ബെംഗളൂരു: കർണാടകയിൽ മുഖ്യമന്ത്രി സ്ഥാനത്ത് മാറ്റമുണ്ടാകുമെന്ന അഭ്യൂഹങ്ങൾക്ക് തൽക്കാലം വിരാമം. മുഖ്യമന്ത്രി സിദ്ധരാമയ്യയെ മാറ്റാൻ നിലവിൽ ഒരു പദ്ധതിയും ഇല്ലെന്ന് കോൺഗ്രസ് ഹൈക്കമാൻഡ് വ്യക്തമാക്കി. ഭരണകക്ഷിയിലെ അസ്വാരസ്യങ്ങൾ പരിഹരിക്കാൻ ബെംഗളൂരുവിലെത്തിയ കോൺഗ്രസ് നേതാവും രാജ്യസഭാ എംപിയുമായ രൺദീപ് സിംഗ് സുർജേവാലയാണ് ഇക്കാര്യം അറിയിച്ചത്. എംഎൽഎമാരുമായി നടത്തിയ ചർച്ചകളിൽ നേതൃമാറ്റം സംബന്ധിച്ച് ഒരു നിർദേശവും വന്നിട്ടില്ലെന്ന് അദ്ദേഹം മാധ്യമങ്ങളോട് പറഞ്ഞു.
ഉപമുഖ്യമന്ത്രി ഡി.കെ. ശിവകുമാറിനെ മുഖ്യമന്ത്രിയാക്കണമെന്ന് അദ്ദേഹത്തിന്റെ അനുയായികൾ ആവശ്യമുന്നയിക്കുന്നതിനിടെയാണ് സുർജേവാലയുടെ പ്രതികരണം. സുർജേവാല സംസാരിക്കുമ്പോൾ ശിവകുമാർ അദ്ദേഹത്തിനരികിൽ തന്നെയുണ്ടായിരുന്നു. പാർട്ടി ഹൈക്കമാൻഡ് പ്രശ്നപരിഹാരത്തിനായി നേരിട്ട് ഇടപെട്ടതോടെയാണ് മുഖ്യമന്ത്രി മാറ്റം സംബന്ധിച്ച ചർച്ചകൾക്ക് താൽക്കാലികമായി ഇടവേള വന്നിരിക്കുന്നത്. സിദ്ധരാമയ്യയും ഡി.കെ. ശിവകുമാറും തമ്മിൽ രണ്ടര വർഷം വീതം മുഖ്യമന്ത്രി സ്ഥാനം പങ്കുവെക്കാൻ ധാരണയുണ്ടായിരുന്നതായി നേരത്തെ അഭ്യൂഹങ്ങൾ പ്രചരിച്ചിരുന്നു. എന്നാൽ, ഇങ്ങനെയൊരു ധാരണ നിലവിലില്ലെന്ന് സിദ്ധരാമയ്യ പക്ഷം പറയുന്നു.
സംസ്ഥാനത്തെ ഭരണ പ്രതിസന്ധി രൂക്ഷമാകുന്നതിനിടെ, എല്ലാ എംഎൽഎമാരുടെയും പിന്തുണയോടെ സർക്കാർ അഞ്ചു വർഷവും നിലനിൽക്കുമെന്ന് സിദ്ധരാമയ്യയും ശിവകുമാറും ആവർത്തിച്ച് പറഞ്ഞിരുന്നു. ഈ വിഷയത്തിൽ കൂടുതൽ പ്രസ്താവനകൾ നടത്തുന്നതിൽ നിന്ന് നേതാക്കളോട് വിട്ടുനിൽക്കാൻ ഹൈക്കമാൻഡ് നിർദ്ദേശം നൽകിയിട്ടുണ്ടെന്നും റിപ്പോർട്ടുകളുണ്ട്.
