ഗുര്‍ഗോണ്‍: കാത്തിരിപ്പിനൊടുവില്‍ മോട്ടോറോളയുടെ ഏറ്റവും പുതിയ ജി സിരീസ് സ്മാര്‍ട്ട്‌ഫോണായ മോട്ടോ ജി75 5ജി ലോഞ്ച് ചെയ്തു. സ്നാപ്ഡ്രാഗണ്‍ 6 ജെനറേഷന്‍ 3 ചിപ്സെറ്റില്‍ വരുന്ന ഫോണ്‍ തെരഞ്ഞെടുക്കപ്പെട്ട രാജ്യങ്ങളില്‍ മാത്രമേ ആദ്യ ഘട്ടത്തില്‍ ലഭ്യമാവുകയുള്ളൂവെന്ന് ചിക്കാഗോ ആസ്ഥാനമായ അമേരിക്കന്‍ കമ്പനി വ്യക്തമാക്കിയിട്ടുണ്ട്.
മൂന്ന് നിറങ്ങളിലുള്ള ഫോണ്‍ യൂറോപ്പിന് പുറമെ ലാറ്റിനമേരിക്കയിലും തെരഞ്ഞെടുക്കപ്പെട്ട ഏഷ്യാ-പസിഫിക് രാജ്യങ്ങളിലുമാവും ആദ്യഘട്ടത്തില്‍ ലഭ്യമാകുക. ഇന്ത്യയില്‍ ഫോണ്‍ എപ്പോള്‍ ലഭ്യമാകുമെന്ന് കമ്പനി വ്യക്തമാക്കിയിട്ടില്ല. സ്നാപ്ഡ്രാഗണ്‍ 6 ജെനറേഷന്‍ 3 ചിപ്സെറ്റില്‍ 8ജിബി വേരിയന്റാണ് ഇപ്പോള്‍ അവതരിപ്പിച്ചിരിക്കുന്നത്. 299 യൂറോ (ഏതാണ്ട് 27,000 ഇന്ത്യന്‍ രൂപ) ആണ് 8ജിബി റാമും 256 ജിബി സ്റ്റോറേജും വരുന്ന മോഡലിന് യൂറോപ്പിലെ വില.
മിലിറ്ററി നിലവാരത്തിലുള്ള സുരക്ഷയാണ് ഈ സ്മാര്‍ട്ട്‌ഫോണിലുള്ളതെന്നാണ് നിര്‍മാതാക്കളുടെ അവകാശവാദം.
മൈക്രോ എസ്ഡി കാര്‍ഡിലൂടെ സ്റ്റോറേജ് 1 ടിബി വരെയായി ഉയര്‍ത്താനാവുമെന്നതും പ്രത്യേകത തന്നെ. ഇരട്ട നാനോ സിം ഇടാന്‍ കഴിയുന്നതാണ് മോട്ടോ ജി75 5ജി സ്മാര്‍ട്ട്‌ഫോണ്‍. ആന്‍ഡ്രോയ്ഡ് 14 പ്ലാറ്റ്ഫോമില്‍ വരുന്ന ഫോണിനുള്ളത് 6.78 ഇഞ്ചിന്റെ ഫുള്‍ എച്ച്ഡി+ ഡിസ്പ്ലെ സ്‌ക്രീനിന് ഗോറില്ല ഗ്ലാസ് 5 സുരക്ഷയും സജ്ജമാക്കിയിട്ടുണ്ട്.
50 മെഗാപിക്സലിന്റെ സോണി ലിതിയ 600 പ്രധാന സെന്‍സറും 8 മെഗാപിക്സലിന്റെ അള്‍ട്രാ വൈഡ്-ആംഗിള്‍ മാക്രോ സെന്‍സറുമാണ് ഉള്‍പ്പെടുന്നത്. പൂജ്യത്തില്‍ നിന്ന് 50 ശതമാനത്തിലേക്ക് ചാര്‍ജ് എത്താന്‍ 25 മിനിറ്റ് മതിയെന്നാണ് കമ്പനി വ്യക്തമാക്കുന്നത്. 16 എംപിയുടെതാണ് സെല്‍ഫിക്കും വീഡിയോ കോളിംഗിനുമായുള്ള മുന്‍ ക്യാമറ. മിലിറ്ററി നിലവാരത്തിലുള്ള എംഐഎല്‍ – എസ്ടിഡി 810എച്ച് സര്‍ട്ടിഫിക്കറ്റും ഐപി68 റേറ്റിംഗും വരുന്ന ഫോണ്‍ പൊടിപടലങ്ങളിലും വെള്ളത്തിനടിയിലും സുരക്ഷ ഉറപ്പാക്കുമെന്ന് പ്രതീക്ഷിക്കാം.
ജിപിഎസ്, എല്‍ടിഇപിപി, ഗ്ലോനാസ്സ് ഗലീലിയോ, എന്‍എഫ്സി, ബ്ലൂടൂത്ത് 5.4, യുഎസ്ബി ടൈപ്പ്-സി പോര്‍ട്ട്, വൈഫൈ 802.11 എന്നിവയാണ് 5ജിക്ക് പുറമെ ഫോണിലുള്ള മറ്റ് കണക്റ്റിവിറ്റികള്‍. അസ്സെലെറോമീറ്റര്‍, ആംബ്യന്റ് ലൈറ്റ്, ഫ്‌ളിക്കര്‍ സെന്‍സര്‍, പ്രോക്സിമിറ്റി സെന്‍സര്‍ തുടങ്ങി നിരവധി സെന്‍സറുകളും സൗഡ്-മൗണ്ടഡ് ഫിംഗര്‍പ്രിന്റ് സെന്‍സറുമുണ്ട്. 5,000 എംഎഎച്ച് ബാറ്ററിക്കൊപ്പം വരുന്നത് 30 വാട്ട്സ് വയേര്‍ഡ് ഫാസ്റ്റ് ചാര്‍ജറും 15 വാട്ട്സ് വയര്‍ലെസ് ചാര്‍ജിംഗ് സംവിധാനവുമാണ്. എന്തായാലും മോട്ടറോളയുടെ ആരാധകരായ ഇന്ത്യക്കാര്‍ ഫോണ്‍ ലഭിക്കാന്‍ ഇനിയും കാത്തിരിക്കേണ്ടിവരും.
