടെ ജീവിത നിലവാരത്തെയും ഗുരുതരമായി ബാധിക്കുന്നുണ്ട്. പലപ്പോഴും കെട്ടിട മാനേജ്മെന്റിനും അധികൃതർക്കും പരാതി നൽകിയിട്ടും ഫലമുണ്ടാകുന്നില്ലെന്നും ചില കെട്ടിട ഉടമകൾ ഇത്തരം നിയമലംഘനങ്ങൾക്ക് ഒത്താശ നൽകുന്നുണ്ടെന്നും കുടുംബങ്ങൾ പറയുന്നു.
ദുബായ് നഗരസഭയുടെയും മറ്റ് അധികൃതരുടെയും കർശന നടപടികൾ ഈ വിഷയത്തിൽ തുടരുകയാണെങ്കിലും, താങ്ങാനാവുന്ന താമസസൗകര്യങ്ങളുടെ അഭാവം പലരെയും ഇത്തരം അനധികൃത താമസരീതികളിലേക്ക് തള്ളിവിടുന്നുണ്ട്. നിയമപരമായ മാർഗ്ഗങ്ങളിലൂടെ താങ്ങാനാവുന്ന ഭവനങ്ങൾ ലഭ്യമാക്കണമെന്നും നിലവിലുള്ള പ്രശ്നങ്ങൾക്ക് ശാശ്വത പരിഹാരം കാണണമെന്നും പ്രവാസികൾക്കിടയിൽ നിന്ന് ആവശ്യം ഉയർന്നിട്ടുണ്ട്.
