ഹംഗറിയിൽ തീർഥാടകർ സഞ്ചരിച്ച ബസ് മറിഞ്ഞു; 12 പോളിഷ് പൗരന്മാർ മരിച്ചു: നിരവധി പേർക്ക് പരിക്ക്

​ബുഡാപെസ്റ്റ്: ഹംഗറിയിൽ പോളണ്ടിൽ നിന്നുള്ള തീർഥാടകർ സഞ്ചരിച്ച ബസ് മറിഞ്ഞ് 12 പേർ മരിച്ചു. അപകടത്തിൽ 10 പേർക്ക് ഗുരുതരമായി പരിക്കേൽക്കുകയും 37-ഓളം പേർക്ക് നിസ്സാര പരിക്കേൽക്കുകയും ചെയ്തിട്ടുണ്ട്.

​കിഴക്കൻ ഹംഗറിയിലെ മെസോകെറെഷ്തെസ് (Mezőkeresztes) നഗരത്തിന് സമീപം എം3 (M3) മോട്ടോർവേയിൽ ഞായറാഴ്ച പുലർച്ചെ ഒരു മണിയോടെയാണ് അപകടമുണ്ടായത്. ബോസ്‌നിയ-ഹെർസഗോവിനയിലെ തീർഥാടനം പൂർത്തിയാക്കി പോളണ്ടിലേക്ക് മടങ്ങുകയായിരുന്ന സംഘമാണ് അപകടത്തിൽപ്പെട്ടത്.

​നേരെയുള്ള റോഡിലൂടെ സഞ്ചരിക്കുകയായിരുന്ന ബസ് പെട്ടെന്ന് നിയന്ത്രണം വിട്ട് റോഡരികിലെ കുഴിയിലേക്ക് പതിച്ച് മറിയുകയായിരുന്നു. ഡ്രൈവർ ഉറങ്ങിപ്പോയതാണ് അപകടത്തിന് കാരണമെന്ന് സംശയിക്കുന്നതായി ഹംഗേറിയൻ പോലീസ് അറിയിച്ചു. ഡ്രൈവറെ പോലീസ് കസ്റ്റഡിയിലെടുത്തിട്ടുണ്ട്.

​57 യാത്രക്കാരും രണ്ട് ഡ്രൈവർമാരുമാണ് ബസിലുണ്ടായിരുന്നത്. പോളണ്ടിന്റെ തെക്കുകിഴക്കൻ മേഖലയിൽ നിന്നുള്ളവരാണ് യാത്രക്കാരേറെയും. അപകടത്തിൽപ്പെട്ടവരെ തൊട്ടടുത്തുള്ള ആശുപത്രികളിൽ പ്രവേശിപ്പിച്ചു. ദുരന്തത്തിൽ പോളിഷ്, ഹംഗേറിയൻ ഭരണാധികാരികൾ കടുത്ത ദുഃഖവും അനുശോചനവും രേഖപ്പെടുത്തി.