പുതിയ സൂപ്പർമാൻ സിനിമ ഗാസ യുദ്ധവുമായി സമാനതകളെന്ന് വിമർശനം; ചർച്ചകൾ ചൂടുപിടിക്കുന്നു

‘സൂപ്പർമാൻ’ (James Gunn’s Superman) റിലീസ് ചെയ്തതിന് പിന്നാലെ ചിത്രത്തിന് ഗാസ യുദ്ധവുമായി സമാനതകളുണ്ടെന്ന് ചൂണ്ടിക്കാട്ടി സമൂഹ മാധ്യമങ്ങളിൽ വ്യാപക ചർച്ച. സംവിധായകൻ ജെയിംസ് ഗൺ ഈ വിഷയത്തിൽ പരസ്യമായി പ്രതികരിച്ചിട്ടില്ലെങ്കിലും, സിനിമയിലെ ചില രംഗങ്ങളും കഥാസന്ദർഭങ്ങളും ഇസ്രായേൽ-ഗാസ യുദ്ധത്തെ ഓർമ്മിപ്പിക്കുന്നുവെന്നാണ് പ്രേക്ഷകർ അഭിപ്രായപ്പെടുന്നത്. ചിത്രത്തിൽ ‘ബോറാവിയ’ എന്ന രാജ്യവും അതിനെതിരെ ദുർബലരായ ‘ജർഹാൻപൂർ’ എന്ന രാജ്യവും തമ്മിലുള്ള പോരാട്ടമാണ് പ്രധാനമായും കാണിക്കുന്നത്. യു.എസ്. പിന്തുണയുള്ള ശക്തമായ സൈനിക ശക്തിയാണ് ബോറാവിയ. അതേസമയം, ജർഹാൻപൂരിന് വേണ്ടത്ര വിഭവങ്ങളില്ലാത്തതിനാൽ പ്രതിരോധിക്കാൻ കഴിയുന്നില്ല. ബോറാവിയൻ സൈന്യം ടാങ്കുകളും തോക്കുകളുമായി മുന്നോട്ട് വരുന്നതും നിരായുധരായ ജർഹാൻപൂർ പൗരന്മാർ ജീവൻ രക്ഷിക്കാൻ ശ്രമിക്കുന്നതും ഗാസയിലെ നിലവിലെ സാഹചര്യങ്ങളുമായി സാമ്യപ്പെടുത്തുന്നുണ്ട്.   ബോറാവിയക്കാർ വെളുത്ത വർഗ്ഗക്കാരായും ജർഹാൻപൂർകാർ വെള്ളക്കാരല്ലാത്തവരായും ചിത്രീകരിച്ചിരിക്കുന്നു എന്നതും, ജർഹാൻപൂർ നിവാസികളെ കുടിയിരുത്തി ബോറാവിയൻ രാജ്യം വികസിപ്പിക്കാനുള്ള നീക്കങ്ങളും ഗാസയിലെയും പലസ്തീനിലെയും സാഹചര്യങ്ങളുമായി താരതമ്യം ചെയ്യപ്പെടുന്നു. സിനിമയുടെ ക്ലൈമാക്സിൽ സൂപ്പർമാൻ ജർഹാൻപൂർ നിവാസികളെ രക്ഷിച്ചതിന് ശേഷം കുട്ടികളും പുരുഷന്മാരും സൂപ്പർമാന്റെ പതാക ഉയർത്തുന്നത് 2018-2019 ലെ ഗാസ അതിർത്തി പ്രതിഷേധങ്ങളായ ‘ദി ഗ്രേറ്റ് മാർച്ച് ഓഫ് റിട്ടേൺ’ സമയത്ത് പലസ്തീൻ പതാക ഉയർത്തിയതിനെ അനുസ്മരിപ്പിക്കുന്നതായും ചിലർ ചൂണ്ടിക്കാട്ടുന്നു. സിനിമയിലെ ഈ സൂക്ഷ്മമായ രാഷ്ട്രീയ സന്ദേശങ്ങൾ സോഷ്യൽ മീഡിയയിൽ വലിയ സംവാദങ്ങൾക്ക് വഴിയൊരുക്കിയിരിക്കുകയാണ്. ചിലർ സിനിമയുടെ ഈ നിലപാടിനെ പ്രശംസിക്കുമ്പോൾ, മറ്റുചിലർ ഇത് വിവാദപരമാണെന്ന് അഭിപ്രായപ്പെടുന്നു. അതേസമയം, ചിത്രത്തിന് ഇന്ത്യയിൽ മികച്ച പ്രതികരണമാണ് ലഭിക്കുന്നത്. ബോക്സ് ഓഫീസിൽ ചിത്രം മികച്ച കളക്ഷൻ നേടിക്കൊണ്ടിരിക്കുകയാണ്.