സർക്കാരിൽ ഉറച്ച വിശ്വാസമുണ്ട്, നീതി കിട്ടുമെന്നാണ് പ്രതീക്ഷ: ഷഹബാസിന്റെ കുടുംബം മുഖ്യമന്ത്രിയെ കണ്ടു
താമരശ്ശേരിയിൽ വിദ്യാർഥി സംഘർഷത്തിൽ കൊല്ലപ്പെട്ട പത്താം ക്ലാസ് വിദ്യാർഥി ഷഹബാസിന്റെ കുടുംബം മുഖ്യമന്ത്രി പിണറായി വിജയനെ കണ്ടു. മുഖ്യമന്ത്രി അനുഭാവപൂർവമായ മറുപടിയാണ് നൽകിയതെന്ന് ഷഹബാസിന്റെ പിതാവ് പറഞ്ഞു. സർക്കാരിൽ ഉറച്ച വിശ്വാസമുള്ളതു കൊണ്ട് നീതി കിട്ടുമെന്ന പ്രതീക്ഷയിലാണ് തങ്ങളെന്നും അദ്ദേഹം പറഞ്ഞു
കൃത്യത്തിൽ രണ്ട് കുട്ടികളുടെ രക്ഷിതാക്കൾക്ക് കൂടി പങ്കുണ്ട്. അവർക്ക് കൂടിയുള്ള ശിക്ഷ വാങ്ങിക്കൊടുക്കണം. കുട്ടികൾക്ക് രക്ഷിതാക്കൾ നൽകിയ പ്രേരണ അന്വേഷണത്തിൽ ഉൾപ്പെടുത്തണമെന്ന് മുഖ്യമന്ത്രിയോട് ആവശ്യപ്പെട്ടു. നഞ്ചക്ക് അടക്കം വീട്ടിൽ സൂക്ഷിച്ച രക്ഷിതാക്കളെ നിയമത്തിന് മുന്നിൽ കൊണ്ടുവരണം
കുട്ടികളെ പരീക്ഷ എഴുതിക്കരുതെന്ന് ആവശ്യപ്പെട്ടിരുന്നു. എന്നാൽ കോടതി ഉത്തരവ് നടപ്പാക്കാനെ സർക്കാരിന് കഴിയൂ എന്നറിയാം. പ്രതികളായവർക്ക് തക്കതായ ശിക്ഷ കിട്ടണമെന്നാണ് ആവശ്യമെന്നും ഷഹബാസിന്റെ പിതാവ് ഇക്ബാൽ പറഞ്ഞു.
