ഒരുപാട് സന്തോഷം; പുരസ്‌കാരം ആടുജീവിതത്തിൽ പ്രവർത്തിച്ച ഓരോരുത്തർക്കും അർഹിച്ചതാണ്: പൃഥ്വിരാജ്
ആടുജീവിതത്തിലൂടെ മികച്ച നടനുള്ള സംസ്ഥാന പുരസ്‌കാരം ലഭിച്ചതിൽ ഒരുപാട് സന്തോഷമുണ്ടെന്ന് പൃഥ്വിരാജ് സുകുമാരൻ. ഈ പുരസ്‌കാരം സിനിമയിൽ പ്രവർത്തിച്ച ഓരോരുത്തർക്കും അർഹതയുള്ളതാണ്. ഈ സമയത്ത് ഏറ്റവുമധികം ഓർമിക്കുന്നത് നജീബിനെയും ബെന്യാമിനെയും ഈ സിനിമക്ക് വേണ്ടി തന്റെ ജീവിതത്തിലെ 16 വർഷങ്ങൾ സമർപ്പിച്ച ബ്ലെസിയെയുമാണെന്ന് പൃഥ്വിരാജ് പറഞ്ഞു
പുരസ്‌കാരങ്ങൾ ഒരിക്കലും മോഹിക്കാറില്ല. കിട്ടുമ്പോൾ സന്തോഷിച്ചാൽ മതിയല്ലോയെന്നും താരം പ്രതികരിച്ചു. മികച്ച നടനുള്ള അംഗീകാരം എനിക്ക് ലഭിച്ചു എന്നതിനൊപ്പം തന്നെ ആ സിനിമക്ക് ഇത്രയും അംഗീകാരം കിട്ടി എന്നുള്ളതിലും സന്തോഷമുണ്ട്.
ആ സിനിമക്ക് ലഭിക്കാവുന്നതിൽ ഏറ്റവും വലിയ അംഗീകാരം സിനിമ റിലീസ് ചെയ്തപ്പോൾ ലോകമെമ്പാടുമുള്ള പ്രേക്ഷകർ സിനിമക്ക് അംഗീകാരം തന്നു എന്നതാണ്. സിനിമക്ക് കിട്ടിയ അംഗീകാരങ്ങളിൽ ഏറ്റവും ക്രെഡിറ്റ് കൊടുക്കേണ്ടത് ബ്ലെസി ചേട്ടന് തന്നെയാണെന്നും പൃഥ്വിരാജ് പറഞ്ഞു.
