ന്യൂഡല്‍ഹി: ഇന്ത്യന്‍ വ്യവസായ രംഗത്തെ അതികായനായിരുന്ന രത്തന്‍ ടാറ്റ തന്നോട് പണം കടംചോദിച്ച ഓര്‍മ പങ്കിട്ട് ബിഗ് ബി. വായില്‍ വെള്ളിക്കരണ്ടിയുമായി സമ്പത്തിന്റെ മടിത്തട്ടിലേക്കു ജനിച്ചുവീണ ഒരാള്‍ തന്നോട് പണം ചോദിച്ചത് ലാളിത്യത്തിന്റെ പൂര്‍ണതയായാണ് ഞാന്‍ മനസ്സിലാക്കിയത്. രത്തന്‍ ടാറ്റയുമായുള്ള ഓര്‍മകള്‍ പങ്കിടവേയാണ് ബോളിവുഡിന്റെ എക്കാലത്തേയും തലയെടുപ്പുള്ള നടനായ അമിതാബ് ബച്ചന്‍ ഇക്കാര്യം വെളിപ്പെടുത്തിയത്.
ലണ്ടനിലേക്ക് ഒരേ വിമാനത്തില്‍ ഞങ്ങള്‍ യാത്ര ചെയ്ത അനുഭവം വിവരിക്കവേയാണ് അദ്ദേഹം ഇക്കാര്യം ഓര്‍ത്തെടുത്തത്. ലണ്ടന്‍ എയര്‍പോര്‍ട്ടില്‍ എത്തിയ അദ്ദേഹത്തിന് അത്യാവശ്യമായി ഒരു ഫോണ്‍ ചെയ്യേണ്ടി വന്നു. ചുറ്റിനും ആരെങ്കിലുമുണ്ടോയെന്ന് അദ്ദേഹം നോക്കുന്നുണ്ടായിരുന്നു. എന്നാല്‍ അവിടെ ആരും ഉണ്ടായിരുന്നില്ല. ഫോണ്‍ ബൂത്തിന്റെ അടുത്ത് നില്‍ക്കുന്ന എന്നെ കണ്ടപ്പോള്‍ അദ്ദേഹം എന്റെ നേരെ നടന്നു വന്നു.
അമിതാഭ് നിങ്ങള്‍ എനിക്ക് കുറച്ച് പണം തരുമോ…? ഒരു ഫോണ്‍ ചെയ്യാനുള്ള പണം എന്റെ കയ്യിലില്ല എന്നായിരുന്നു ആ മനുഷ്യന്‍ പറഞ്ഞത്. എത്രത്തോളം വിനയവും ലാളിത്യവുമുള്ള മനുഷ്യനാണ് അദ്ദേഹമെന്നത് താന്‍ ആ നിമിഷം അനുഭവിച്ചറിയുകയായിരുന്നൂവെന്നും അമിതാഭ് ബച്ചന്‍ പറഞ്ഞു.
2004ല്‍ അമിതാഭ് ബച്ചനെ നായകനാക്കിക്കൊണ്ട് രത്തന്‍ ടാറ്റ നിര്‍മിച്ച ചിത്രമായിരുന്നു ഏത്ബാര്‍. രത്തന്‍ ടാറ്റയുടെ ബോളിവുഡിലെ അരങ്ങേറ്റ ചിത്രവുമായിരുന്നു ഏത്ബാര്‍. രത്തന്‍ ടാറ്റയുമായുള്ള അന്നത്തെ അനുഭവവും ബച്ചന്‍ വെളിപ്പെടുത്തിയിരുന്നു. ഒക്ടോബര്‍ പത്തിനാണ് രത്തന്‍ ടാറ്റ അന്തരിച്ചത്. രത്തന്‍ ടാറ്റയുടെ മരണത്തില്‍ ആദ്യം അനുശോചനം രേഖപ്പെടുത്തിയവരില്‍ ഒരാളാണ് അമിതാഭ് ബച്ചന്‍.
ഒരു യുഗം അവസാനിച്ചു. അദ്ദേഹത്തിന്റെ വിനയവും ദീര്‍ഘവീക്ഷണവും രാജ്യത്തിന്റെ ഉന്നതിക്കായുള്ള ദൃഢനിശ്ചയവും എന്നും അഭിമാനത്തോടെ ഓര്‍മിക്കപ്പെടും. ഒരുമിച്ച് പ്രവര്‍ത്തിക്കാനുള്ള അവസരം ലഭിച്ചതില്‍ താന്‍ ഏറെ അഭിമാനിക്കുന്നു എന്നായിരുന്നു രത്തന്‍ ടാറ്റയെ അനുസ്മരിച്ച് അമിതാബ് ബച്ചന്‍ സമൂഹമാധ്യമങ്ങളില്‍ കുറിച്ച വാക്കുകള്‍. ആ വാക്കുകള്‍ ഉടന്‍ തന്നെ രാജ്യം ഏറ്റെടുക്കുന്നതിനും നാമെല്ലാം സാക്ഷിയായതാണ്.
